Read Komrem EZEKIEL 22 Bible Online

EZEKIEL 22 - Komrem bible

EZEKIEL 22

¹RŌNGPU’n kahnenga ahri.

²Ama’n ati, “Akathithei mihring, mikathat-hei sipna khōpui kha ṭong tan sik a a’ntluk che mo? Amanu ṭōntlo mater ka-om rakip kha hrimanchên pek roh.

³Chunghnung RŌNGPU ke’n kahri hi khōpui hnenga manthei roh: nang in namihei khangtuk hrep nathat jâr heia khana limsyemhei nakamuk a nabinga na’nbōk innim jâra, napha kha kajōng jo.

⁴Khava mithat natlo jâra naṭhe jo khana lim nasyem jâra kabōk jo che, khava jâra napha kha kajōng jo, napha kha inchai jo! Khava jâra jât-hei manuisōna kamannei hei che khana ram rakip in hnōisea kamantlo hei che.

⁵Nang dân kase nachang jâra, ram kahnai leh ram kahla he’n hnōisetak a antlo che.

⁶Israel hlamkakei rakip anbing ratha hratna kha antaksen et khana mi anthat.

⁷Khōpui shunga nanmi he’n annu anpa kajamak hei. Khōhmehei nanhōn hei khana renghmeihei leh nu leh pa kasehei chunga hnemna nanjong.

⁸Hmun intheng hei chunga kajana neimak che, Châmhngat kani nitmak che.

⁹Nanmi ṭhahrep in ahlop-hei chunga maleiseia thatna sik antlo. Ṭhahrep in limsyem hnenga inthoina tōkna kha ansâk. Ṭhahrep in antamadu antarangei antlosōt.

¹⁰Ṭhahrep in anpahei nuhmeihei anjepui hei. Ṭhahrep in nuhmei pōn hmulai rumhrat a rakhum an-inchunpui hei.

¹¹Ṭhahrep in mi nuhmei inrîm ka-om chei, khana ahlop in anhmōinu a-emak leh anser kasōk inrîm ka-om chei.

¹²Nanmi ṭhahrep in sêr pek a mikathat ka-om chei. Ṭhahrep in ansōpui Israelhei hnenga sêrpûk masōa sêrthōi kalo khana anmani heia inphut hnemna jonga mikahao ka-om jo chei. Anmani’n kei anmahngi jo eng.” Chunghnung RŌNGPU’n ati jo.

¹³“Nangni mikachom hei leh mikathat-hei chunga kakuttum hi kamathlâk sik jo kae.

¹⁴Ke’n nangni manchaina katlo pha nangni’n inngamna a-emak leh nankut kalâng torna sik a ratha katluk a nannei sik tia a’ndon chei mo? RŌNGPU ke’n kahri jo kae, khana kaṭong kha katlo nger sik.

¹⁵Ram rakip leh jât rakip hei kâra namihei kakathek manchai sik hei khana nanṭōnse tlo kha kamanbâng sik.

¹⁶Jât-hlop hei khan nangni kajana neimak hei ning, tâk nangni’nchu kei hi RŌNGPU eng kae tia nanmanhret sik jo eng.”

¹⁷RŌNGPU’n kahnenga ahri.

¹⁸“Akathithei mihring, Israel mihei hi kei sik a hnemmak hei. Anmani hi ratap shunga dangka manthengsōt sōa koli, tin, thir leh ngen thir-ek akatla kapō hei kae.

¹⁹Khava jâra tûnchu, Chunghnung RŌNGPU ke’n anmani kha khava kapōa hnemna kase hei kae tia kamanthei hei. Ke’n anmani ankhenga Jerusalema kaṭhōi male sik jo hei

²⁰dangka, sumsen, thir, ngen khana tin mantheng sōtna ratap shunga antathōn manhlut hei kapōa, hmei in thir hei amanjor hei kapōa, kahnuk natna leh kasuk manrimna hei khan amanjor sik hei.

²¹Kadik, ke’n Jerusalema kamantûp sik hei, anhnōiting hmei kahong mansûk sik, khana kahnuknat vânga kamanjor sik hei.

²²Ratap shunga dangka kajor kapōa, Jerusalema kajor sik hei, khava sōa RŌNGPU hnuknat antachen kae tia anmanhret sik jo.”

²³RŌNGPU’n kahnenga ahri nôk.

²⁴Ama’n ati, “Akathithei mihring, Israelhei kha anram intheng mak jo, khava jâra ke’n kahnuknat a karâkna kapek kae tia manthei hei roh.

²⁵Hlamkakeihei kha shabakkai in ashathat jâra a’nhrung kapō hei kae. Mi anthat hei, antalo tor seng sêr leh neinâk rakip anchomsōt, khana anmi that jâra renghmeinu katamtak ka-om jo hei.

²⁶Thempu he’n kadân anvōkkhōi khana a’ntheng chunga kajana neimak hei. Anmani’n a’ntheng leh a’nthengmak ṭhensōt mak hei. A’ntheng leh akabōk in-ang makna kha mi hnenga manthei mak hei, khana Châmhngat kani kha donmak hei. Khava jâra Israel mipui he’n kei akaja mak jo hei.

²⁷Ram vaikarônhei kha kahne’n anshathat antakeihler kapō hei kae. Mikahao changna sik a anmani’n mi anthat a kae.

²⁸Sânkathemhei khan sunu kabang vânga intei bang kapōa, hiva setna hi anthup a kae. Anmani’n akadik mak hmangtalâr anhmu khana dik loa hnungṭong anhrisōt. Anmani’n Chunghnung RŌNGPU ṭong kha antahri kae anti, tâk-kha RŌNGPU ke’nchu anhnenga ṭong hrimak eng.

²⁹Mikahao he’n mi anhōn khana anchom hei. Sarahei kha êngset a antlo hei khana khōhmehei chunga hnemna anjong.

³⁰Kahnuknat in khava bang asukkhōi pha, ahmun a akangirtor sik leh bang kasyemtor sik khana ram kha asuk manhmang pha akahrung tor sik mi inkhat ke’n kajong, tâk tûte inkhat hmutor mak eng.

³¹Khava jâra kei hnuk natna kha anchunga kamathlâk sik, anṭōnse tlo jâra hmei kapōa karo manhmang sik hei.” Chunghnung RŌNGPU’n ahri jo.