Read Komrem EZEKIEL 34 Bible Online

EZEKIEL 34 - Komrem bible

EZEKIEL 34

¹RŌNGPU’n kahnenga ṭong ahri.

²Ama’n ati, “Akathithei mihring, Israel hlamkakeihei dōina ṭonghri roh. Anhnenga ṭongsân hri roh, Chunghnung RŌNGPU ke’n anhnenga kahri hi manthei hei roh: nangni inhmang jo chei, Israel kemōng kakhem nangni! Nanbinga in-en kaṭha chei, kemōnghei chu khemmak chei.

³Nangni’n kemōng ne chu nan-in, shahmepōn nansi, akathaipen kemōng nanthat a nansâk. Tâk-kha kemōng chu khem hêr mak chei.

⁴Nangni’n akatlasam hei kha ensui mak chei, akanahei enmandam mak chei, taksa intôn hei kha katōm pek mak hei chei, a’nhmanghei kha jongmak hei chei. Khava kanek a hnuk kasetak a nanrazen hei.

⁵Kemōnghei kha ankakhem sik an-om mak jo jâra, inchek jo hei, ramsha he’n anthat heia ansâk jo hei.

⁶Khava jâra kakemōnghei kha tlâng leh bung inshânga kalôn lele jo hei. Raleichunga inchai katheksō jo hei, tûte inkhat in jongmak hei, ajongna sik a’m tlomak hei.

⁷“Tûnchu, kemōng kakhem nangni, RŌNGPU kei tahri hi rangei ruh.

⁸Kei akahring khet Pathen kachang jâra, kaṭong nanta rangeia kaṭha sik. Kakemōnghei kha ankakhem a-om mak jâra, ramsha he’n anhlō heia anthat jo hei khana ansâk jo hei. Kakemōng kakhem he’n kemōng kha jongmak jo hei. Anmani anbinga inhrung kaṭhahei, tâk kemōnghei chu ensui mak jo hei.

⁹Khava jâra kemōng kakhem nangni kaṭong rangei ruh.

¹⁰Chunghnung RŌNGPU kei hi nangni kadōi eng kae tia kaphông jo. Nangnia inphut kakemōng kaṭhōisōt sik jo hei, khahei kakhem chang nôk hêrmak jo chei ning; nanbinga inhrungna rōk mantlomak jo chei ning. Nangni hnenga inphut kakemōnghei kahuk sik hei khana nangni anhme mansâk mak jo chei ning.

¹¹“Kei Chunghnung RŌNGPU’n kamanthei chei hi kae, kakemōnghei kha kabinga kajong sik hei khana ka-ensui sik jo hei.

¹²Kemōng kakhem hin ankemōng an-ensui heia a’nchek hei kha amantûp nôk hei kapōa katlo sik. Khava inthimna leh inrengna anlei inchai kathek hmun heia inphut kaheiṭhōi male sik hei.

¹³Mihei ram a inphut kaheiṭhōisōt sik hei, kamantûp sik hei, anrama kaheiṭhōi male nôk sik hei. Israel tlânghei leh kavadung heia kaheiṭhōi male sik hei khana ramhânga kavei mankhop sik hei.

¹⁴Tlâng leh phaicham heia khana Israel ram a phidông omna hmun rakip a kakhem sik hei.

¹⁵Kei khet kakemōnghei kakhem kachang sik eng, khana anmani châm inhngana sik a hmun kajongsōt sik. Chunghnung RŌNGPU ke’n kahri jo kae.

¹⁶“A’nhmanghei kha kajongsōt sik hei, akalôn lele hei kha kaheiṭhōi male sik hei, an-intônbi hei kha kakatōm pek sik hei, akanahei kha kaman dam sik hei; tâk-kha khava akathai leh ratha kaneihei kha kamanhmang sik hei, ajârchu kei akadik katlo kemōng kakhem eng kae.

¹⁷“Tûnchu, kakemōng rup-hei, Chunghnung RŌNGPU ke’n kahri pek chei kae, nangni inkha-khat chunga ṭong katan sik kae, akaṭha leh akaṭhamak, kemōng leh ke kaṭhensōt sik chei.

¹⁸Nangni ṭhahrep chu phi kaṭha sâk sik a hnōm mak chei; nantasâk mak kha nanchōn rachia kae! Nangni’n tui intheng nan-in khana nanta-in mak tui kha nankachok mannima kae!

¹⁹Nangni tachōn rachi phi kha leh nantamannim tui kha kakemōng ralak he’n ansâk an-ina kae.

²⁰“Khava jâra tûnchu, Chunghnung RŌNGPU’n kahri pek chei kae, kemōng ratha kanei nangni leh akatlasam hei kâra ṭong katan sik.

²¹Taksa kadam mak kha vângting nannamsōt a rup kâra inphut nansuk hlon heia kae.

²²Tâk-kha kakemōnghei kha kahuksōt sik hei khana avea êngset a intlo mak jo hei ning. Kakemōng inkha-khat chunga ṭong katan sik khana akaṭha leh akaṭhamak kaṭhensōt sik jo hei.

²³Ke’n kasōkpa David kapō anmani kemōng kakhem sik a reng inkhat kapek sik hei, ama’n a-ensui sik hei.

²⁴RŌNGPU kei hi an-Pathen kachang sik eng, khana kasōkpa David kapō reng inkhat in anvaikarôn kachang sik. Ke’n kahri jo.

²⁵Anmani inhrung theina sik a ke’n anmani leh intepna kanei sik. Kakemōng he’n kahōia hleipuk a leh ratu shunga anje theina sik a ram shunga thinathei ramsha rakip kalosōt sik hei.

²⁶“Ke’n vâng kapek sik hei khana kei tlâng intheng kimvea kaman om sik hei. Khana khan tui anrangei pha khō kamansûr sik.

²⁷Thingkung he’n kara annei sik, hleipuk he’n hmuchi anpek sik, khana mi rakip anram et a kahōia ka-om sik hei. Kamihei thirhrui kavōktan pha anmani sōk changna inphut kamasō hei pha, anmani’n kei hi RŌNGPU eng kae tia anmanhret sik eng.

²⁸Khōvel jât he’n avea suk manset mak jo hei ning, khana ramsha he’n thatnôk mak hei ning khana sâk mak jo hei ning. Anmani kahōia ka-om sik hei khana tûte inkhat in maṭhitmak jo hei ning.

²⁹Ram thai ka-om hleipuk kapek sik hei, khana ram shunga vonṭâm kamanbâng sik jo. Jât-hlop he’n avea hnōise mak jo hei ning.

³⁰Ke’n Israel hi kahrung khana anmani kamihei kae ti hi mi rakip in anmanhret sik jo. Chunghnung RŌNGPU ke’n kahri jo kae.

³¹“Kakemōng nangni, kei takhem kemōng rup nangni, kami chei kae, khana kei nangni Pathen eng kae,” Chunghnung RŌNGPU’n ati.