Read Komrem EZEKIEL 29 Bible Online

EZEKIEL 29 - Komrem bible

EZEKIEL 29

¹Rehring sura kan-omna kum 10, thla 10 a kani 12 tluk ning RŌNGPU’n kahnenga ṭong ahri.

²Ama’n ati, “Akathithei mihring, Egypt reng dōina dem roh. Ama leh Egypt ram pumpui heikhonga mo karâk sik ahnenga manthei roh.

³Hivahi Chunghnung RŌNGPU’n Egypt reng hnenga ahri kae tia hripek roh: Kei nang kadōi eng kae, tuia akaje Ole kalenpa, nang. Nile tuidung hi nang ta’nsyem nata kae nati.

⁴Nakadanga kōikim vâng kakhit sik che khana natuidunga ngahei kha nahnenga kahnet a kamankop sik hei.

⁵Nang leh nga rakip kha nêrdiram a kahlon kathek sik chei. Nakalōng kha raleichunga katla sik khana hreloa dahlon sik kae. Khavakha vahei leh shahei tasâk sik a kapek sik hei.

⁶Khava sōa Egypt a ka-om mi rakip in kei hi RŌNGPU kae tia anmanhret sik eng.” RŌNGPU’n ati, “Israel he’n nangni Egypt hei inthōpuina anchen sik tia inngaina annei chei, tâk-kha nangni akangarmak sung inkhat kanek a ṭhadek mak chei.

⁷Anmani’n nang hneng anhong in-ngai pha, nang katlek jo che, anmani bân kha nasuntan pek hei, khana ankhôn kha namaher pek hei.

⁸Tûnchu, Chunghnung RŌNGPU ke’n kamanthei che hi kae, khachu ke’n nang chemjâm vânga nakabuhlu sik a remi rup kajongsōt sik hei

⁹Egypt hi akarōksai hleiram kamanchang sik. Khava sō leh kei hi RŌNGPU eng kae tia namanhret sik jo eng. “Ajârchu nang in Nile tuidung hi nangta kae, nang tasyem kae nati.

¹⁰Kei hi nang kadōi eng kae khana Nile jâra inrepui eng kae. Ke’n Egypt pumpui akarōksai hleichia kasyem sik, sak tinga Migdol khōpuia inphut thlang tinga Aswan khōpui katlung, Ethiopia hei ramri sena hlam rakip.

¹¹Khava shunga khan mihring leh sha inkhatbek lônmak ning. Kum 40 khana khan heite om mak ning.

¹²Egypt hi raleichunga a’nhmang ram kakhôkpen inkhat a kasyem sik. Ajârchu kum 40 inhmanga ka-om sik a kae, khōpui ralak-hei kanek a a’nhmang kha inhnak sik. Egypt mihei kha re kamantlân sik hei. Ram rakip a anmani katlân sik hei khana mihlop jât-hei kâra vaka-om sik hei.”

¹³Chunghnung RŌNGPU’n ahri, “Kum 40 sō leh ke’n Egypt hei kha jât ralak-hei kâra kaleichai heia inphut kaheiṭhōi male sik hei,

¹⁴khana ke’n anmani anleiomna hma kakeipen, Egypt thlang intongting kaman om sik hei, khana khan akadôp rengram kachang sik hei,

¹⁵rengram kadôp pen kachang sik hei, anmani’n jât-hlop hei chunga vai rôn nôk hêrmak hei ning. Ke’n anmani apui karônmak tak a kasyem sik jo hei, anmani’n jât ralak inkhatbek anmani lungdoa manse tor mak hei ning.

¹⁶Israel in inthōpuina sik a anhnenga inhngana nei hêrmak jo hei ning. Egypt mahâmsetna khan, Israel in Egypt hei hneng inhngana anta leinei kha heituk a akadik mak jo mo tia mandonsōtna amannei sik hei. Khana Israel in kei hi RŌNGPU eng kae tia amanhret sik jo eng.”

¹⁷Keini rehringa sura kan-omna kum 27 tlukna, thla hmakakeia kani hma-inkei ning RŌNGPU’n kahnenga ṭong ajōng hri.

¹⁸Ama’n ati, “Akathithei mihring, Babylon Reng Nebuchadnezzar in Tyre chunga re atlo jo. Ama’n aremihei kha neinâk kahrik amanrôn heia anlu hei kapha kakeksō jo khana andâr hei kha kangōi dâk jo hei, tâk-kha reng leh aremihei kha khōdengthei anthōkna heite lachanmak heia kae.

¹⁹Khava jâra tûnchu Chunghnung RŌNGPU’n kahri kae: Egypt ram kha Reng Nebuchadnezzar kut a kapek sik jo. Ama’n khavakha asuk khōia achom sik jo khana Egypt karōi rakip aremihei tahlō sik a achoipet sik jo.

²⁰Ke’n ahnenga Egypt hi aṭōn leitlona jâra kapek sik, ajârchu aremi he’n kei sik a ṭōn anleitlo. Chunghnung RŌNGPU ke’n kahri jo kae.

²¹“Khavakha asōk pha, Israel mipuihei ratha kamanngar pek sik hei khana Ezekiel, nang kare kha mi rakip in antheina sik hmun a, anmani’n kei RŌNGPU eng kae tia anmanhretna sik eng, ṭong kamanhri sik jo che.”