Read Komrem EZEKIEL 33 Bible Online

EZEKIEL 33 - Komrem bible

EZEKIEL 33

¹RŌNGPU’n kahnenga ṭong ajōng hri.

²Ama’n ati, “Akathithei mihring, ram inkhat a ke’n re kamasō pha, heimo akasōk kha manthei hei roh. Khang khava ram he’n ankâra mi inkhat repa kahngâk a ankadeia kae.

³Ama khan inrepui he’n anhong kha ahmu pha, ama khan mi rakip gîkna sik a ka-ônga kae.

⁴Tu mo inkhat khan atheia an-inrinmak inchu inrepuihei kha kahong heia anthat a kae, kha achang inchu, ama thina kha abinga themmô pek sik kae.

⁵Ama thina kha abing ṭhena kae, ajârchu ama’n gîkna pekna kha leidon mak a kae. Ama’n aleidon inchu, ama aleikatlânsōt thei kae.

⁶Khana, repa kahngâkpa khan inrepui anhong kha ahmua, inrinna rasa a-ôngmak inchu, inrepui kahong sik heia kha setna karônhei kha anthat sik jo hei, tâk-kha anmani thina kha repa kahngâkpa ṭhena kamanchang sik kae.

⁷“Tûnchu, Akathithei mihring, Israel jât-hei sik a repa kahngâk kamanṭang jo che kae. Ke’n kapek che gîkna kha anhnenga namathlung sik kae.

⁸Ke’n setkarôn inkhat kathi sik jo tia gîkna kapek pha, ama hringkhō hukna sik a, amalung athlengna sik a, gîkna kha napek mak inchu, aset pum a kathi sik jo, kha achang inchu ama thina kha nang ṭhena kamanchang sik.

⁹Nang in mikaṭhamak gîkna napek a asetna ahaimak inchu, aset pum a kathi sik, tâk-kha nang hringkhō chu ṭhensōt sik kae.”

¹⁰RŌNGPU’n kahnenga ṭong ajōng hri. Ama’n ati, “Akathithei mihring, Israelhei ṭonghri kha avea anhnenga manthei hei roh: ‘Eini setna tlona leh dikmak nitlona khan niphur kahrik jo. Eini inhmang jo me. Heikhonga mo aka-om tor sik me?’ anti.

¹¹Manthei hei roh, kei hi Chunghnung RŌNGPU kachangkhet jâra, setna karônhei thina en-hnâm sik kha kahōi sakmak eng. Ansetnahei anbâng leh akahring sik hei kha ka-enhnōm. Israel, dikmak natlona kha hai jo roh. Heisa mo akathi hnōm che?

¹²“Tûnchu, mihringsa, Israelhei manthei hei roh, mikaṭha inkhat in setna atlo’nchu adikna vâng khan hringdek tor mak ning. Mikaṭhamak inkhat in akaṭhamak kha abâng inchu ama kha karâkna chenmak ning, khana mikaṭha khan setna atlo manphut inchu, ahringkhō kha inṭhensōt mak ning.

¹³Mikaṭha inkhat hnenga hringna pek sik a intepthei eng, tâk-kha ama’n aleikasesa phat a aṭhatna tloseng kha katluk jo atia setna atlo manphut inchu, ama’n akaṭha aleitloseng kha ke’n mandonsōt pek mak ning. Asetna jâra akathi sik kae.

¹⁴Mikaṭhamak inkhat kha athina sik a gîkna kapekthei, tâk-kha aset tlo kha abânga, akaṭha leh akadik atlo jo’nchu —

¹⁵tekhing, ama’n sêrthōia aleimasōna et a bandhan kha amale heia, aleichom seng kha apek male he’nchu, asetna tlo abânga, hringna kapek dân kha ajui inchu, ama thimak ning, akahring sik kae.

¹⁶Ama’n aleitlo setnahei kha karangei mandam sik, ama kahring sik ajârchu akaṭha leh akadik atlo joa kae.

