Read Komrem EZEKIEL 42 Bible Online

EZEKIEL 42 - Komrem bible

EZEKIEL 42

¹Khava sōa mipa khan vângtinga telaia aṭhōi eng khana Bek-inn sak tinga inna khan aṭhōi eng, khavakha tlaitlâk tinga Bek-inn hmora inphut hlarei mak.

²Hiva inn hi metre 50 kasei khana metre 25 inpâk.

³Asir inkhat in Bek-inn dunga ramhâng avai metre 10 omnating khan ahnget, khana asir inkhat khan vâng intong telaia kehlam omnating ahnget a kae. Khavakha den inthuma insak, athōia kanek a achung hei khan kahnungting intet det-det a ansak hei.

⁴Hiva inn sak ting intonga hin hlamte inkhat metre 5 inpâk, metre 50 kasei, khana khava lang tinga ashung hlutna hlamhei ka-om.

⁵Inn kha, chunga inndenhei kha alaiṭim aden leh athōia inndenhei kanek a kasin det-det hei ajârchu khahei kha kahnungting intet det-det a ansak hei.

⁶Inthō 3 chunga innden insak hei hi aden inkhat chunga inkhat ansak heia kae, khahei kha telaia inn ralak insak hei kapōa kacho manhngâm mak hei.

⁷Athōia den a vângtinga innbang kha adung her khat, metre 25 chu hlung kangar rōk kae; a’nhlei metre 25 dunga khan inndenhei kha ka-om hei. Achung pena athō khan chu adung katlung bit a innden ka-om hei.

⁹Nisōtinga innhmora, hiva innden 2 hei thōia, telai bang inphutna khan vâng intong telaia ahlutna ka-om. Bek-inn thlâng ting asira, Bek-inn tlaitlâk tinga ahmora aka-om inn khana inphut akahlarei mak a khan hme inlakdet inn inkhat ka-om.

¹¹Inndenhei hmating khan sak tinga aka-om kapōa hlamte inkhat ka-om. Khahei kha atena in-angtling, an-omje in-angtling, ashung hlutna hei kha in-angtling hei.

¹²Bang inphutna nisōtinga ahmora, khava inn thlang intonga inndenhei thōia kot inkhat ka-om.

¹³Mipa khan kahnenga ati, “Hiva inn 2 hei hi a’ntheng hei kae. Hihei shunga hin RŌNGPU omna akahlut lele thempu he’n a’nthengpen inthoina kha ansâk a kae. Inndenhei hi a’ntheng anchang jâra thempu he’n a’nthengpen inthoinahei kha khana khan anda hei: hmuchi inthoina, setna inthoina tōkna khana katlen malesōtna inthoinahei.

¹⁴Thempu he’n Bek-inn shunga an-om leh vâng intong telaia ansōk hnōm inchu, anmani’n RŌNGPU razenna antlolaia invonna intheng hei kha hiva innden shunga hin andahlon hei sik. Anmani’n mipuihei intûpna hmun heia ansōksōt mak hma invonna ahlop vâng a’nvon sik hei kae.”

¹⁵Mipa khan Bek-inn ashungtinga ram atesō pha, ama’n nisōtinga kot a aṭhōisōt eng khana vâng intong ram kha atea kae.

¹⁶Ama’n atena sungtlōn kha aloa nisōtinga ram atea, metre 250 kae.

¹⁷Khana sak ting, thlang ting, tlaitlâk ting ate heia, ramkei rakip a ankasei kha in-anghrep hei, metre 250 et hei kae.

²⁰hivahi ramkei rakip abang khan metre 250 kaseia akekim bitna sik a kae. Bang hin a’ntheng leh a’nthengmak ṭhensōtna kachang jo.