Read Komrem EZEKIEL 36 Bible Online

EZEKIEL 36 - Komrem bible

EZEKIEL 36

¹RŌNGPU’n hing’hin ahri, “Akathithei mihring”, Israel tlâng heia RŌNGPU ke’n

²anmani sik a ṭong kanei hi anrangeina sik a manthei hei roh: Israel kadōi he’n inpâktak a anhri, ‘Tûnchu sova tenlaia tlânghei so nichen sik jo hei kae!’

³“Khava jâra, Chunghnung RŌNGPU ke’n kahrina hi sânsōt inna phôngsōt roh. Akimvea aka-om jât he’n Israel tlâng kha ankakekhuma ansukset pha khan ankhenga inhnōisena anneia kae.

⁴Khava jâra tûnchu Chunghnung RŌNGPU ke’n tlâng leh hmebung, kavadung leh phaicham khana suk manhmanga aka-om hmun, dahlonsa khōpuihei, khana ankimvea jât he’n antasukset leh antahnōise khōpui seng in kaṭong hri hi rangei ruh.

⁵Akimvea aka-om jât-hei dōina chunga Chunghnung RŌNGPU ke’n kahnuknat a kahrisōt jo, kakhôk det a Edom chunga kahri kae. Manuisōna leh êngset pum a karam kha anhlōa aramhâng hei kha anta anmanchanga kae.

⁶“Khava jâra Israel ram shung ṭong sân roh; jât he’n inzakna leh hmaimôkna anpek hei jâra tlâng, bung, kavadung, phaichamhei hneng Chunghnung RŌNGPU ke’n thangtôm thangset, hnuknat pum a kahri hi manthei hei roh.

⁷Chunghnung RŌNGPU ke’n ka-ôrtak a a’ntep eng kae, akimvea jât-hei hi suk manhnem sik hei kae.

⁸Tâk-kha Israel tlânga chu thingkung he’n anbō anheisôn ther sik khana nangni, kami Israelhei sik a kara inra sik jo hei. Nangni inranga inn ahon’le sik chei kae.

⁹Kei nangni langting ka-om eng, nanram hlei kamankhōi nger sik chei khana hmuchi kamanvor nger sik cheia kae.

¹⁰Nanmi kamanpung sik hei. Khōpuia ka-om sik chei khana suk inhmanga dahlon rakip hei kha syem manther sik hei kae.

¹¹Mihring leh ranhei kamanpung sik hei. Hmalaia kanek a nanmi katam sik chei, sa katamtak nannei sik. Hmalaia nanlei ka-om kapōa khana khan ka-om sik chei, hmalaia kanek a kamanhao sik jo chei. Khava sōa nangni’n kei hi RŌNGPU eng kae tia nanmanhret sik jo eng.

¹²Kami Israel nangni ram shunga khan nan-omna sik a kaheiṭhōi male sik chei. Khavakha nanbing ram kae sik, nansa he’n ahei tik a vonṭâm demak jo hei ning.

¹³“Kei Chunghnung RŌNGPU ke’n kahri kae: ram in mi asâk manhmang tina leh jât sahei achom hei tia mihei hrina hi akadik kae.

¹⁴Tâk-kha tuna inphut chu mi sâk mak jo ning khana nansahei chom mak jo ning. Chunghnung RŌNGPU ke’n kahri jo kae.

¹⁵Jât-hei manuisōna hei kha ram hin avea rangei mak jo hei ning khana mihei hner pher thlōna hmumak jo ning. Ram in jât-hei sahei chunga chom mak jo ning. Chunghnung RŌNGPU ke’n kahri jo.”

¹⁶RŌNGPU’n kei hnenga ahri.

¹⁷Ama’n ati, “Akathithei mihring, Israel he’n anrama an-omlai anmani ṭōnse tlo khana anchônna khan ram anmanchok. Anmani omchen kha nuhmei pōn hmulaia kapōa kahmua beklanga a’nthengmak inkhat a kalo.

¹⁸Ram shunga mi anthat jâra khana limsyem ankamuk a ram anmanbōk jâra kahnuk natna ratha kha manhretna kamannei heia kae.

¹⁹An-om dân leh an-omchen jâra ke’n kadem hei, khana mihlop-hei ram a kachai kathek heia kae.