¹⁷“Nanmi he’n kei tatlo hi dikmak anti. Kha changmak, anmani hlam jôk kha akadik mak kae.

¹⁸Mikadik inkhat in akaṭha tlo abâng jo’nchu khana ṭhatmak atlo manphut jo’nchu, khava sik a ama kathi sik.

¹⁹Mikaṭhamak inkhat in asetna tlo abâng inchu khana akaṭha leh akadik atlo jo’nchu, ama’n ahringkhō ahuk jo.

²⁰Tâk-kha Israel, nang inchu kei tatlo hi dikmak natia kae. Nang ṭōntlo vânga khan naṭong katan sik kae.”

²¹Keini rehringa sura kanva omna kum 12, thla 10, ni 5 tluk ning Jerusalema inphut akatlânsōt mi inkhat kahonga khōpui kha katlu jo tia ahri pek eng.

²²Ama ahong mak hma khōhleia khan ke’n RŌNGPU kahnenga ratha kasip a a-om kha kamanhret. Ajîng jîngkâra mipa kha ahong pha, RŌNGPU’n ṭong hritheina ratha kha apek male eng.

²³RŌNGPU’n kahnenga ahri.

²⁴Ama’n ati, “Akathithei mihring, Israel ram shunga a’nhmangthâm jo, khōpuia ka-om mihei hin anhri: ‘Abraham kha abing rōk a kae, tâk ram hingre aleipek. Eini chu katam jo me, khava jâra tûnchu ram hi nita kachang jo.’

²⁵“Chunghnung RŌNGPU kei ṭonghri hi manthei hei roh: Nangni’n hme kha thisen ashunga a-ompuma nansâk. Nangni’n limsyem nankamuk. Mi nanthat. Ram hi heikhonga mo nanram manchang sik a nantamandon?

²⁶Nanchemjâm nan-inngampui. Nanṭōn tlo hi mater ka-om chei. Mi rakip kajông chei. Ram hi heikhong inmo nanram manchang sik a nantamandon?

²⁷“Kei akahring khet Pathen kachang jâra a’nhmangthâm jo khōpuia aka-om hei kha thatsō sik hei kae tia Chunghnung RŌNGPU’n gîkna kapek hei hi manthei hei roh. Ram shunga aka-om hei kha ramsha he’n ansâksō sik hei. Tlâng chunga leh khur shunga a’nthup hei kha hrisea kathi sik hei.

²⁸Ram kha ramkarōksaia kada sik, khana anratha neina an-inlensakna kha’m kamanchai sik jo. Israelhei tlânghei kha ramse kachang sik a kha tûte inkhat petan tor mak hei ning.

²⁹Ke’n mihei kha ansetna jâra karâkna kapek heia, anram kha akarōksaia kada pha khan, anmani’n kei RŌNGPU eng kae tia anmanhret sik jo eng.”

³⁰RŌNGPU’n ahri, “Akathithei mihring, nami he’n nang khōpui bang rakira achangmak leh an-inn kekot hnenga anratō che pha nang chungchânga inbek heia kae. Anmani khat leh khat inbek heia, ‘Tûnhin RŌNGPU a inphut hei ṭong mo akahong sik tâk, se me sona varangei rih.’

³¹Khana nang in heimo nahri sik antia ṭong inngei sik mi katamtak kahong hei, tâk-kha nang in tlo ruh nati hei khachu heite tlomak hei. Anbeia chu lungset ṭong anhri, tâk-kha an-inphâmna leh anhnemna jong khachu bângmak hei.

³²Anmani hnenga chu nang kha indinu hla, lungsetna leh maritna hla kathem kasak leh serângdâr inhringpa ka-ang jo che. Naṭong hri rakip anrangei tâk-kha sangkhat bek um juimak hei.

³³Tâk-kha naṭong hri seng kha ahongdik jo pha, khahei seng kha adik jo pha, ankâra sânkathem ka-om nâk hi tia anhong manhret sik jo.”