Read Komrem EZEKIEL 32 Bible Online

EZEKIEL 32 - Komrem bible

EZEKIEL 32

¹Rehring sur kanva omna kum 12 tlukna, thla 12 tlukna, kani hma-inkei ning, RŌNGPU’n kahnenga ṭong ajōng hri.

²Ama’n ati, “Akathithei mihring, Egypt reng hnenga gîkna inhnaktak vapek roh. Kahnenga inphut hiva ṭong hi pek roh: nang jât-hei kâra shabakkai kapōa ka-omchen che, tâk-kha nang tuidunga a’nlet vângvei Ole napō chet a kae. Nang in nake vâng tui kha namannim khana tuidung kha namanbōk a kae.

³Jât katamtak an-intûp pha, ke’n kalen vânga kakhum sik che khana tuipangting kakeisōt sik che.

⁴Raleichunga nang kahlon mathla sik che khana raleichunga va leh shahei kha nang kasâk sik a kaheiṭhōi sik jo hei.

⁵Tlâng leh phaicham chunga nataksa kathu khan kamakhusi sik.

⁶Nathisen kha tlâng leh kava dunghei asipsōmak kârseng kaman lōng sik.

⁷Ke’n kasuk manhmang ning che khan chu, thangvân kamakhu sik, ârsi he’m kalosōt sik jo hei. Kani khan sumtuk kahnunga inthup sik, khana thla khan vâr apek mak ning.

⁸Thangvân chunga vâr rakip kamanthimsō sik, khana naralei chung hi inthima kada sik. Chunghnung RŌNGPU ke’n kahri jo kae.

⁹“Nang in nathei phung hêrmak ram rakip a nang insuksetna ṭong kaphônglele pha khan jât katamtak in inrengna annei sik jo.

¹⁰Nang chunga kaṭōn tlona hin jât katamtak hei malung atôn sik. Ke’n kachem kha kakalek pha, renghei khan anṭit lôtna innok sik hei. Nang natlû ning khan, anhringkhō sik a anṭit a innok sik hei.”

¹¹Chunghnung RŌNGPU’n Egypt rengpa hnenga ati, “Nang in Babylon rengpa chemjâm naratō sik.”

¹²Rahe kase jât-hei remihei chemjâm kha kaman radoksōt sik hei khana nami rakip anthatsō sik hei. Na-inlensakna namihei leh naneinâk rakip suk manhmang sik hei kae.

¹³Tuidung pang rakip a ka-om naranhei kathatsō sik hei. Khana khan mihring leh ran inkhatbek tui innim sik a om mak jo hei ning.

¹⁴Natui kha mannok mak ning khana kaman theng sik khana natuidunghei kha yâm katia kalōng sik hei. Chunghnung RŌNGPU ke’n kahri jo kae.

¹⁵Ke’n Egypt kha ramkarōk a kasyema, khana aka-om rakip kathatsō hei pha, anmani’n kei hi RŌNGPU eng kae tia ani manhret sik jo.

¹⁶Hiva akakhôk tak gîkna hi ralûm dena hla kachang sik. Jât-hei nuhmei he’n Egypt leh ami rakip hei sik a hla hi ansak sik.” Chunghnung RŌNGPU ke’n kahri jo kae.”

¹⁷Keini rehring sura kanva omna kum 12, thla hma-inkei, kani 15 ning RŌNGPU’n kahnenga ṭong ahri.

¹⁸Ama’n ati, “Akathithei mihring, Egypt a mi rakip sik a ṭajai sui roh. Ratha kanei jât-hei leh inṭhōia kathirama tir jo hei roh.

¹⁹Anhnenga hinga hri roh: “Mi rakip kanek a nang nahme kaṭhapen tia a’nlo che mo? Nang kathi khōa kase sik jo che khōvelhei kâra kaje sik jo che.

²⁰“Egypt mihei kha re shunga akathi loihei kha leh ka-omsap sik jo hei. Anmani thatna sik a chemjâm intlukdek a ka-om jo.

²¹Akahratpen leh Egypt sik a re kathōk hei khan Egypt hei kha kathi khōa anleiralam sik hei. Anmani ka-ông sik hei: ‘Pathen kaneimak hei kha hinahin heikaṭumsuk jo hei, hinahin kaje jo hei!’ anti sik.

²²“Assyrianhei kha hin ka-om jo hei, akimvea hin anremihei thlânhei leh inṭhōia. Anmani hi re shunga thatsō hei kae,

²³anmani thlânkhur kha kathihei khō inthûkna pena ka-oma kae. Aremi rakip re shunga katlusō jo hei, khahei thlân khan amanu thlân kha ankakebit a kae. Pha khat a anmani hin akahring hei raleichung anlei mannok a kae.

²⁴“Elam khana khan ka-om, akimvea aremihei thlân leh inṭhōia. Anmani ankhenga re shunga that jo hei kae, kathi khōa khan vun tanloa kase inhlut jo hei. Hring lai anmani he’n ṭit leh inpirna anmasō, tâk tûnchu kathia ka-om jo hei khana hmesetna anchen jo.

²⁵Elam kha re shunga akathihei kâra kaje jo, aremihei thlân kha ama thlân kimvea ka-om pet hei. Anmani vun tanloa ankhenga thatsō jo hei kae. Hring lai shunga ṭit leh inpirna anmasō, tâk tûnchu kathi jo hei khana hmeset anchen jo, re shunga akathihei vângset anchenpui heia kae.

²⁶“Meshech leh Tubal khana khan ka-om hei, anremihei thlân khan ankakebit hei. Anmani vun tanloa re shunga thatsō jo hei kae.

²⁷Anmani kha tenlaia re kahrânghei hrena kapōa kajana pek mak hei, khahei khachu kathi khōa pui katluk a revon invon hei, anchemjâm kha anluthlōna andapek heia anphō hei khan antaksa chunga andapek hei.

²⁸“Khang’khan Egypt hei kha vun katanmak hei, re shunga akathihei kâra suk mannōi sik hei kae.

²⁹“Edom kha arenghei leh inṭhōia avaikarônhei leh khana khan ka-om. Anmani ratha kaneitak remihei kae, tâk tûnchu re shunga thatsō jo hei kae, kathi khōa aka-om hei leh kajesap jo hei.

³⁰“Sak tinga rengsa rakip khana khan ka-om hei, Sidon he’m ka-omsa hei. Anmani ratha neina khan ṭit-inpirna anleimasō, tâk tûnchu khava re shunga thatsō hei kha leh hme kasetak a kahlut jo hei khana châm inhnga jo hei. Kathi khōa akase jo hei hmesetna kha an chensap jo.

³¹“Re shunga akathihei anhmu hei pha Egypt rengpa leh aremihei lungngamna kha kae sik jo,” tia Chunghnung RŌNGPU’n ati.

³²“Ke’n Egypt rengpa kha akahring hei mannokna kamannei, tâk ama leh aremi rakip thatsō sik hei kae khana re shunga vun tanloa akathihei rakip leh châm inhnga sik jo hei.” Chunghnung RŌNGPU’n ahri jo.