Read Komrem EZEKIEL 43 Bible Online

EZEKIEL 43 - Komrem bible

EZEKIEL 43

¹Mipa khan nisō kahnget kot a khan aṭhōi eng,

²khana khan Israel Pathen omna vâr kadi rik-rak nisōtinga ajōng kha kahmu. Pathen kare kha tuipui rasa kapōa inhnak, khana raleia vâr kadi rik-rak a inlâr.

³Hiva hmangtalâr hi Pathen in Jerusalem asuk manhmang tinga Chebar tuipanga kaleihmu kha leh in-ang hei. Khava sōa raleichunga kahmai kamakhup a inlet eng.

⁴Vâr kadi rik-rak kha nisōtinga kot a kahlut a Bek-inn shunga kase joa kae.

⁵RŌNGPU rathla khan akeitou enga ashung intong telaia aṭhōi eng, khana khan RŌNGPU rathla khan Bek-inn akasip sō kha kaleihmu.

⁶Mipa kha kasira khan kangir, khana Bek-inna inphut RŌNGPU’n kahnenga ṭong ahri kha katheia kae:

⁷“Akathithei mihring, hinahin kei reng in-ongna ka-om. Hinahin kei Israelhei kâra ka-om sik eng khana ahei tik a anchunga vai karôn sik. Israel mipui leh anreng he’n pathen ralak ankamuk a khana anrenghei kathi kalōng kha hinahin anhre heia kei rahming intheng hi avea hmesetna apek mak jo hei ning.

⁸Reng he’n anreng innhei kotkung leh kot kachohei kha kei Bek-inn kotkung leh kot kachohei inhngetchak a ansyem hei, kankâra bang inkhat rōk in akhar unga kae. Anṭōn tlona mater ka-om rakip khan kei rahming intheng hi hmeset anpek a kae, khana kei hnuk natna khan anmani kasuk manhmang hei.

⁹Tûnchu anmani’n pathen ralak kamukna kha akabâng sik hei kae khana anrenghei kathi kalōng kha antalosōt sik kae. Khanga antlo’nchu, kei ankâra ahei tik a ka-om sik eng.”

¹⁰Khana RŌNGPU’n amanjōm a, “Akathithei mihring, Israel mipuihei hneng Bek-inn chungchânga hripek hei roh, hiva mantlukna chunga mandon hei rasoh. Anmani set tlona chunga inzakna pek hei roh.

¹¹Khana anmani anṭōn tlona chunga inzakna annei inchu, Bek-inn mantlukna kha anhnenga hrimanchên pek hei roh, khachu: ahme leh achâng, ashunga hlutna leh sōkna, asin leh alen, mantlukna heirakip, khana sedân chôndânhei seng. Hihei rakip heikhonga mantluk dek a aka-om hei, heikhonga sedânhei seng hi tlosōtthei sik mo tina hei kha anmani hei sik a mazetsōt pet roh.

¹²Hivahi Bek-inn sedân kae ti chu: tlâng bilik a akimve ram seng kha akaṭha leh a’ntheng kae.”

¹³Bek-inn tena hmangchâk kha anhmang nôk a, hihei hi maichâm tena kha kae. Maichâm kung kimve khan tui lōngna centimetre 50 inthûk, 50 abei ka-âng, vângtinga akhama ahmor kha centimetre 25 inshânga kae.

¹⁴A’ntungna kung chunga inphut maichâm thōi intongpen kha, metre inkhat inshâng. Abâna thâk, aphôr hi khava ahmora inphut akimvea centimetre 50 ashung kahlutdet a ansyem, khavakha metre 2 inshâng. Khava bânna aden nôk kha’m ahmora inphut centimetre 50 ashungting kahlutdet a ansyem.

¹⁵Hiva achungpen athōa hin inthoinahei anro mankhut heia kae, hivahi’m metre 2 inshâng. Arakir manlia ahmor kasonghei khan achung hmai kanek a inshângdet hei.

¹⁶Maichâm achunga den hmai kha adung avai in-ang, asir rakip a metre 6 et kae.

¹⁷Alaia den kha’m adung avai in-ang, asira metre 7 et kae, avângtinga akhama ahmor inshâng kha centimetre 50 kae. (Tui lōngna kha centimetre 50 inpâk.) Maichâm chung kena, kechōnna kha nisōtinga asira ka-om.

¹⁸Chunghnung RŌNGPU’n kahnenga ahri, “Akathithei mihring, heimo kahri hi rangei roh. Maichâm kha ansyem pha, khava chunga ro-inthoina natloa inthoina ranthi achunga nakathinga tōksōtna nanei sik kae.

¹⁹Zadok a inphut ahong kakōn Levi phunga thempu rōk hei kha kei omna ani inzen sik akahong sik hei kae. Hivahi Chunghnung RŌNGPU ke’n ṭong pekna kanei kae. Setna sik a inthoina tōk sik a sehratche anhnenga napek sik hei kae.

²⁰Khava thi kha ajing nalo sik, khavakha maichâm chunga arakir manlia ahmor kasong heia nasun sik hei, khana alaia den a arakir heia, khana akham kimvea nasunthlōn sik hei kae. Hing’hin nang in maichâm kha namantheng sik khana natōksōt sik kae.

²¹Setna sik a inthoina sehratche kha naloa bek-inn rajeia hmun inkhat a naro sik.

²²Ajîng kania nang in keche heite nōrna kase naloa setna sik a inthoina natōk sik. Sehratche vânga natlo kapōa maichâm kha athisen vâng mantheng sōtna nei roh.

²³Khavakha natlosō leh sehratche leh kemōngche leh lo hei roh, an-inhnia nōrna kase sik hei,

²⁴kahnenga heiṭhōi hei roh. Khahei chunga thempu khan chi akathek thlōn sik hei khana kahnenga inthoina aro sik hei kae.

²⁵Ni 7 shunga ani katai ke, sehratche, kemōngche setna sik a inthoina natōk sik. Ankhengpet a nōrna kase akachang sik hei kae.

²⁶Ni 7 shunga thempu he’n maichâm antamantheng sik khana hmangtheina sik a antamantluk sik kae.

²⁷Kanive kha athlengsōa, thempu he’n maichâm chunga romanvâm inthoina, mipuihei inlôikhôm inthoina tōkna antaphut sik kae. Kha achang inchu nankhenga chunga kei katlai sik eng. Chunghnung RŌNGPU ke’n kahri jo.”