Read Komrem EZEKIEL 40 Bible Online

EZEKIEL 40 - Komrem bible

EZEKIEL 40

¹Hivahi rehring sura kanva omna kum 25 tlukna, khana Jerusalem mihe’n anhlōna kum 14 tlukna kumther kani 10 ninga kae. Khava ning khan RŌNGPU omna rathahrat kha kamanhret, khana ama’n aṭhōitou enga kae.

²Hmangtalâra Pathen in Israel ram a aṭhōisōt enga tlâng inshângtak chunga ada eng. Kahmating ke’n inn inshâng ṭhahrep khōpui kapōa kahmu hei.

³Aṭhōi manhnaidet enga, sum-êng kapō mipa inkhat kaleihmu. Ama’n tena pōn hrui leh thingtlōn achoia kot hnenga kangira kae.

⁴Ama’n kei hneng ahri, “Akathithei mihring, enroh. Kaṭha rangei roh, ke’n kamanhmu sik che rakip malung kahlut a enroh, hiva sik a nang hin kaheiṭhōi che kae. Nang in nahmu rakip hei kha Israelhei hneng nahri sik kae.”

⁵Kei tahmu khachu Bek-inn kae, akimvea khan bangrape inkhâr. Mipa khan ramtena metre 3 kasei kha aloa rape bang kha ate jo. Khavakha metre 3 inshâng khana metre 3 insâ.

⁶Hivasōa ama nisō langting kahnget kekot a vakase. Kechōn khōibia khan kaketoua achunga inphut khava kekot hlutna kha atea metre 3 inthûk a kae.

⁷Khavakha nikhe leh hlamte inkhat ka-om, hlamte asir inhnia khan repa hngâkna 3 et ka-om. Den inkhat et kha in-ang et hei, metre 3 adung avai hei kae, khana ankâra bang kha metre 2 leh aher insâ. Khava repa hngâkna hei nikhe leh hlamte inkhat metre 3 kasei ka-om khava khan, Bek-inn kahnget, ashung hlutna innden inkhat tinga sena kae.

⁸Ama’n hiva hlutna innden hi atea metre 4 inthûk a kae. Hivahi Bek-inn tinga akahnaipen kekot hmor kha kae, khana inphut akahlapen ahmora rape banghei kha metre inkhat insâ hei.

⁹

¹⁰(Hiva hlutna hlamte sira ka-om repa hngâkna inndenhei hi in-ang et hei, khana ankâra innbanghei kha’m in-ang et a insâ hei.)

¹¹Abâna, kekot shunga ahlutna hlamte kha mipa khan avai kha atea kae. Khavakha metre 6 leh aher kae, khana a’nhlang kekot-hei inkâr kha metre 5 kae.

¹²Repa hngâkna innden rakip hei hmating, rape bang inhnem centimetre 50 inshâng leh centimetre 50 insâ kangir. (Inndenhei kha metre 3, adung leh avai a’n-anghei kae.)

¹³Khava sōa innden inkhat kahnungtinga banga inphut ahmatinga hlamte inveina, hmai inhngetpui innden inkhat kahnungtinga bang katlung kha, metre 12 leh aher inkâr hei.

¹⁴Akahlapen innden khan chu telai inkhat ting setheina ka-om. Ama’n khavakha atea avai metre 10 kae.

¹⁵Kekot hlam kha kekot vângtinga rape banga inphut achainapen innden bang katlunga metre 25 kae.

¹⁶Innden rakip hei vâng intong bang rakip a akave ka-om et hei khana inndenhei kâra banghei kha’num akave ka-om hei. Ashung intong bang heia, hlamte ting ahei kahnget a, kahno bō ret anhem rabek heia kae.

¹⁷Mipa khan kekot a ahlutpui enga telaia khan aṭhōi eng. Vângtinga banga khan innden 30 anrabek a ansak, khavahei hmating hlung antapha hmun khat ka-om,

¹⁸khavakha sumpuk kimvea katlung bit a anpha a kae. Hiva vângtinga telai hi shungtinga telai kanek a inhnemdet a kae.

¹⁹Kekot a’nshângdet inkhat ka-om khava khan shungtinga telaia hlutna kae. Mipa khan kekot 2 hei kâr kha atea, metre 50 inkâr hei.

²⁰Khava sōa mipa khan sak tinga kekot, vângtinga telai sena kha atea kae.

²¹Khava hlam sir inhnia repa hngâkna 3, ankâra banghei, khana ashung hlutna inndenhei ankhenga leh nisōtinga kekot tena kha leh in-angtling heia kae. Kekot adung kha metre 25 kae khana avai kha metre 12 leh aher kae.

²²Ashung hlutna innden, thlikot, khana limret kahno bō hei kha nisōtinga kekot a hei kha leh in-angtling hei. Hinahin kekot katlunga khan ketouna kechōnna 7 ka-om, khana ashung hlutna innden kha ahmorpena ka-om, telaiting ahmai ahnget a kae.

²³Hiva sak ting kekot a inphut telai kha nikhe leh kekot inkhat ka-om, ashungtinga telai tlungna kae, nisōtinga aka-om hei kapōa in-angtling hei. Mipa khan hiva kekot 2 hei inkâr kha atea metre 50 kae.

²⁴Abânna, mipa khan thlang ting aṭhōi eng, khana khan kekot inkhat kahmu. Ama’n khava ashungtinga rape bang leh ashung hlutna innden kha atehei, khahei kha’m ahma kakeihei kha leh in-angtling hei.

