Read Komrem EZEKIEL 4 Bible Online

EZEKIEL 4 - Komrem bible

EZEKIEL 4

¹Pathen in ati, “Akathithei mihring, ṭek inkhat heichoi ina, nahma a da roh, khava chunga khan Jerusalem kathlenga khōpui inkhat lim syem roh.

²Khava sōa, kakekhum mêrchîkna sik akimvea rekur syema, ralei chosōt a, rephōrhei khana bang deng manshâng roh.

³Khana repa hngâkna berte um syem roh. Thir khâng inkhat lo roh khōpui leh nang kâra bang kapōa da roh. Nahmai khōpui hnget roh. Khavakha rekhumna jo kae, khana nang in khava shunga kakekhum che kha kae. Hivahi Israel jât sik a mêrchîkna kha kachang sik.

⁴“Hivasō leh navei intongting je roh, khana Israelhei ṭhena kha nachunga kada sik jo. Khana khan ni 390 ka-om sik che, anmani ṭhena jâra. Anmani karâkna asôt dungjuia kum khat sik a ni khat sâm karâkna kapek che.

⁶Nang in khavakha natlosō leh, nachang intongting inhe ina je nôk roh, Judah hei ṭhena jâra ni 40 inrengna nathōk sik kae, anmani karâkna kum khat sik a ni khat sâm kae.

⁷“Jerusalem kakekhum jo kha kasang kanga enroh, nakuttom mankhing inna khōpui dōina ṭong sânsōt roh.

⁸Nang kakhit sik che khana khōpui kakekhumna kha a’nchaisō mak hma seng nasir napanga inhetor mak tin che.

⁹“Tûn gehu, bunim, behmu, be manggan, khana satun leh konim inlo roh. Ankhenga manchun hei roh khana buhlom syem roh. Khavakha kani 390 navei tinga nasira naje shunga nasâk sik kae.

¹⁰Ni khat a 230 gram nasâk thei sik, khavakha ajîng kani katlunga nasâk sik kae.

¹¹Tui um ahlek tete na-in sik, ni khat a kirat 2 lim sik kae.

¹²Nang in mihringhei ek kachâr vâng hmei nasyem sik, hmei chunga khan buhlom nasyem sik, khana mihei hmit-hmua nasâk sik kae.”

¹³RŌNGPU’n ahri, “Hivahi Israelhei kha ke’n miram heia kakatheksōt hei pha Dân tahnōm mak thlai kha antasâk sik manhmuna kae.”

¹⁴Tâk-kha ke’n kamasôn, “Changmak, Chunghnung RŌNGPU! Ke’n kabinga insuk innimphung mak eng. Kanaipang chang laia inphut binga kathi ran hme khana ramshahei tathat hme heisâkphung hêrmak eng. Akabōk thlai heisâkphung hêrmak eng.”

¹⁵Khana Pathen in ati, “Kaṭha hêr jo. Khava kanek a sehrat ek kamanhmang sik che, khava chunga nabuhlom nasyem sik jo.”

¹⁶Khana ahapsa nôk a, “Akathithei mihring, Jerusalem sik a buhlom pek mak jo ning. Khana aka-om mipuihei kha anthlaisâk leh antui in sik a-om mak jo jâra inreng sik hei khana anmandon khôk sik.

¹⁷Buhlom leh tui hmumak hei ning; anmalung katlasam sik, ansetna jâra inhmang sik hei.”