Read Komrem EZEKIEL 31 Bible Online

EZEKIEL 31 - Komrem bible

EZEKIEL 31

¹Rehring sura kanva omna kum 11, thla 3, ni khat chang ning RŌNGPU’n kahnenga ṭong ajōng hri.

²Ama’n ati, “Akathithei mihring, Egypt reng leh amihei seng hneng vahri roh: Heituk a ratha kanei che mo! Hei leh mo katekâk sik che?

³Nang chu Lebanona cedar kapō che kae. Abâk kaṭha leh abō inbur, Khang hrep a a’nshâng sumtuk-hei kaphâk tor thing kha.

⁴Khana khan akhangtouna sik tui ka-om, Khava veina sik a ralei shunga tui ka-om. Khahei khan thing hmôngna hmun kha tui anpek a kae. Ratu shunga kahmông thing rakip hneng kava tui ansempek hei.

⁵Khavakha tui kaṭhadek a a’npek jâra Thing ralak-hei kanek a inshângpena kakhanga kae. Abâk-hei kha’m kalen leh kasei heia kae.

⁶Khava bâk heia va jât rakip in rabu anchoma kae. Khava hnōia khan ramsha he’n te anneia kae; Raleichung jât he’n ahnōia châm inhnga heia kae.

⁷Heituk a akaṭha thingkung jo mo, Inshâng hêr, khangtuk a kasei abâk-hei kha leh. Arajung hei khan athōi inthûk shunga kava tui anphak a kae.

⁸Khavakha leh Pathen rahōn shunga cedar thing inkhat tethei changmak. Hmeila inkhat in khanga abâk neiphungmak. Thingkung ralak in khanga inbur phungmak. Pathen khet rahōn shunga khang hrep a akaṭha thing om mak.

⁹Abâk kamansyema ahme ṭhatna sik a kasyem. Hivahi Pathen rahōn, Eden a thing rakip hei thangsetna kha kae.

¹⁰“Tûnchu, khava sumtuk-hei katlunga akahmông jo thingkung chunga heimo akasōk sik kha Chunghnung RŌNGPU ke’n kamanthei sik chei. Ama kha a’nshâng chen a inlensak a kae;

¹¹khava jâra ama kha kadahlon jo khana ram hlop vaikarôn inkhat kamanchen sik jo. Ama khan khava thing kha aṭhat makna dungjuia rahōi kasōk kha apek sik jo.

¹²Akaṭhamak ram hlop mihe’n antuktan sik khana andahlon sik jo. Abâk-hei leh abō inbur akatleksō jo hei kha ram shunga tlâng leh phaicham rakip chunga katla sik. Adaihlim hnōia aleika-om jât rakip he’m kasesōt sik jo hei.

¹³Vahei kajōng sik heia kha akatlu jo thing chunga khan kachu sik hei, khana ramsha he’n abâk-hei chunga kalôn lele sik jo hei.

¹⁴Khang’khan tuna inphut tui kaṭhadek a anpek inum, khava kapōa thingkung inkhatbek avea hmông mak jo ning khana adôn kha sumtuk suntan mak jo ning, khava kapōa inshângmak jo ning. Ankhenga mihringsa kapōa in-ang jo hei, kathirama aka-om hei leh sap chang sik a inhmang jo hei.”

¹⁵Hivahi Chunghnung RŌNGPU tahri kha kae: “Khava thing khan kathirama ase ning, ralei thōia tui khan khavakha ṭajai suina mêrchîkna inkhat a kamantōmsō sik. Ke’n tuidung kha kamatu sik khana kava dunghei kha tui manlōngmak hei ning. Ajârchu thingkung kha kathi jo, Lebanon Tlâng kha inthim in kamanhlō sik khana ratu thingkung rakip kamanvōipet sik hei.

¹⁶Khavakha kathirama katir pha, ama thōi tlâkna rasa khan jât-hei amannok sik hei. Eden a thingkunghei, Lebanona tui chap thingkung akaṭhapen loihei, ralei thōia akahlut jo hei kha’n ama tlâksukna chunga inpâk sik jo hei.

¹⁷Khahei khan ama leh inthoia kathirama hmapena aleikatlasuk hei ka-ompui sap sik a kase sik jo hei. Khana ama thōia aka-om rakip in jât-hei kâra inchai kathek sik jo hei.

¹⁸“Thingkung kha Egypt hei rengpa leh amihei seng kae. Eden a thingkunghei kapha khanga enhnōm ka-om leh a’nshâng om mak hei. Tâk-kha tûnchu, Eden thingkung kapōa, kathirama akase sik jo kae, khana khōvelhei leh re shunga akathihei ka-ompui sap sik a ama kha’m kase sik jo. Ke’n kahrisōt jo kae,” tia Chunghnung RŌNGPU’n ati jo.