Read Komrem EZEKIEL 28 Bible Online

EZEKIEL 28 - Komrem bible

EZEKIEL 28

¹RŌNGPU’n kei hneng ahri.

²Ama’n ati, “Akathithei mihring, Chunghnung RŌNGPU ke’n ahnenga kahri hi Tyre vaikarôn hneng hripek roh: inlensakna’n pui katluk che, nang in pathen eng kae nati. Pathen kapōa reng in-ongna in-ong eng khan chu tuipui in akatōm eng nati. Pathen inhlemsak thei che, tâk-kha changmak, nang akathithei mihring hrep che kae, Pathen changmak che.

³Daniel kanek a akasinga indon che, nahnenga a’nthupthei om mak nati.

⁴Nang singna leh nathemna khan sana leh dangka karōi nabuk a amanhao che.

⁵Kaliptak a invei natloa, hnemna naneiṭhak a kae. Nakarōi jâra heituk a a’nlensak jo che mo!

⁶“Tûnchu hivahi Chunghnung RŌNGPU’n kahri kha kae: Nang in pathen kapōa kasing jo eng tia na’ndon jâra,

⁷ke’n akaṭhamakpen inrepui nang kabuhlu sik kaheiṭhōi sik hei. Nang themna leh nang singna vânga nahmuhei akaṭha neinâk rakip anman hmangsō sik jo.

⁸Anmani’n anthat sik che khana tui kâra tuithlân shunga anhre sik che.

⁹Nang kathat sik a anhong pha, pathen eng nalatiṭhak sik mo? Nang kathat sik hei kha naratō hei pha, nang akathithei kachang sik jo che, pathen chang hêrmak tin che.

¹⁰Khōvel ram hlop mihei kut chunga nang ui kapōa kathi sik che. Chunghnung RŌNGPU ke’n ṭong kapek jo kae.”

¹¹RŌNGPU’n kahnenga ahri nôk.

¹²Ama’n ati, “Akathithei mihring, Tyre rengpa chunga vângsetna akatlung sik jâra malung inrenga om roh. Chunghnung RŌNGPU ke’n kahri hi ahnenga manthei roh: Pha khat a nang hi pui katluk tekhing inkhat leikachang che. Heituk a akasing leh hme kaṭha aleikachang che mo!

¹³Pathen rahōn Eden a ka-om che, hlung mankatam hei seng vânga invon che: rubi, mukta, topaz, beryl, carnelian leh jasper hlunghei; sapphir, emerald, garnet hlunghei. Sanaret hei naneihei. Nang na-insyem ning khan nang sik a hihei hi ansyempek jo che.

¹⁴Khana khan ṭit ka-om tak ngeva nang kahrung sik kada. Nang in katlang intheng chunga ka-om chea akadi rik-rak simvârhei kâra kaleng che.

¹⁵Nang na’nsyem bia inphut na-omchen pui katluk, ṭhatmak kha natlo manphut mak lai seng.

¹⁶Neinâk jōr leh rachôkna naṭōn kachin che, hivahin rahe setna leh setna tlonating akei manhlut che. Khava jâra katlang intheng nadahlona sik a rumhrat katlo, khana nang kahrunga inṭang ngeva khan akadi rik-rak simvâr heia inphut ahnong sōt jo che.

¹⁷Nahmeṭhat jâra inlensak che, rahming inthangna khan akamo kapōa ṭōn amantlo che. Hiva jâra hin ke’n raleichunga kanam mathlâk che khana reng ralak-hei sik a gîkna inkhat a kada che.

¹⁸Nang in rachôkna leh jōrna ṭōn natlona khan khava ṭhatmak kha natloa nang kamukna hmunhei kha kabōk jo hei. Khava jâra ke’n khōpuia hmei karo jo, ralei katlunga kakâng jo. Nang ka-en rakip in ravut changna katlunga nakângsō kha anhmu che.

¹⁹Nang kase jo che, ahei tik a sik a kase jo che, khana jât rakip nang inhret hei kha kaṭi jo hei, khana navângset kha anmani’m anchen khâk sik tia anṭit a kae.”

²⁰RŌNGPU’n kahnenga ahri,

²¹“Akathithei mihring, Sidon khōpui kha dem roh.

²²Khana ka-om mihei kha anchungchânga Chunghnung RŌNGPU ke’n kahri hi manthei hei roh: Kei nang kadōi eng kae, Sidon; nahnenga ṭōn hi katlo sik jâra mipui he’n anchoi ka-ân sik eng. Nashunga aka-om hei kha karâkna kapek heia heituk a a’ntheng eng mo ti kha kamalâr pha, anmani he’n kei RŌNGPU eng kae tia anmanhret sik jo eng.

²³Ke’n nachunga hrise kajōngtir sik khana nahlam dunga thisen kaman lōng sik. Ramkei rakip a inphut anbuhlu sik che, khana namihei anthat sik hei. Khana nang in kei hi RŌNGPU eng kae tia namanhret sik eng.”

²⁴RŌNGPU’n ati, “Israel chunga hnōisetak a akatlo akimvea ka-om jât inkhatbek in Israel kasukset sik a rahling leh rahlingbuk chang hêrmak jo hei ning. Anmani’n kei hi Chunghnung RŌNGPU eng kae tia anmanhret sik jo eng.

²⁵RŌNGPU’n ati, “Ke’n Israelhei akimvea jât-hei hneng kachai kathekna heia inphut kaheiṭhōi male sik hei, khana jât rakip in kei hi Chunghnung RŌNGPU eng kae ti hi anmanhret sik eng.”

²⁶Anmani khana khan inhuksōt a ka-om sik hei. Inn ansak sik khana vomhrui rahōn ansyem sik jo. Anmani hnenga êng kasetak a aleikatlo insak inthlâng hei kha karâkna kapek sik hei, khana Israel kha inhukna achen sik. Khava sōa kei hi RŌNGPU eng kae tia anmanhret sik jo eng.”