Read Komrem EZEKIEL 30 Bible Online

EZEKIEL 30 - Komrem bible

EZEKIEL 30

¹RŌNGPU’n kahnenga avea ṭong ahri.

²Ama’n ati, “Akathithei mihring, Chunghnung RŌNGPU ke’n kahri ṭong hi sânsōt roh khana phôngsōt roh. Hiva ṭonghei hi ông pum a nahri sik kae: Ṭit ka-om kani kha kajōng jo!

³Kanikhō kha kahnai jo, RŌNGPU’n ṭōn atlosōtna sik pha kha. Jât-hei sik sumtuk jingna leh bōina kani kha kahnai jo.

⁴Egypt a re ka-om sik Khana Ethiopia a malung inrimna kakhôktak kasōk sik Egypt a mi katamtak anthat sik hei; Ram kha suk manset sik, khana suk manhmanga dahlon sik kae.

⁵“Khava re shunga Ethiopia, Lidya, Libya, Arabia, Kub remi antanêk hei leh kamihei kâr a’m kathi sik hei.”

⁶RŌNGPU’n ahri, “Sak tinga Migdol a inphut thlâng tinga Aswan katlunga ka-om Egypt kahrunghei kha re shunga kathisō sik hei. Egypt remi a’nlensak hei kha suk manhmang sik hei kae. Chunghnung RŌNGPU ke’n kahri jo.

⁷Ram kha raleichunga a’nram pen kachang sik, khana ama khōpuihei kha pui katluk set a sukset a dahlon sik hei kae.

⁸Egypt chunga ke’n hmei karo pha khana ama kahrung rakip anthisō pha, anmani’n kei RŌNGPU eng kae tia anmanhret sik jo eng.

⁹“Khava kani kha ahong pha khana Egypt kha a’nsuk inhmang pha, khanga akasōk sik a taksenna kaneimak Ethiopia mihei mathōna sik rakōng shunga ṭongkarôn mi katir sik hei. Khava ṭit ka-om tak kani kha kajōng jo!”

¹⁰Chunghnung RŌNGPU’n ahri, “Egypt karōi rakip manchaina sik a ke’n Babylona Reng Nebuchadnezzar kha kahmang sik.

¹¹Ama leh akaṭhamakpen aremihei kha hiva ram kasuk inhmang sik kaheiṭhōi sik hei. Anmani’n Egypt kha chemjâm vânga anbuhlu sik, khana ram shung kha mi kathi kalōng in kasip sik.

¹²Ke’n Nile tuidung kamankang sik khana Egypt kha mikaṭhamak-hei ratha neina thōia kada sik. Ram hlop mihe’n ram pumpui ansuk manset sik. RŌNGPU ke’n kahri jo kae.”

¹³Chunghnung RŌNGPU’n ahri, “Limhei leh Memphis a akadik mak pathenhei kha kaman hmangsō sik hei. Khana khan Egypt vai karôn sik a tûte om mak hei ning, khana ke’n mi rakip ṭit leh inpirna kapek sik hei.

¹⁴Egypt thlâng ting kha ramkarōk kamanchang sik khana sak tinga Zoan khōpui kha hmei vâng karo sik. Thebe hei reng-innpui kha karâkna kapek sik.

¹⁵Egypt ram a rekur kalen Pelusium khōpui kha kahnuk natna hin kamantôn sik hei. Thebe karōi kasuk manhmang sik.

¹⁶Ke’n Egypt ram karo sik khana Pelusium kha lungdonga kada sik. Thebe rapehei kakōi sik, khana khōpui kha tuikalen in akachûm sik.

¹⁷Heliopolis leh Bubastis khōpuia ka-om rether naihei rea kathi sik hei, khana mi ralak-hei kha rehringa ankei sik hei.

¹⁸Ke’n Egypt ratha neina kavōk mathlâk pha khana an-inlensakna ratha kha kamanchaisō pha, Tahpanhe chunga inthim in ahlō sik. Sumtuk in Egypt kha amakhu sik, khana akhōpui rakip rehringa anṭhōi sik jo hei.

¹⁹Hing’hin ke’n Egypt karâkna kapek pha, anmani’n kei hi RŌNGPU kae tia anmanhret sik jo eng.”

²⁰Keini rehringa kanva omna kum 11 tlukna thla hma inkeia ni 7 tluk ning, RŌNGPU’n kahnenga ṭong ajōng hri.

²¹Ama’n ati, “Akathithei mihring, Egypt rengpa bân kha ke’n kavōk mathlek jo. Khana akut damna sik leh chemjâm amatutor nôkna sik a tûte inkhat in pōnhar vânga khitpek mak hei.

²²Tûnchu, hivahi Chunghnung RŌNGPU ke’n kahri kha kae: kei Egypt reng kadōi jo eng kae. Ke’n ama kutbân 2 hrep kavōk mathlek pek sik, akaṭha kha leh akatleksa kha leh, khana chemjâm kha akut a inphut katla sik.

²³Ke’n Egypt mihei raleichunga kachai kathek sik hei.

²⁴Khana Babylon rengpa bân kha aratha kamanngar sik khana kei chemjâm kha akut chunga kapek sik jo. Tâk-kha Egypt bân khachu kamathlek pek sik, khana ama kadōihei hmaikunga inkōipuma kathi sik.

²⁵Kadik, ama kha tlâksamna kamannei sik khana Babylon reng chu kamanhrat sik. Ke’n kachemjâm kapek pha ama’n Egypt akhîng pha, mi rakip in kei hi RŌNGPU eng kae tia amanhret sik eng.

²⁶Ke’n Egypt hei kha raleichunga kachai kathek sik hei. Khava sō leh chu anmani’n kei RŌNGPU eng kae tia anmanhret sik jo eng.”