Read Komrem EZEKIEL 35 Bible Online

EZEKIEL 35 - Komrem bible

EZEKIEL 35

¹RŌNGPU’n kahnenga ahri.

²Ama’n ati, “Akathithei mihring, Edom ram chunga ṭong roh.

³Chunghnung RŌNGPU ke’n kahri hi mipui manthei hei roh: “Edom tlâng, kei hi nang kadōi eng kae! Ke’n nang ramkarōk kamanchang sik che.

⁴Nakhōpuihei kha suk manset a kada sik hei; Khana naram kha akarōk a kada sik; khana nang in kei hi RŌNGPU eng kae tia namanhret sik jo eng.

⁵“Nang in Israelhei kadōi leikachang ṭhak che, khana amanu inreng pha, asetna jâra achaina karâkna pha shunga khan, amihei nathat pek heia kae.

⁶Khava sō leh, Chunghnung RŌNGPU kei hi akahring khet Pathen kachang jâra, thina hi nang chen jo kae, tlânsōt tor mak tin che. Nang mithatna ṭhena nanei, thina’n ajui sik che kae.

⁷Edom tlângram akarōk a kada sik khana khava shunga akalôn rakip kathat sik hei.

⁸Tlânghei kha kathi kalōng kamansip sik hei, khana re shunga akathihei kalōng khan tlâng leh phaichamhei kha anmakhusi sik.

⁹Ahei tik a sik a akarōk a kada sik che, nakhōpui shunga tûte inkhat om hêrmak jo hei ning. Khava sō leh nang in kei hi RŌNGPU eng kae tia namanhret sik jo eng.

¹⁰“RŌNGPU kei anmani Pathen kachang inum, nang inchu hiva jât 2, Judah leh Israelhei khana anramhei akapu inkhat a, nang in nachen sik hei kae, nati.

¹¹Khava jâra, Chunghnung RŌNGPU kei akahring khet Pathen kachang jâra, kamihei chunga nang hnuk natna, nang phâmrai setna, nahōtna hei tloman kha kapek male sik che kae. Nang in anhnenga natlona hei jâra ke’n karâkna kapek che kae ti hi anmanhret sik jo.

¹²Khava sō leh nangni’n Israel tlânghei inhmangsō jo, chomsō jo hei rih tia êngset a nanhrina hei kha RŌNGPU ke’n kathei jo ti hi nanhong manhret sik jo.

¹³Nangni’n invettak a inlensaktak a kei kadōia nanhrina hei kha kathei jo.”

¹⁴Chunghnung Rōngpu’n ahri, “Ke’n nangni kasuk mathlâk sik chei khana raleichung pumpui in nangni tlâksukna khan anning kaṭha sik.

¹⁵Kei karōi, Israel he’n suk inhmangna anchen pha, nangni’n nanning akaṭha kapōa kachang sik. Seir tlâng, ôk, Edom ram pumpui kha inhmangsō sik. Khava sō leh mi rakip in kei hi RŌNGPU eng kae tia anhong manhret sik eng.”