Read Komrem EZEKIEL 45 Bible Online

EZEKIEL 45 - Komrem bible

EZEKIEL 45

¹Ram kha phung rakip hei chen sik a ansem pha, ṭhen inkhat khachu RŌNGPU sik a tōksōt sik kae. Khavakha kilometre 12 leh aher kasei leh kilometre 10 avai sik kae. Ram rajei kha a’ntheng sik.

²Hiva rajeia hin adung avai in-ang hmun inkhat Bek-inn sik a aka-om sik, adung avai metre 250 akae sik, khavakha akimvea ramhâng avai metre 25 khan akakim sik kae.

³Hiva ram aher inkhat, adung kilometre 12 leh avai kilometre 5 kha te sik kae, hiva shunga hin Bek-inn leh hmun intheng kha ahōmsō sik kae.

⁴Hivahi ram shunga hmun intheng akae sik, RŌNGPU Bek-inna ṭōn inzen thempuhei sik a ṭhensōt kha kae. Hiva shunga hin anmani inn leh Bek-inn sik a ramṭhen ka-om sik.

⁵Khava rajei aher inkhat kha Bek-inna ṭōnkatlo Levihei sik a ṭhensōt sik. Khava shunga an-omna sik khōpui aka-om sik hei kae.

⁶Hmun intheng hnengtak a hin, ramṭhen inkhat, kilometre 12 leh aher avai in-ang, khōpui syemna sik khana khan Israel mi tu inkhat an-om theina sik ṭhensōt sik kae.

⁷Ram vaikarôn reng sik a ram ṭhensōt sik. Hmun intheng rajeia tlaitlâk tinga ramria inphut Mediterranean Tuipui tlaitlâk katlung akasei sik; khana nisōtinga inphut aram a nisō ramri katlung sik, hivahi aram kasei kha Israel phunghei chen ramṭhen inkhat leh man angna sik a kae.

⁸Hiva ram rajei hi Israel ram shunga vaikarôn rengsa inkhat in achen sik, hivahi ama’n mipuihei akachok makna sik hei, khana ram alakseng kha Israel phung he’n anchen theina sik a kae.

⁹Chunghnung RŌNGPU’n ahri, “Nangni Israelhei renghei, pha kasôttak setna nanheitlo jo! Nangni mivōk mithat, mi nantasuk manrim hei kha bâng jo ruh. Akadik leh a’ntheng kha tlo ruh. Nangni’n kamihei anrama inphut nantahnong sōt hêrmak sik hei kae. Chunghnung RŌNGPU ke’n hi kahri jo.

¹⁰“Mi rakip in kher tena hlung leh pat-hrui kadik a nantahmang sik kae:

¹¹“Neinâk kachâr tena epha kha leh atui tena bath kha a’n-ang sik hei kae. Mipui tena ngai khachu homer kae. Neinâk tena mantōkna kha hinga kae: 1 homer = 10 epha = 10 bath

¹²“Nangni tena hei kha hinga sik kae: 20 gera = 1 shekel 60 shekel = 1 mina

¹³“Hiva tena dungjuia nangni tōknahei kha nantapek sik kae: Gehu: nantakhômsōt ṭhen 60 a ṭhen 1 Be: nantakhômsōt ṭhen 60 a ṭhen 1 Olive thai: Nanthei kara ṭhen100 a ṭhen 1 (Khavakha bath: 10 bath = 1 homer = 1 kor.) Kemōng: Israel ramhânga kemōng 200 a kemōng 1 sik kae. “Nangni’n hmuchi tōkna, apum a rona sik a ran, inlôikhômna tōkna ran, nanset rangei mandamna sik a nantaheichoi sik kae. Chunghnung RŌNGPU ke’n ṭong kapek chei kae.

¹⁶“Ram shunga mi rakip in hiva inthoina hi Israel vaikarôn hnenga antachoi sik kae.

¹⁷Thlather revei, Châmhngat kani leh revei ralak a Israel jât pumpui sik a romanvâm, hmuchi inthoina, ju inthoina heia tōknahei keisō sik hi aṭōn kae. Ama’n set-inthoina, hmuchi inthoina, romanvâm inthoina, inlôikhôm inthoina, Israelhei setna losōtna sik a tōkna rakip akeisō sik kae.”

¹⁸Chunghnung RŌNGPU’n ahri, “Thla hma inkeia kani hma-inkei ning nangni’n Sehratche nōrna kase inthoina nannei sik khana Bek-inn nanmantheng sik.

¹⁹Thempu khan hiva set-inthoina thisen kha ajing alo sik, Bek-inn kot kachohei chunga, maichâm rakir manlia, ashung intong telaia, kot kacho heia akano sik.

²⁰Khava thla shunga ni 7 ning nangni’n tu inkhat in tlo sik a intluk loa setna avatlo a-emak leh manhret theiloa set katlohei kahlanga inthoina kha nantōk nôk sik a kae. Hing’hin Bek-inn kha nanta mantheng sik kae.

²¹“Thla hmakakeia kani 14 ning Rakan Kût nantanit sik kae. Chê philo buhlom mi rakip in ni 7 nantasâk sik kae.

²²Kani hmakakei ning vaikarôn reng leh mipui setna sik a Sehratche inthoina atōk sik kae.

²³Revei shunga ni 7 kha ani katai RŌNGPU hnenga inthoina sehratche 7, kemōngche 7 nōrna kase rōk ro manvâm sik a atōk sik. Set-inthoina sik a ani katai keche atōk sik.

²⁴A’ntōksōt sehratche leh kemōngche kha leh inṭhōia hmuchi litre 17 leh aher khana olive thai litre 3 tōksa sik kae.

²⁵“Rabuk Kût kha thla 7 tlukna ni 15 ning inphut sik, reng khan ni 7 shunga set-inthoina, ro-inthoina, hmuchi inthoina leh olive thai inthoinahei kha ahma kakei kapōa atōk sik hei.”