Read Komrem EZEKIEL 27 Bible Online

EZEKIEL 27 - Komrem bible

EZEKIEL 27

¹RŌNGPU’n kei hneng ahri,

²“Akathithei mihring, tûnchu Tyre chungchânga ṭajai suina hla sak roh,

³khava tuipui panga aka-om khōpui khana tuipui panga aka-om mi rakip hei leh inveina katlo khōpui kha. Akahrat Chunghnung RŌNGPU’N heimo ati kha hripek roh: “Tyre pui katluk a nathat jâra inlensak che.

⁴Na-inn kha tui-ôngpui kae. Nakasyem he’n rakōng kaṭhatak inkhat kapōa ansyem che;

⁵Thingpum sik a Hermon tlânga hmeila anhmang Khana nachunga kacho sik a Lebanona cedar anvalo.

⁶Tui jâpna makhe sik a Bashana sasōhei anvalo ashunga a’npha thingpek kha Cyprus a hmeila anvalo khava chunga saiha vânga aret ansyem anhem rabek.

⁷Narakōng chunga pōnzâr kha rōipōn innem vânga ansyem Egypt a ret kabek rōipōn vânga, Narakōng chunga pōnlek kha akaṭhapen pōn vânga, Cyprus tui takake khuma pōn sendup vânga ansyem.

⁸Nakatôr hei kha Sidon leh Arvad khōpui mihei kae. Nami kathemhei kha rakōng katôr inṭang hei.

⁹Rakōng kasui kut kathemhei kha Biblos a kaṭhadek a inthemchûk mihei kae. Tuipuia akasele rakōng katôrhei kha nang neinâk jâra an-innheia khan invei antloa kae.

¹⁰“Naremihei kâra Persia, Lidya, khana Libya remihei inveisa hei. Anmani’n anpho leh anlukhu hei kha narekur banga anmakhei hei. Anmani kha nang sik lûrna ahei karôn sōt hei kae.

¹¹Arvad remi he’n nabang kha anhrung, khana Gamad mihe’n na-inn inshâng hei kha anhrung. Anmani’n anpho hei kha banga anmakhei hei. Nahme ṭhatna katlohei kha anmani kha kae.

¹²“Nang in Spaina inveina natloa dangka, thir, tin, leh ngen hei kha nang neinâk katamtak hei leh nathleng hei.

¹³Nang in Greek, Tubal, Meshech heia invei natlo, khana naneinâk hei kha sōk leh sum-êng neinâk chenna sik a najōr hei.

¹⁴Nang in naneinâk hei kha Beth Togarmath a khō kangna shakor, re shakor, shakor kasinhei chenna sik a najōr hei.

¹⁵Rhode a mihe’n nang leh inveina antlo; tuipui panga aka-om mi katamtak in naneinâk leh thleng sik a saiha leh thing kadup anpek che.

¹⁶Syria mihe’n naneinâk jōrhei leh nankutsyem hei kha anrachôk. Anmani’n nahmangchâk hei leh thleng sik a hlung mankatam, pōn sendup, antakhông pōn, pōn innem, sōkse hok, khana rubi hlunghei anpek che.

¹⁷Judah leh Israel he’n naneinâk thlengna gehu, khōihning, olive thai, khana marim katui anpek che.

¹⁸Damascus mihe’n naneinâk leh nankut-them neinâk anrachôk, khava sik a Helbona ju leh Sahara shahme anpek che. Naneinâk hei leh thir kaphok leh marim katui anthleng hei.

²⁰Dedan mihei khan naneinâk kha shakor chōngna sapher leh anthleng.

²¹Arab-hei leh Cedar ram a vaikarôn he’n naneinâk leh kemōngte, kemōng leh ke vânga anthleng.

²²Sheba leh Raamah invei katlo he’n naneinâk kha sum-êng, sana khana marim katui akaṭhapen hei leh anthleng.

²³Haran, Canneh, Eden, Sheba, Asshur, leh Chilmad khōpuia revei katlo he’n nang leh inveina antlo et.

²⁴Anmani’n ret syemna pōn, pōn sendup, ret rabek jo pōn, akavâr liplep lâr a a’nsyem kapher, kaṭhadek a a’npher hrui leh thirhrui hei nahnenga anjōr hei.

²⁵Na-inveina neinâk-hei kha akalenpen rakōng heia anrôn hei. “Nang kha karōi kahrik a akarôn, tuipuia rakōng inkhat napō jo.

²⁶Nang rakōng katôr he’n tuipuiting anṭhōisōt che pha, Nisōtinga thli khan raleia inphut kahlatak a asukpek jo chea tui shunga avûrsi jo che.

²⁷Na-invei tlona nakarōi rakip, Narakōng katôr heirakip, Narakōng kasui kut kathemhei leh inveina neinâk-hei, rakōng shunga remi rakip, Heirakip, tuipui shunga inhmang jo Narakōng kha tui shunga akachûm jo pha khan.

²⁸Tui shunga akatla remihei kapeng rasa khan, tuipanga ahong kathônga kae.

²⁹“Rakōng rakip andahlon jo hei, rakōng katôr rakip tuipangting kake jo hei.

³⁰Nang sik a ankhenga ṭajai ansui jo, Anlua vaiphin anphia ravut kâra inkhōn lele jo hei.

³¹Nang sik a anlu anvo jo Borapōn an-insia kae. Anṭap lôtna anmalung kanasō jo.

³²Nang sik a ṭajai suina hla ansak: ‘Tyre kha tu leh mo nitepui sik, Tuipui shunga tûnchu Tyre kha sip ati jo mo?

³³Tuipui chunga na-inveina neinâk-hei ansesōt pha, Jât rakip hei tamadu kha namathlung pek hei. Renghei namanhao hei Nang neinâk vâng rōk heia khan.

³⁴Nang tûnchu tuipui shunga kakōi inhlut jo che; Tui-ôngpui inthûkna kakōia achûm jo che. Naneinâk leh nang sik a ṭōnkatlo rakip hei Tuipui shunga nang leh inhmangsap jo chei.’

³⁵“Navângset jâra khan tuipui panga ka-om mi rakip anmalung atôn. Anrenghei kapha kaṭi jo hei, khana anhmaia khan anṭitna kha anmalâr.

³⁶Nang kase jo che, ahei tik a sik a kase jo che, raleichunga invei katlo rakip kaṭisō jo hei, nang mahâmset kha anchunga katla sik tia ṭitna annei jo.”