Read Komrem EZEKIEL 24 Bible Online

EZEKIEL 24 - Komrem bible

EZEKIEL 24

¹Keini rehring sura kan-omna kum 9, thla 10, ni 10 atluk ning RŌNGPU’n kahnenga ahri.

²Ama’n ati, “Akathithei mihring, tuning kanikhō hi mazet roh, ajârchu Babylon reng in Jerusalem akake khum sik kha tuning kae.

³Rahe kase kamihei hneng Chunghnung RŌNGPU ke’n hiva tekhing kanei hi hripek hei roh: Bephu kha hmei chunga da ruh tui mansip phet ruh.

⁴Akaṭhapen hmeravōi kha thlâk ruh — Arakō leh adâr hei kha, kadeisōt aru he’m thlâk ruh.

⁵Kemōng kaṭhapen hme kha hmang ruh; bephu thōia thing ti ruh tui kha chōr jo rasoh; sharu leh hmeravōi kha machōr hei ruh.”

⁶Hivahi Chunghnung RŌNGPU’n ahri kae: “Mikathat-hei khōpui inhmang jo. Khavakha sôp mantheng loa thir-ek kabek bephu kapō kae. Hmetlang inkha-khat inlosōt a heite inkhatbek um om mak jo.

⁷Khōpui shunga mithatna ka-om, tâk vuibō tamakhu torna raleichunga khan chu thisen kha inthek inchai mak; khavakha hlung inkekpet chunga inthek a kae.

⁸Thisen kha a’nthupthei makna hmun, hnuknat a phuhlō arangei sik hmun a khan kada.

⁹Hivahi Chunghnung RŌNGPU’n ahri kha kae: “Mi thatna khōpui kha inhmang jo! Kei khet in hmeia ti sik thing kaheibuk sik jo.

¹⁰Thing heichoisa ruh! Hmeimale kha jâp ruh! Hme kha sōng ruh! Hme antui kha mankang ruh! Sharu hei mankâng hei ruh!

¹¹Tûnchu sum-êng bephu kha rahe chunga manchōng ruh khavakha lum sona hongsen jo rasoh. Khava sōa thir-ek kabek rakip akânghlon sōa beklanga hong intheng sik jo,

¹²thir-ek rakip hmeimalea akâng manhmang mak jo tâk inum.

¹³Jerusalem, jông leh kîk omchen khan nang amanbōk jo che. Ke’n mantheng sik chea karei inum, nang kabōk a ka-om injôn che. Nang hi kei hnuk natna ratha inhnak kha namanhret mak hma seng chu intheng mak jo tin che.

¹⁴Chunghnung RŌNGPU ke’n kahri jo kae. Kei sik a ṭōn tlona sik pha kha kajōng jo. Nasetna kha donlo om mak ning lungset rônmak che ning khana lungkhamna neimak che ning. Naṭōntlo jâra karâkna pek sik che kae.” Chunghnung RŌNGPU’n ahri jo.

¹⁵RŌNGPU’n kahnenga ahri.

¹⁶Ama’n ati, “Akathithei mihring, nang in nalungsetpen mi kha vōi khat rachâkna rōk a ke’n kalosōt sik kae. Nang inphin mak roh, ṭap mak roh khana rōithli huimak roh.

¹⁷Ṭap a na-innuk sutsutna kha mi manthei mak hei roh. Ṭajai suina mêrchîkna nalu voa a-emak leh kekōk kasea lônmak roh. Nahmai makhu mak roh khana ṭajai kasui hei thlai kha sâk mak roh.”

¹⁸Ke’n jîngkâr hmatak mihei leh le’nbek ung. Khava khōhleia kanuhmei kathi jo, ajîng kania kahnenga mantheina eng kapōa kaleitlo jo.

¹⁹Mihe’n ander eng, “Heisa mo hinga natlo?”

²⁰Khava jâra ke’n anhnenga kahri, “RŌNGPU’n kahnenga ahri khana amanthei eng,

²¹hiva ṭong hi nangni Israelhei hneng hripekna sik a: Bek-inn ratha neina chunga nangni inlensak chei. Nangni’n khavakha nan-enhnōm khana nanvaphâk hnōm, tâk RŌNGPU’n khavakha amanbōk sik. Khana Jerusalema ka-om nan-innshunga khangdônghei kha re shunga that sik hei kae.

²²Khava sōa kei tatlo kha nangni’n nantlo sik jo. Nanhmai makhu mak jo tin chei khana ṭajai kasui hei thlai kha sâk mak jo tin chei.

²³Nanlu vomak jo tin chei khana kekōk kasea lônmak tin chei khana ṭajai suimak tin chei khana ṭap mak jo tin chei.

²⁴Khava sōa kei hi nangnihei mêrchîkna kachang sik jo eng; kei tatlo rakip nantlo sik jo. RŌNGPU’n ati, hivahi asōk pha, kei hi Chunghnung RŌNGPU eng kae tia nanhong manhret sik jo eng.”

²⁵RŌNGPU’n ati, “Tûnchu mihringsa, anmani inlensakna leh hōina, anmani’n anta-enhnōm, antaphâk hnōm Bek-inn kahnet kha kalosōt sik jo. Khana ansapa leh ansanuhei kalosōt sik jo hei.

²⁶Hivahi katlo ning khan chu, insuk inhmangna inphut akatlânsōt tu inkhat in kahong sik heia kha hiva chungchânga anhri pek sik jo che.

²⁷Khava ning bât khan ale’nhmang jo ṭong hritheina ratha kha nachen sik jo, khana ama leh inbek sik che. Hing’hin nang kha mihei hnenga mêrchîkna kachang sik che, khana anmani’n kei hi RŌNGPU eng kae tia anmanhret sik eng.”