Read Komrem EZEKIEL 3 Bible Online

EZEKIEL 3 - Komrem bible

EZEKIEL 3

¹Pathen in ahri, “Akathithei mihring, hiva a’nze hi saroh; khava sō leh se ina Israel mipuihei hneng vahri roh.”

²Khava jâra kabei ka-âng enga ama’n a’nze kha sâk sik a ahei pek eng.

³Ama’n ahri, “Akathithei mihring, nahnenga kapek che a’nze kha sâk roh; navon mankhopna roh.” Ke’n a’nze kha kasâk jo, khavakha khōihning kapōa kathlum.

⁴Khava sōa Pathen in ahri, “Akathithei mihring, Israel mipuihei hneng se roh, hri sik a kamanthei che rakip kha anhnenga vahri jo roh.

⁵Jât-hlop, ṭong intak kajôm hei hnenga katir che changmak, Israelhei hnenga kae.

⁶Jât kalenhei, nang in namanhret mak ṭong intak kajôm hei hneng katir che’nchu, naṭong anleirangei sik.

⁷Tâk-kha Israel mi tûte inkhat in rangei hnōm mak hei ning; kei ṭong um donmak hei ning. Anmani ankhenga rahe kasehei leh ṭong inngeimak hei kae.

⁸Tûn ke’n nang anmani kapōa narahe kamanset chea nahmai kamanngar pek sik che kae.

⁹Nang hlungpui kapōa kahnet a kasyem sik che, khana hira-mukta kapōa kamanngar sik che; sova rahe kasehei so ṭitmak hei roh.”

¹⁰Pathen in ahri manjōm a, “Akathithei mihring, ke’n nahnenga kahri rakip hei hi malung kahlut a rangei roh khana mandon hei roh.

¹¹Khava sōa naram mi rehringa antasurhei hneng se roh, nang anrangei che’num, anrangei mak che’num, Chunghnung RŌNGPU ke’n anhnenga kahri hi vamanthei hei roh.”

¹²Khava pha Pathen rathla’n akadom eng, khana kakahnung ting kare inshângtak rasa kathei, “Marvân chunga RŌNGPU lûrna kha choi manshâng ruh!”

¹³Bōirōk a ranhringhei mathla khat leh khat intôn rasa, khana lingnu innok kapōa gâri chaka a’nlik rasa kha katheia kae.

¹⁴RŌNGPU rathla kha kachunga ratha kaneitak a jōng kachōng, khana ama rathla khan aṭhōisōt jo eng pha, hōimo kathei hêra kahnuk leikana.

¹⁵Khava jâra kei Chebar Tuidung panga Tel Abib khōa rehring sura ka-om hei hneng kase eng, khana khan kaleihmu leh kalei thei hei khan aniṭhōi enga ni 7 leika-om jo eng.

¹⁶Ni 7 athlengsōa RŌNGPU’n kahnenga ahri.

¹⁷“Akathithei mihring, Israel mihei sik a kot kahngâk kamanchang jo che. Ke’n kapek che gîkna kha anmani hneng ṭong namathlung sik kae.

¹⁸Ke’n mikaṭhamak inkhat akathi sik a kaphôngsōt pha, ama kha ahringkhō hukna sik a ahlam hro thlengtheina sik a gîkna kha napek mak inchu, aset pum a ama kha kathi sik jo, khan chu ama thina jâra nang themmô kamanchen sik che.

¹⁹Mikaṭhamak kha gîkna napek a asetna kha abângmak inchu, ama kathi sik jo, tâk nang hringkhō chu ṭhensōt sik kae.

²⁰“Mikaṭha inkhat in ṭōnse tlo aphut inchu khana inrimna shunga ke’n kada’nchu, ama kha nang in gîkna napek mak inchu kathi sik jo. Ama kha asetna jâra kathi sik jo, ama taleitlo akaṭha kha ke’n mandonsōt mak jo ning, khan chu ama thina jâra ke’n nang themmô kapek sik che.

²¹Ṭōndik katlo mi inkhat setna atlo makna sik a gîkna napek a nang ṭong arangeia setna atlo mak inchu, ama kahring sik jo, khana nang hringkhō kha’m ṭhensōt sik kae.”

²²RŌNGPU’n ratha kaneitak a a-om kha kamanhret khana kahnenga hinga ahri kha kathei, “Thōi roh, phaichamting se roh. Khava hmun a nahnenga ṭong kahri sik.”

²³Khava jâra phaichamting kase eng khava hmun a khan Chebar Tuidung panga kaleihmu kapōa, Pathen lûrna kha kahmu. Kahmai raleia kamakhup jo,

²⁴tâk-kha Pathen rathla’n kashunga kahlut a kakea amanngir eng. RŌNGPU’n kahnenga ahri, “Inna se roh, kot inkam khum ina om roh.

²⁵Akathithei mihring, nabinga hrui vânga inkhōp roh, khana nang mihei kâra akase mak sik che kae.

²⁶Hiva rahe kase mihei hi gîkna napek tor makna sik a namalei kha kamanthi sik.

²⁷Khava sōa, ke’n nahnenga ṭong kajōng hri nôk pha, ṭong theina ratha kapek che pha, Chunghnung RŌNGPU kei tahri seng kha anhnenga namanthei sik jo hei. Anmani ṭhahrep in anrangei sik, tâk ṭhahrep in adonmak hei ning. ajârchu anmani rahe kase jât-hei kae.”