Read Komrem EZEKIEL 39 Bible Online

EZEKIEL 39 - Komrem bible

EZEKIEL 39

¹Chunghnung RŌNGPU’n ahri, “Akathithei mihring, Meshech leh Tubal vaikarônpen Gog dōina ṭong hri roh. Kei hi ama inrepui eng kae tia hripek roh.

²Ke’n ama ramkei ather inkhat ting kamahe sik, Israel tlâng ting ahong mak kârseng, sakram a hmun kahlatak a inphut kaheiṭhōisōt sik.

³Khava pha leh akut changtinga achemjâm leh akut veitinga thesang kha kakanok mathlâk sik hei.

⁴Gog leh aremi khana ama inthōpui hei kha Israel tlâng chunga kathi sik jo hei, ankalōng kha sha rakip leh va rakip hei samsâk kamanchang sik.

⁵Ramhânga hleiheia kathi sik jo hei. Chunghnung RŌNGPU ke’n kahri jo kae.

⁶Magog leh tuipui panga bōina kasea aka-om ram rakip hei chunga hmei karo manphut sik jo, khana mi rakip in kei hi RŌNGPU kae tia anmanhret sik eng.

⁷Kami Israel he’n karahming intheng hi anmanhret khetna sik a katlo sik, karahming hi avea hmesetna manchen mak ning. Khava sōa jât he’n RŌNGPU kei hi Israelhei a’ntheng Pathen kae tia anmanhret sik eng.”

⁸Chunghnung RŌNGPU’n ati, “Ke’n kahri jo kani kha sôilo jen a akahong sik kae.

⁹Israel khōpuia aka-om he’n kasōksōt sik hei, antadahlon hmangchâk-hei kha hmeia ro sik a ankhôm mantûp sik hei. Chemjâm, pho, sai, thesang, kasei, thingbong hei vânga hmei ansêm sik, khana kum 7 hmei sêmna sik a hmangchâk annei sik.

¹⁰Dahlonsa hmangchâk kha annei sik jâra anmani’n ramhânga leh ratu shunga thing vajong sik khana vatuktan sik a rangei mak hei ning. Anmani ankasukset hei leh ankachom hei kha anmani’n ansukset heia anchom nôk sik hei.

¹¹RŌNGPU’n ati, “Hihei rakip hi asōk pha, ke’n Gog kha Israel ram shunga avûmna sik thlân, Akathi Tuipui nisōtinga Khōhmehei Phaichama kapek sik. Gog leh aremi rakip khana khan anvûm sik hei, khana phaicham kha ‘Gog Remihei Phaicham’ inti sik jo.

¹²Mi kathi kalōnghei kha Israel he’n anvûm heia anram manthengna antatlo kha thla 7 kahlut sik hei.

¹³Ram shunga ka-om mi rakip in khahei vûmna kha anbôm sik hei, anmani kha anṭōn tlona jâra kei retor ning kajana pek sik hei kae. Chunghnung RŌNGPU ke’n kahri jo.

¹⁴Thla 7 kha athlengsōa, ram kha anmantheng sōna sik, kathi kalōng ram shunga akatluhei avakajonga avakahre sik a mi ankadeisōt sik hei.

¹⁵Anmani’n ram shung chung leh hnōia kase lele heia, pha khat a mihring saru anratō’nchu, khava hnenga mêrchîkna anda sik, khana thlân kakhōr hei khan kahong heia Gog Phaichama anhre sik.

¹⁶(Khava hnenga remihei rahminga anphō khōpui inkhat ka-om sik.) Khang’khan ram kha manthengsōt sik kae.”

¹⁷Chunghnung RŌNGPU’n kahnenga hing’hin ahri, “Akathithei mihring, va leh sha rakip ram rakip a inphut anheisōk a anmani sik kamantluk inthoina thlai akasa sik a bek hei roh. Hivahi Israel Tlâng chunga taksa ravōi leh thisen sâk leh inna sâktlâng kalentak kachang sik.

¹⁸Anmani’n remihei kalōng ansâk sik khana ralei vaikarônhei thisen an-in sik, khahei rakip kha kemōngche, kemōngte, ke leh seche kathai tatak hei kapōa anthat sik hei.

¹⁹Ke’n anmani kha inthoina kapōa kathat hei pha, va leh sha he’n ansâk torna katlunga anthai kha ansâk sik khana an inruina katlunga thisen kha an-in sik.

²⁰Khava kei busâkna dokhâng chunga shakorhei leh ankachōng hei, remihei leh re kahrânghei ravōi ansâktor chenna ansâk sik. Chunghnung RŌNGPU ke’n kahri jo kae.”

²¹RŌNGPU’n ahri, “Kei lûrna kha jât-hei kamanhmu sik hei khana kei mandonna akadik kha tlosōtna sik a heikhonga mo karatha hratna kha kahmang ti kha kamalâr sik.

²²Hiva hinna inphut Israel he’n kei hi RŌNGPU an-Pathen eng kae tia anmanhret sik jo eng.

²³Khana Israel he’n kei dōina setna antlo jâra rehringa antasur mi akachang hei kae ti hi jât he’n anhong manhret sik jo. Anmania inphut kei inhe jo eng, ankadōihei khan tor hei rasoh khana re shunga that hei rasoh.

²⁴Anmani intheng makna leh anṭhatmak jâra anchen rahōi kasōk kha kapek hei, khana anhnenga inphut a’nhesōt jo eng kae.”

²⁵Chunghnung RŌNGPU’n ahri “Tâk-kha tûnchu Jacob sōnhei, Israel mihei chunga lungset karôn sik jo hei khana kamanhao nôk sik hei. Karahming intheng hi kahrung sik kae.

²⁶Pha khat a anrama kahōia an-om nôk pha, tûte inkhat in amaṭhit mak hei pha, kei anhlonsōt eng jâra heikhonga mo hmaimôk anta leichen ti kha anmahngi tor nôk sik.

²⁷Kei intheng eng ti hi jât katamtak hnenga malârna sik a, kamihei hi ankadōihei omna ram rakip a inphut kaheiṭhōi male sik hei.

²⁸Khava sōa kami he’n kei hi RŌNGPU an-Pathen eng kae tia anmanhret sik jo eng. Anmani’n hivahi anmanhret sik, ajârchu ke’n anmani rehring sura kamanse hei kae khana tûnchu inkhatbek dahlon loa anram khet a kaheiṭhōi male nôk jo hei.

²⁹Ke’n kami Israelhei chunga karathla kabun mathla sik khana anhnenga inphut inhesōt hêrmak ning. Chunghnung RŌNGPU ke’n kahri jo.”