Read Komrem EZEKIEL 38 Bible Online

EZEKIEL 38 - Komrem bible

EZEKIEL 38

¹RŌNGPU’n kahnenga ahri.

²Ama’n ati, “Akathithei mihring, Magog ram a Meshech leh Tubal vaikarônpen Gog kha dem roh. Ama kha dem roh,

³Chunghnung RŌNGPU kei hi ama kadōi jo eng kae tia hripek roh.

⁴Ama kamahe vângvei sik, ama makha a khan khoikim vâng kasur sik, ama leh aremi rup kakeisôn sik jo hei. Aremihei, anshakorhei khana revon invona ankachōng hei kha katam hêr hei, remi rakip in pho leh chem invon et hei.

⁵Persia, Ethiopia leh Libyahei kha ama leh inthō hei, ankhenga pho leh chem anchoi et a kae.

⁶Sak tinga Gomer leh Beth Togarma ka-om remi rakip ama leh inṭhōi hei, khana jât katamtak a mihei le’m inthlop hei.

⁷Ama leh ama hlamkeina thōia ka-om remi rup-hei kha an-intlukna sik a manthei hei roh.

⁸Pha kasôttak sō leh mipuihei kha jât katamtak heia inphut kaheiṭhōi male hei pha, re leh sha ṭit lo hêra an-omna jo ram inkhat chunga ama’n abuhluna sik a ke’n ahnenga ṭong kapek sik. Ama’n Israel tlânghei, pha kasôttak ramkarōk a dahlon jo hei, tâk tûnchu mi rakip in kahōia an-omna jo kha re atlo sik.

⁹Ama leh ama remi khana ama inṭhōipui jât-hei khan thlisip kapōa re antlo sik khana ram kha sumtuk kapōa anmakhusi sik.”

¹⁰Hivahi Chunghnung RŌNGPU’n Gog hnenga ahri kha kae: “Khava pha kha ahong tlung pha, lungthim kaṭhamak tlona sik a namandon manphut sik jo.

¹¹Mipui he’n kamōnga inhrungtak a an-omna ram, khava inthōpui kase ram leh inhrungna kase kur a’nkhârmak khōpuihei chunga khan re tlona sik a intluk sik che.

¹²Pha khat a akarōksai khōpuihei shunga aka-om hei hneng, nasuk manbōi heia nachom sik hei. Khahei kha khôm mantûp jât-hei kae, tûnchu ran leh karōi antanei joa raleichung hlamsōtak a aka-om jo hei kae.

¹³Sheba leh Dedan khana Spaina revei katlohei khan ander sik che, ‘Naremi namantûp jo hei mo, mihei karōi suk mansetna leh chomsōtna sik a re natuk jo mo? Nang dangka leh sana, ranhring khana karōi chenna sik, khana khahei rakip rôn sōt a naram jōn sik a a’ntluk jo che mo?’”

¹⁴Khava jâra Chunghnung RŌNGPU’n Gog hnenga ahri ṭong kha avakahri sik a atir eng: “Tûnchu kami Israel he’n inhrungtak a an-omna shunga nang akasesōt sik che kae,

¹⁵nahmun khana inphut sak tinga hmun kahlatak a, jât rakip hei remi katamtak, ratha kaneitak hei, ankhenga shakor kachōnghei kha naching sik hei.

¹⁶Nang in kami Israelhei kha thlipui in ram chârna ajōngsem kapōa anchunga re natlo sik kae. Apha kha ahong tlung leh, jât he’n kei hi tu eng mo kae tia anmanhretna sik, khana nanga inphut ṭōn katlosōt sik heia inphut hin kei inthengna kha malârsōt theina sik a karam chunga re katlo sik a katir sik che kae.

¹⁷Ke’n Israelhei sânkathem, kasōk heia inphut ṭong phôngna kaneilai, pha kasôttak a inphut ke’n ṭong kaleihri kha nang chungchânga kae, khachu akahong sik pha Israel kabuhlu sik tu mo inkhat kaheiṭhōi sik kalei ti jo.” Chunghnung RŌNGPU’n ahri jo.

¹⁸Chunghnung RŌNGPU’n ahri, “Gog in Israel chunga re atlo ning, kei kahnuk kana hêr sik.

¹⁹Kahnuknat pum a kahrisōt, khachu khava kani ning khan Israel ram shunga lingnu inhnaktak a innok sik.

²⁰Kei ṭitna nga leh va rakip akasin akalen sha rakip, khana raleichunga aka-om mihring rakip innoksō sik hei. Tlânghei kha katla inhlon sik hei, kare tlânghei kakik-khōi sik hei, khana bang rakip kachimsō sik jo.

²¹Insuk inhmangna rakip vânga ke’n Gog kha ṭit-inpirna kapek sik. Chunghnung RŌNGPU ke’n kahri jo kae. Amihei kha chem anradok a khat leh khat intuk hlon sik hei.

²²Ama kha hrise leh thisen sōkna vânga karâkna kapek sik. Khōsûr inhnak leh kahre katla, inṭhōia hmei leh kât, ama leh aremihei khana ahnenga ka-om jât katamtak hei chunga bunthlōn sik hei kae

²³Hing’hin jât rakip hei hneng kei hi kalen eng khana intheng eng ti hi kamalâr sik kae. Kei hi RŌNGPU eng kae tia anmanhret sik jo eng.”