Read Komrem EZEKIEL 25 Bible Online

EZEKIEL 25 - Komrem bible

EZEKIEL 25

¹RŌNGPU’n kahnenga ahri.

²Ama’n ati, “Akathithei mihring, Ammon demna ṭong sân roh.

³Chunghnung RŌNGPU kei ṭonghri hi anrangeina sik a manthei hei roh: nangni’n kabek-inn kabōk kha nan-enhnōm, a’nsuk inhmang jo Israel ram kha nan-enhnōm, Judah mihei rehring sura akase hei kha nan-enhnōm.

⁴Ajârchu nangni inpâk chei, nisō intong nêrdiram a jât-hei kha rea kamantor sik chei. Nanram shunga anmani rephōr anmatung sik khana ka-om sik hei. Nangnihei chen, theikara leh sene kha anmani’n ansâk an-in sik jo.

⁵Ke’n Rabbah khōpui kha sharîngsei khemna kasyem sik, khana Ammon ram pumpui kemōng khemna kasyem sik, kei hi RŌNGPU eng kae tia nanmanhretna sik enga kae.

⁶“Hivahi Chunghnung RŌNGPU’n ahri kha kae: Nangni nankut nankaben khana inpâk inchôm chei. Nangni Israel ram chu donmak chei.

⁷Khanga nantlo jâra, nankachom sik leh nankasukset sik jât-hei kut a kapek sōt sik chei. Nangni jât inkhat nanchang makna sik khana nanram khet nannei makna sik a pui katluk a kamanhmang sik jo chei. Khava sōa kei hi RŌNGPU eng kae tia nanhong manhret sik jo eng.”

⁸Chunghnung RŌNGPU’n ati, “Moab in Judah hi jât ralak-hei kapō kae ati jo,

⁹ke’n Moab ramri kahrunga ka-om khōpuihei kha kaman buhlu sik hei, khōpui kaṭhapepen hei inveina — Beth Jeshimoth, Baal Meon leh Kiriathaim hei seng kha.

¹⁰Moab kha jât khat achang makna sik a, Ammon leh inṭhōia nisōtinga nêrdiram a jât-hei khan kamanhlō sik hei.

¹¹Ke’n Moab kha karâkna kapek sik, khana anmani’n kei hi RŌNGPU eng kae ti anmanhret sik eng.”

¹²Chunghnung RŌNGPU’n ahri, “Edom mihe’n Judah chunga êngsettak a phuhlōna annei jo, khava phuhlō khan Edom chunga ṭhena kasôttak a amannei jo.

¹³Tûnchu Edom chunga karâkna sik a khana ashunga aka-om mihring leh ran rakip that sik a kaphôngsōt jo. Teman khōpuia inphut Dedan khōpui katlung kaman ramsō sik, khana mipuihei kha re shunga that sik hei kae.

¹⁴Kei sik a kami Israel he’n Edom chunga phuhlōna annei sik, khana Edom hnenga kahnuknat inhnak kha anmanhmu sik hei. Khavakha kei hnuknat a phuhlōna kae tia Edom in amanhret sik.” Chunghnung RŌNGPU’n ahri jo.

¹⁵Chunghnung RŌNGPU’n ati, “Philisti he’n êng kasetak a kumsôt a an-inrepuihei chunga phu anhlō jo khana mater tak a ansuk manhmang jo hei.

¹⁶Khava jâra ke’n Philistihei chunga kabuhlu sik hei tia kaphôngsōt jo khana kaman ramsō sik hei. Philisti Phaichama akahringa alaka-om mi rakip kasuk manhmang sik hei kae.

¹⁷Ke’n inhnaktak a karâkna kapek sik hei khana pui katluk a phuhlōna kanei sik hei. Kahnuknat kha anmanhret sik. Khava sōa anmani’n kei RŌNGPU eng kae tia anmanhret sik eng.”