²⁰Anmani ansena ramtina, kei rahming intheng chunga hmaimôkna anheirôna kae, ajârchu mi’n hinga anti sik, ‘Hihei hi Pathen mihei kae, tâk-kha aram hi andahlon sik jo.’

²¹Khana khan kei rahming intheng chunga mandonsōtna amannei eng, ajârchu khava chunga Israel he’n ansena rakip a hmeset anheichoi pek enga kae.

²²“Khava jâra tûnchu, Chunghnung RŌNGPU ke’n katlo sik hi Israel nangnihei sik a changmak, tâk nanlei sena ram rakip a hmeset nantapek, kei rahming kha inthenga a-omna sik a kae.

²³Jât-hei kâra hmeset nantapek rahming, kei rahming kalen inthengna hi jât-hei hnenga kamanhmu hei pha, kei hi RŌNGPU eng kae tia anmanhret sik jo eng. Chunghnung RŌNGPU ke’n kahri jo kae. Jât-hei hneng kei hi intheng eng ti malârna sik nangni kahmang sik chei.

²⁴Ke’n jât-hlop heia leh ramlak heia inphut kalosōt sik chei khana nanrama kaheiṭhōi male sik chei.

²⁵Nanchunga tui intheng kakathing thlōn sik chei khana nanlim rakip leh bukna nankape rakip a inphut kasuk mantheng sik jo chei.

²⁶Malung ther, mandonna ther kapek sik chei. Nangni hlung kapōa akasak nanmalung kha kalosōt sik khana ṭongpek juina malung kapek sik chei.

²⁷Nanshunga kei ratha kada sik khana nangni’n kei dân nanjuia ke’n kapek chei ṭongpek rakip nannit ti kha ka-en sik.

²⁸Khava sōa ke’n nanpu sōnhei hneng kaleipek ram a khan ka-om sik chei. Nangni kei mi kachang sik chei, khana kei nangni Pathen kachang sik eng.

²⁹Nangni inbōknathei rakip a inphut kahuk sik chei. Hmuchihei kara katluk a an-in rana sik, vonṭâm nande hêrmakna sik hmuchi hnenga ṭong kapek sik.

³⁰Nanthing kung leh nanhlei kara kamanpung sik, jât-hei kâra nuisō nanchen makna sik a vonṭâm dena om nôk mak ning.

³¹Nangni’n ṭhatmak omchen leh dikmak tlona hei kha nanhong mandonsōt sik, nansetna leh nanṭhena hei jâra nanbinga inter sik chei.

³²Israel, hivahi namanhret sik a kamadu che, ke’n hihei seng katlona hi nang jâra changmak. Nang in naleitlo inzakna leh hmesetna kha namanhret sik a kamadu. Chunghnung RŌNGPU ke’n kahri jo kae.

³³Chunghnung RŌNGPU’n ati, “Nasetna inphut kaman theng jo che pha, nakhōpuia kaman om nôk sik jo che, a’nsukset hei kha kamansyem ther sik jo che.

³⁴Nahleipuk phi’n amakhusō joa hleichi akae sō jo kha ahnenga akase lele he’n anhmu jo’num, ke’n avea kamanthlō nôk sik chei.

³⁵Hiva ram, ramhânga aleika-om hi heikhonga mo Eden rahōn kapōa ahong kae jo, khōpui akakōisō jo, chomsō jo, suksetsōa aka-om jo hei hi tûnchu mi ka-om heia, rekur anmankur pet jo hei, tia mi rakip in anhri sik.

³⁶Khava sōa khō inhnaipui jât, akahringa alaka-om hei khan RŌNGPU’n asukset jo khōpuihei kha asyemther hei khana akarōk a aka-om hleipuk-hei kha aling manther hei tia anmanhret sik. Chunghnung RŌNGPU ke’n hiva tlo sik a intep jo eng, katlo sik kae.”

³⁷Chunghnung RŌNGPU’n ahri, “Israel he’n inthōpuina sik a kahnenga derna vōi khat chu kalamannei sik hei khana kemōng rup-hei kapōa anja kamanpung sik hei.

³⁸Jerusalema pha khat a revei a-om leh inthoina tōk sik a kemōng akasiptak hei kapōa, tuna a’nsukset khōpuihei kha mi kasiptak sik hei. Khava pha anmani’n kei hi RŌNGPU eng kae tia anmanhret sik jo eng.”