Read Komrem EZEKIEL 44 Bible Online

EZEKIEL 44 - Komrem bible

EZEKIEL 44

¹Mipa khan bek-inn rajeia nisō intonga vângtinga kot khan aṭhōi eng. Kot kha inkira ka-om,

²khana RŌNGPU’n kahnenga ahri, “Hiva kot hichu inkir ṭhak a ka-om sik, mahlang hêrlo sik kae. Mihring inkhatbek in hmangthei mak ning, ajârchu Israel Pathen RŌNGPU kei hivahin akahlut eng kae. Hivahi a’nkir ṭhak sik kae.

³Kha’num kei omna, thlai intheng akasa sik vaikarôn rengsa khachu kasethei sik. Ama’n ashung intonga akhama, hlutna innden kha ajōna kahlut sik khana akasōk sik kae.”

⁴Khava sōa mipa khan Bek-inn hmatinga sak intong kot a khan aṭhōi eng. Ke’n ka-ena, RŌNGPU Bek-inn kha ama omna vâr kadi rik-rak khan kasip a kae. Kahmai raleia kakhup enga inlet eng,

⁵khana RŌNGPU’n kahnenga ahri, “Akathithei mihring”, nahmu leh nathei chunga namalung manhlut roh. Ke’n Bek-inn sedân chôndân kamanthei sik che. Khang khava mihei mo Bek-inn hlut aya khana ayamak kaṭhatak a manhret hei roh.

⁶“Khava Israel mi rahe kasehei kha manthei hei roh, anmani’n mater ka-om ṭōn antatlo hei kha Chunghnung RŌNGPU ke’n en-hnâm mak jo ning.

⁷Anmani’n ram hlop mi, vuntanlo hei anmanhlut heia kabek-inn anmanbōk, kahnenga ranthai leh thisen inthoina anitōk kâra kaṭong kajuimak hei khan Bek-inna kahlut hei. Khava jâra kami he’n kei intepna kha mater ka-om ṭōn rakip antloa anvōkkhōi jo.

⁸Anmani’n kabek-inn shunga bekdân intheng tlona khan inṭang mak jo hei, khava kanek a ram hlop mihei kha anmanṭang jo hei.

⁹“Chunghnung RŌNGPU ke’n kaphôngsōt kae, vuntanlo ram hlop mi, kaṭong kajuimak mi, Israel kâra aka-om ram hlop mi inkhatbek in ka-Bek-inna hlutthei mak ning.”

¹⁰RŌNGPU’n kahnenga ahri, “Kei ani kadahlon leh limsyem inmuk hei, Levihei leh Israel mipuihei ankhenga ke’n karâkna kapek sik hei.

¹¹Anmani’n kot kahrung inṭang heia, Bek-inn ṭōn antlosōt a kei ani razen thei sik eng. Mipuihei ro-inthoina ran tōkna kha anthat thei sik, khana mipuihei razenna inṭangthei sik hei.

¹²Tâk-kha anmani’n Israel mipui sik a limsyem kamukna hlam ansât a hinga mihei setna tlona anṭhōi hei jâra anmani karâk sik hei kae tia Chunghnung RŌNGPU kei intep jo eng.

¹³Anmani’n thempu changa arazen mak jo hei ning a-emak leh kei neinâk intheng inkhatbek hnenga a-emak leh Hmun Inthengpena khan hlutthei mak hei ning. Hivahi anmani’n mater ka-om ṭōn antlo jâra karâkna kha kae.

¹⁴Ke’n anmani Bek-inna sōkṭōn tlona sik a kangense sik hei kae.”

¹⁵Chunghnung RŌNGPU’n ahri, “Zadok a inphut ajōng kakōn Levi phunga thempuhei khan, Israel mipui he’n kei hnenga inphut ansesōt jo pha, anmani’n Bek-inn shunga taksen theitak a ani razen manjōm. Khava jâra kei inzen sik leh kei omna inthoina ranthai leh thisen tōkna ani inzen sik kha anmani kae.

¹⁶Anmani rōk ka-Bek-inna kahlut sik hei, kei maichâma ani razen sik, khana Bek-inn kamukna kha hlam ankei sik.

¹⁷Bek-inn ashung intonga telai jōnna kot a anhlut pha, anmani pōn innem vânga inret sik hei. Bek-inn shung intonga telaia ṭōn antlo pha sahme pōn inkhatbek anta’nsi mak sik kae.

¹⁸Anrathlen asōk makna sik a pōn innem lukôm ankôm sik, pōn innem tōka annei sik tâk-kha khōnkir chu neimak hei ning.

¹⁹Mipui omna, vâng intonga telaia anse mak hma anpōn leh der, Bek-inna ṭōn tlolai invonna hei kha hmapena anta’nlosōt sik kae khana innden intheng heia antadahlon sik kae. Anpōn intheng hei khan mipui manbōkna achang makna sik pōn hlop a’nvon sik hei kae.

²⁰“Thempuhei kha’n ansam vo mankekmak hei ning khana ansam um manseitak mak hei ning. Katluk hrep a ansam ankhâk sik.

²¹Thempu he’n ashung intong telai anhlut mak hma ju anta-inmak sik kae.

²²Thempu inkhat in mihei inṭhenpuisa nuhmei a-ompui mak sik, Israel nuhngâk intheng rōk a-emak leh thempu nuhmei renghmeinu rōk a-ompui sik kae.

²³“Thempu he’n kamihei hneng a’ntheng leh a’nthengmak in-ang makna, khana beklanga a’ntheng leh akabōk in-ang makna antamanthei sik hei kae.

²⁴Dân dungjuia inkhena a-om pha, thempu he’n kei dân dungjuia ṭong antatan sik. Kei sedân chôndân dungjuia beklanga revei antanit sik, khana Châmhngat kani kha inthenga antanit sik kae.

²⁵“Thempu inkhat in kathi kalōng atôn jâra beklanga intheng makna atlo mak sik kae, khavakha anu, apa, asa, anai, a-emak leh inn laneilo asernu achangmak inchu.

²⁶Ama kha inthengna atlo pha, ni 7 ahngâk sik,

²⁷khava sōa avea Bek-inna ṭōn arazen theina sik, Bek-inn ashung intong telaia kasea ama intheng sōtna sik a inthoina atōk sik. Chunghnung RŌNGPU ke’n kahri jo kae.

²⁸“Ke’n Israelhei hneng khang inkhat a inphut khang inkhat a karōi kapek hei kâra thempu ṭōn hi thempu he’n antachen jo kae. Anmani chu Israel shunga karōi chenmak hei ning; antarangei kha kei eng kae.

²⁹Hmuchi tōkna, set-inthoina khana malesōtna tōknahei seng kha thempuhei thlai kae sik, khana Israel shunga kei chen sik a ṭhensōt rakip kha anmani’n anrahlâng sik.

³⁰Thempu he’n hma kakeipen sâng khôm akaṭhapen rakip kha leh kei hneng tōkna rakip kha antachen sik kae. Mihe’n buhlom ansyem akaia, ahma kakeipen buhlom kha, tōkna inkhat a thempuhei hneng anpek sik hei, kei mahâmṭhatna an-innshung heia katlung sik.

³¹Thempu he’n va leh sha akathisa a-emak leh sha ahlop inkhat tathat heikhat sâk mak hei ning.”