²⁵Hiva kekot a inndenhei hin ahma kakeihei kapōa thlikot indo hei. Kekot adung kha metre 25 kae, avai kha metre 12 leh aher kae.

²⁶Khana kena kha ketouna 7 ka-om, khana hlutna innden kha ahmorpena ka-om, ahmai telaiting ahnget a kae. Ashung intong bang, hlamte ting kahnget heia khan kahno bō ret anhem rabek heia kae.

²⁷Hina hi’num ashungtinga telai tlungna kekot inkhat ka-om. Mipa khan hiva inhnina kekot inkâr hi atea metre 50 kae.

²⁸Mipa khan thlang kekot a ahlutpui enga ashung intong sumpuk a aṭhōi eng. Ama’n kekot kha atea khavakha avâng intong rape banga kekot kha leh atena in-angtling hei.

²⁹Khava repa hngâkna inndenhei, khana ashung intong banghei kha kekot ralak-hei tena leh in-angtling hei. Hiva kekot a inndenhei hi’num thlikot ka-om hei. Adung hi metre 25 avai hin metre 12 leh aher kae.

³⁰

³¹Hiva ashung hlutna innden hin telai alak inkhat ting ahnget, hlamte dunga bang heia khan kahno bō lim anhak a anhem rabek. Hiva kekot a ketouna kechōnna hi 8 ka-om.

³²Mipa khan nisō kekot a ahlutpui enga ashung intong telaia aṭhōi eng. Ama’n kekot kha atea khavakha aralak-hei leh in-angtling hei.

³³Khava repa hngâkna inndenhei, ahlutna innden, khana ashung intong rape banghei kha kekot ralak-hei leh in-angtling hei. Ankimvea thlikot indo hei, khana ashung hlutna innden kha’num indo hei. Adung kha metre 25 kae, avai kha metre 12 leh aher kae.

³⁴Ashung hlutna innden khan vâng intonga telai kha ahmai ahnget a kae. Hlamte dung ahei kahnget bang heia kahno bō lim anhem rabek.

³⁵Hivasōa mipa khan sak tinga kekot a aṭhōi eng. Ama’n atea khavakha aralak-hei kha leh in-angtling hei.

³⁶Khava kapō, repa hngâkna innden ka-om hei, ashungtinga banghei kha ret ansyem hei, khana akimvea thlikot indo hei. Khavakha metre 25 kae, avai kha metre 12 leh aher kae.

³⁷Ashungting hlutna innden khan vâng intong telai kha ahmai ahnget.

³⁸Avâng intong telaia, ashungtinga kekot a sak tinga asira, innden inkhat anrabeksa. Khavakha telaiting ahmai ahong kahnget, ashung hlutna innden leh thleng lelena ka-om. Khana khan ro-inthoina ranhei ansôp heia kae.

³⁹Hiva ashung hlutna innden shunga hin dokhâng 4 ka-om, innden asir inhnia dokhâng 2 et anda. Hiva dokhânghei chunga hin inthoina tōk sik ranhei kha antha heia kae; pumro inthoina sik, set-inthoina, khana pekmalena inthoina achanga.

⁴⁰Innden vângting khan kha leh in-anga dokhâng 4 anda hei, sak ting kekot hlutna asir inhnia dokhâng 2 et ando hei.

⁴¹Akhengpet a dokhâng 8 chunga inthoina sik a ranhei kha anthat hei: 4 khan innden shunga, 4 inkhat in vânga sumpuk a.

⁴²Hlungpek dokhâng 4 inhapsa, romanvâm inthoina kha ansyemna. Khahei kha centimetre 50 inshâng hei, khana hiva chungpena centimetre 75 adung leh avai in-ang ahmai inpek ka-om hei. Hiva chung heia hin inthoina ran thatna sik ahmangchâk rakip anda.

⁴³Hiva dokhâng hmora millimetre 75 inpek vânga akimna ansyem. Inthoina sik ran hme rakip hiva dokhâng chung heia anda hei.

⁴⁴Hivasōa ama’n ashung intong telaia aṭhōi eng. Ashung intong telaiting ahmai inhlang innden 2 ka-om hei, sak tinga kekot hnenga inkhat khan thlang ting ahmai ahnget, khana thlâng tinga kekot hnenga inkhat khan sak ting ahmai ahnget a kae.

⁴⁵Mipa khan kei hneng ahria thlang lang kahnget innden kha Bek-inna sepa katlo thempuhei sik a kae,

⁴⁶ahmai sak ting kahnget innden kha maichâma sepa katlo thempuhei sik a kae. Thempu rakip Zadok a inphut ahong kakōn hei kae; anmani rōk kha RŌNGPU omna sepa katlo sik a hnōm pekna aka-om Levi phunga mihei kae.

⁴⁷Mipa khan ashung intong telai kha atea khavakha metre 50 adung avai in-anga kae. Bek-inn kha tlaitlâk ting ka-om, khava hmating maichâm kha ka-om.

⁴⁸Khava sōa ama’n Bek-inn hlutna innden shunga aṭhōi eng, ahlutna kha atea khavakha metre 2 leh aher inthûk khana metre 7 inpâk, khana asir inhnia banghei kha metre 1.5 insâ hei.

⁴⁹Ashung hlutna innden a khan ketouna ka-om hei, avai metre 10 leh metre 6 inthûk hei. Hinghiva ketouna kechōnna hi 2 hei kae: ashung hlutna innden asir inhnia ansyem hei.