Read Komrem EZEKIEL 47 Bible Online

EZEKIEL 47 - Komrem bible

EZEKIEL 47

¹Mipa khan Bek-inn hlutna kot a aṭhōi male eng. Khava ahlutna thōia inphut tuisam hong kapût a nisōting, Bek-inn hmai hngetna ramkeiting kalōng. Khavakha Bek-inn thlang intonga aṭhen khat thōia inphut maichâm thlâng sir kha apetanna kalōng inthla.

²Mipa khan bek-inn rajeia inphut sak tinga kot sena hlam a khan aṭhōisōt eng, khana nisō kahnget kot kimvea khan aṭhōi eng. Khava kot thlang tinga asira inphut tuisam kapût kha ahlek-hlek a kalōng.

³Ama tena sungtlōn vânga khan nisōtinga tui lōngna kha metre 500 atesōt khana tui lōngna kha heijuina sik a amanthei eng. Tui kha kake ârtui hrepte inthûk.

⁴Khana ahlop a metre 500 atesa nôk, khan chu tui kha kamarkhup aphâk jo. Ahlop a thōiting atesa nôk, tui kha kakhōn aphâk jo.

⁵Ama’n metre 500 atesa nôk, khava pha khan chu tui kha inthûk hêr jo, ashunga petan tor mak jo eng. Khavakha tui jâp inbe tei loa rakantor changmak jo.

⁶Ama’n kahnenga ati, “Akathithei mihring, hihei seng hi manhret kaṭha roh.” Khava sōa mipa khan tuidung panga aṭhōi male eng,

⁷khana khan katlung pha tuidung pang heia thingkung katamtak kavahmu hei.

⁸Ama’n kahnenga ati, “Hiva tuidung hi ram shunga hin nisō atlâk a kalōng khana thōitinga Jordan Phaichama katlung. Hivahin Tuipui Kathia alōng pha, khava hmun a chitui kha tui insimreng vânga avathleng jo.

⁹Khava hmun a tuisam alōngna khan sha leh nga jât rakip ka-om hei. Tuisam lōngna khan Tuipui Kathia tui kha amansim sik, khana alōngna rakip a hringna apek sik.

¹⁰Engedi Tuiripût a inphut Eneglaim Tuiripût katlunga, tuipui panga nga kasur hei ka-om sik hei, khana khan anmani’n anlenhei kha manchârna sik anphōi sik hei. Khana khan Mediterranean Tuipui kapōa nga jât rakip ka-om sik.

¹¹Tâk-kha tuipanga ka-om tuikōk tuikhurhei khachu insimmak hei ning. Khahei khachu chi sōkna kachang sik hei.

¹²Tui lōngna apang heia sâk thei kapek sik a thingkung kahmông sik hei. Anbōhei kha invōi tik neimak hei ning, kara inra loa om hêrmak hei ning. Athla kataia kara ather inra sik hei, ajârchu Bek-inna inphut ajōng kalōng tui kha inpek jo heia kae. Thingkunghei khan sâk theikara anpek sik, khana anbōhei khan mipuihei damna sik anhmang sik hei.”

¹³Chunghnung RŌNGPU’n ati, “Hivahi phung 12 hei hnenga semsōt jo ramhei ramrihei kha kae, Joseph ram chen ṭhen hni leh inṭhōia.

¹⁴Ke’n ka-ôrtak a nanpu sōnhei hneng hiva ram hi pek sik heia le’ntep eng; tûnchu nankâra in-anghrep a insem jo ruh.

¹⁵“Sak tinga ramri hi Mediterranean Tuipuia inphut nisōting katlâna Hethlon khōpui katlung, Hamath Rakanna atlâksōa Zedad khōpui katlung,

¹⁶Berotha leh Sibraim asor (hihei hi Damascus ramṭhen leh Hamath rengram akâra ka-om hei), khana Tikon (Hauran ramkeia ramri hnenga ka-om) khōpuia katlung.

¹⁷Khang’khan sak tinga ramri hi Mediterranean nisōtinga Enon khōpuiting katlân, khava sak tinga Damascus leh Hamath ramri rajei kha ka-om.

¹⁸“Nisō tinga ramri hi Damascus leh Hauran ramṭhen kâra hmun khat a inphut thlang ting katlân, Jordan Tuidung avasun khana Israel in tlaitlâk ting, Gilead in nisōting, khahei ramri vakachang, khana Tuipui Kathi panga Tamar katlunga kae.

¹⁹“Thlang tinga ramri hi Tamara inphut thlang-tlaitlâk asora Kadesh Meriba nêrdiram a tui omna hmun katlung, khava sōa Egypt hei ramri atlâk a sak-tlaitlâk ajuia Mediterranean Tuipui katlunga kae.

²⁰“Tlaitlâk tinga ramri hi Mediterranean tuipanga inphut sak tinga Hamath Rakanna tlaitlâk a hmun inkhat katlunga katlân.

²¹“Hiva ram hi nanphung shunga insem ruh;

²²hivahi nangnihei inhlinglo karōi akachang sik kae. Ramlak mi nankâra aka-om hei, sa leh nai akanei jo hei kha’m ram nansem pha chen anta’nnei sik kae. Anmani kha pui katluktak Israel milai inkhat a nanta lo sik hei kae khana Israel phunghei leh inṭhōia chen neisapna sik a vâng-enna antaneisap sik kae.

²³Ramlak mihei kha an-omna phunghei leh chen antaneisap sik kae. Chunghnung RŌNGPU ke’n kahri jo.”