Read Komrem EZEKIEL 48 Bible Online

EZEKIEL 48 - Komrem bible

EZEKIEL 48

¹Sak tinga ramri hi Mediterranean Tuipuia inphut nisō atlâk a Hethlon khōpui katlung, Hamath Rakanna, Enon khōpui katlung, Damascus leh Hamath rengramhei ramri katlung. Phung rakip in nisō ramria inphut tlaitlâk tinga Mediterranean Tuipui katlung ramṭhen anchen sik, sak tinga inphut thlang tinga ram sem kha hinga kachang sik: Dân Asher Naphtali Manasseh Ephraim Reuben Judah

⁸Abânna ramṭhen kha ahlopdet a hmangna sik a ṭhensōt sik kae. Khavakha sak leh thlanga avai kilometre 12 leh aher kachang sik, nisō leh tlaitlâk kha’m phunghei hneng pekna kha leh in-anghrep sik hei. Bek-inn kha hiva ramṭhen shunga ka-om sik.

⁹Hiva ramṭhen alaitak hin, hmun hlopdet, kilometre 12 leh aher adung, kilometre 10 avai, kha RŌNGPU hneng tōk mantheng sik.

¹⁰Them-pu he’n hiva a’ntheng ramṭhen hi antachen sik kae. Nisōa inphut tlaitlâk katlunga anram hi kilometre 12 leh aher sik, sak a inphut thlang katlunga kilometre 5 sik. Hiva ram alaiṭima hin RŌNGPU Bek-inn aka-om sik kae.

¹¹Hiva ram intheng rajei hi Zadok a inphut ajōng kakōn thempuhei chen sik kae. Anmani’n taksentak a anrazen eng khana akadik mak tlona, Levi phunga mi ralak-hei tatlo kapōa, Israel sahei kha tlopui mak hei.

¹²Khava jâra anmani kha Levihei ram chen rajei hnengtak a ahlopdet a ram antachen sik kae, khavakha heirakip a a’nthengpen sik kae.

¹³Levi he’m ram ahlopdet thempuhei thlang ting antachen sik kae. Khava kha’m nisō leh tlaitlâk a kilometre 12 leh aher, sak leh thlanga kilometre 5 sik kae.

¹⁴RŌNGPU hneng a’ntōksōt kha ram rakip a akaṭhapen kae, khavakha jōrna, khana hmun khat leh thlengna leh thōnna intlo theimak ning. Hivahi a’ntheng kae, RŌNGPU ta kae.

¹⁵Ram hlopdet rajeia dahlona aka-om kha, adung kilometre 12 leh aher khana avai kilometre 2 leh aher kha intheng mak, khavakha mipuihei tahmang sik kae. Anmani khana khan an-om leh anhmang thei sik. Khōpui kha alaitak a aka-om sik kae,

¹⁶khavakha adung avai a’n-ang sik hei, metre 2,250 et sik kae.

¹⁷Khōpui akimvea ramhâng metre 125 ka-om sik.

¹⁸Hmun intheng thlang ting bât khan khōpui kha ansyemsō leh a’nhlei ram kha, nisōtinga adung kilometre 5 leh avai kilometre 2 leh aher khana tlaitlâk tinga adung kilometre 5 leh avai kilometre 2 leh aher kha khōpui shunga aka-om hei sik a sâng leh be lingna hleia hmang sik kae.

¹⁹Khōpuia aka-om tu inkhat in, tu-tu phung achang inum, khava ram kha athlōthei sik.

²⁰Khang’khan alaiṭima ramṭhen lenje kha adung leh avai in-ang kilometre 12 leh aher sik kae, hivahi khōpui syemna ram hlōseng kha inveisa jo.

²¹Hiva ramṭhen nisō leh tlaitlâk a, Bek-inn, thempuhei ram, Levihei ram, khana khōpui kha a-omsō leh a’nhleiseng kha vaikarôn rengpa sik a kae. Khavakha nisōting kasea nisō ramri katlung khana tlaitlâk ting Mediterranean Tuipui katlung, khana sak ting in Judah hei ram in akake khana thlang ting in Benjaminhei ram in akake khum.

²³Hiva ahlopdet ram ṭhensōt thlang tinga, phung a’nhleiseng khan nisō ramria inphut tlaitlâk tinga Mediterranean Tuipui katlung anchen sik, sak a inphut thlang tinga ram kha hinga ansem sik: Benjamin Simeon Issachar Zebulun Gad

²⁸Thlang tinga asira, ramri kha Tamara inphut thlang-tlaitlâk ajuia Kadesh a nêrdiram a tui omna katlung, khana inphut sak-tlaitlâk a Egypt hei ramri ajuia Mediterranean Tuipui katlung kha Gad phunghei inpek hei.

²⁹Chunghnung RŌNGPU’n ati, “Khavakha Israel phunghei tahlō sik ramṭhen sem dân kae.”

³⁰Jerusalem khōpui hlutna kha kot 12 ka-om. Bang 4 et kha metre 2,250 kasei hei khana ashunga kot 3 et ka-om hei, inkhat et kha phung rahming inkha-khat anphō hei. Sak tinga banga kot-hei kha Reuben, Judah khana Levi anphō hei; nisōtinga banga aka-om kot-hei kha, Joseph, Benjamin khana Dân anphō hei; thlâng tinga banga aka-om kot-hei kha Simeon, Issachar khana Zebulun anphō hei; tlaitlâk tinga banga ka-om kot-hei kha Gad, Asher, khana Naphtali anphō hei.

³⁵Khōpui asir manlia bangdung kasei akhenga metre 9,000 kae. Tûna inphut khōpui rahming hi, “RŌNGPU hin ka-om!” a’nti sik jo kae.