Read Komrem EZEKIEL 37 Bible Online

EZEKIEL 37 - Komrem bible

EZEKIEL 37

¹Kachunga RŌNGPU rathahrat ajōng kachōng kha kamanhret, ama rathla’n kei aṭhōisōt enga ru kasip tlit phaicham inkhat a amaṭhum eng.

²Ama’n phaicham akimvea asepui eng, khana khan ru katamtak ka-om hei, khahei kha kachârber hei.

³Ama’n kei hneng ahri, “Akathithei mihring, hiva ruhei hi akahringthei nôk sik hei mo?” Ke’n kamasôn, “Chunghnung RŌNGPU, nang rōk in khavakha namasôn tor sik!”

⁴Ama’n ati, “Ruhei hneng ṭong sân roh. RŌNGPU ṭonghri anrangeina sik hiva ru kachâr hei hi hripek hei roh.

⁵Ru kachâr hei hneng Chunghnung RŌNGPU ke’n kahri hi manthei hei roh: Ke’n nanshunga kaphuk kamasâ sik khana kamanhring male sik chei.

⁶Ke’n rathahrui leh ravōi kapek sik chei, khana vun vânga kamakhu sik chei. Nanshunga kaphuk kapek sik cheia kha hringna kapek male sik chei. Khava sō leh kei hi RŌNGPU eng kae tia nanmanhret sik jo eng.”

⁷Kahnenga amanthei eng kapōa ke’n kaphôngsōt jo. Ke’n hinga kahrilai rasa inkhat kathei, khava pha ruhei kha injōm inmat nôk jo hei.

⁸Ke’n khanga ka-enlai ruhei kha rathahrui, ravōi khana vun he’n anmakhu jo hei. Tâk-kha taksahei shunga khan kaphuk la-insâ mak a kae.

⁹Pathen in kahnenga ati, “Akathithei mihring, thli hnenga ṭongsânna nei roh. Thli kha ramkei rakip a ahong hrângna sik, akathi taksahei shunga kaphuk amanhlut a, amanhring male nôkna sik hei RŌNGPU’n ṭong apek che tia manthei roh.”

¹⁰Khava jâra kei amanthei eng kapōa ke’n ṭong kha kasân jo. kaphuk kha taksahei shunga kahlut jo, anmani hongkahring heia kangir jo hei. Anmani remi changna sik anja katluk hrep heia kae.

¹¹Pathen in kahnenga ati, “Akathithei mihring, Israel mihei hi hiva ru kapō hei kae. Anmani’n kachârsō jo ung, hnunga sik a inhōrna om mak jo, anti.

¹²Khava jâra kami Israel hnenga ṭong sân roh khana Chunghnung RŌNGPU ke’n anthlân hei kamahlang sik tia manthei hei roh. Ke’n kalosōt sik hei khana Israel ram a kaheiṭhōi male sik hei.

¹³Kamihei thina thlân kha kamahlanga kalosōt hei pha, kei hi RŌNGPU eng kae tia anmanhret sik eng.

¹⁴Kei kaphuk anshunga kamasâ sik, kamanhring nôk sik hei, khana anrama kaman om sik hei. Khava sōa anmani’n kei hi RŌNGPU eng kae tia anmanhret sik eng. Ke’n tlo sik a intep jo eng, katlo sik kae. RŌNGPU ke’n kahri jo kae.”

¹⁵RŌNGPU’n kahnenga avea ṭong ajōng hri.

¹⁶Ama’n ati, “Akathithei mihring, khōnghre inkhat lo roh khava chunga, ‘Judah rengram’ mazet roh. Khana khōnghre inkhat lonôk roh khava chunga, ‘Israel rengram’ mazet roh.

¹⁷Khava sō leh khōnghre 2 kha ahmor leh ahmora nakut a matu roh, an-inhni kha inkhat rōk apōna sik a.

¹⁸Nami he’n khavakha heitina mo tia ander che pha leh,

¹⁹Chunghnung RŌNGPU ke’n Israel kahlanga khōnghre kha kalo sik khana Judah kahlang kathleng kha leh kadasap sik hei tia manthei hei roh. Inhnia inphut khōnghre inkhat kasyem sik khana kakut a kamatu sik hei.

²⁰“Khōnghre 2 hei kha nakut a matu hei roh, mihe’n hmu hei rasoh.

²¹Khana Chunghnung RŌNGPU ke’n Israelhei kha jât rakip kâra anleiomna inphut kalosōt sik hei, kamantûp sik hei khana anrama kaheiṭhōi male sik hei tia anhnenga manthei hei roh.

²²Ke’n anmani kha ram shunga, Israel tlâng chunga inpunkhôma kada sik hei. Reng inkhat rōk annei sik jo. Anmani jât inhnia a-emak leh ram inhnia inṭhen mak jo hei ning.

²³Limsyem kamuk a khana setna tloa anbinga inbōk nôk mak jo hei ning. Anmani setna antloa kei anmasetna eng rakip a inphut kamasō sik jo hei. Ke’n anmani kasuk mantheng sik hei, anmani kami kachang sik hei, kei an-Pathen kachang sik eng.

²⁴Kasōkpa David kapō inkhat in anreng kachang sik. Anmani vaikarôn inkhat thōia inchun sik jo hei khana taksentak a kaṭong anjui sik jo.

²⁵Kasōkpa Jacob hnenga kapeksa, anpu anpahei leiomna ram a ka-om sik hei. Ahei tik a khan ka-om sik hei, khana khan ansōn anpârhei ka-om sik hei. Kasōk David kapō inkhat in ahei tik a vai arôn sik hei.

²⁶Anmani ahei tik a inhukna kapek sik a intepna inkhat anmani leh kanei sik. Ke’n kasyemsōt sik hei khana anja kamanpung sik hei, khana anrama kabek-inn kada sik, khana khan ahei tik a ka-om sik jo hei.

²⁷Khana khan anmani leh ka-om sik ung; kei anmani Pathen kachang sik eng, anmani kei mi kachang sik hei.

²⁸Anmani kâra ahei tik a aka-om sik a kabek-inn kha kada pha, RŌNGPU ke’n Israel hi kami sik a kakadeisōt kae tia jât he’n anmanhret sik jo.”