Read Komrem EZEKIEL 5 Bible Online

EZEKIEL 5 - Komrem bible

EZEKIEL 5

¹RŌNGPU’n ati, “Akathithei mihring, chemjâm kangeijap inlo roh khan vâng nahnerhme leh nasam akhenga vona hmang roh. Nasam kha akahrik kher vânga te roh, khana ṭhen thuma ṭhensōt roh.

²Khava ṭhen thuma inkhat kha khōpui kekhum kha a’nchaisō leh khōpui shunga ro roh. Ṭhen inkhat nôk kha lo ina nang in khōpuia inphut vânga nasōk pha nachemjâm vâng khan tuk kachep roh. A’nhlei ahlop ṭhen inkhat nôk kha thli kâra kathek manchai roh.

³Sam ṭhahrep chu inda roh khana napōn hmor vâng katōm roh.

⁴Khava sōa ajingte losōt nôk roh, hmeishunga hlon manhlut roh, kâng jo hei rasoh. Khana inphut hmei kha Israel jât pumpuia akatlung sō sik kae.”

⁵Chunghnung RŌNGPU’n ati, “Jerusalema enroh. Ke’n amanu hi raleichung alaitak a kada kae, akimvea ram hlop rakip kada hei.

⁶Tâk-kha Jerusalem in kei ṭongpek chunga arahe kase khana jât-hlop hei kanek a amanu ṭhatchet mak khana akimvea ka-om ram hlop hei kanek a ṭong juichet mak ti hi amalâr. Jerusalem in kaṭong pek ahlon sōt khana kadân jui sik a hnōm mak.

⁷Tûnchu Jerusalem, Chunghnung RŌNGPU kei tahri hi rangei roh. Kei dân najui makna leh kaṭong pek najui makna hin nakimvea jât-hlop hei kanek a inrengna namasō chet a kae. Nang in jât-hlop hei chôndân najui jo.

⁸khava jâra, Chunghnung RŌNGPU ke’n kamanthei che khachu kei hi nang inrepui eng kae. Jât rakip in anhmuna sik a nachunga ṭong tanna kanei sik.

⁹Nang in kahōt rakip natlo jâra, ke’n Jerusalem kha hmalaia kaleitlo mak khana hnunga katlo nôk mak sik karâkna kha kapek sik.

¹⁰Khava tlona kara khachu, Jerusalema nu leh pa he’n ansahei ansâk sik hei khana ansa he’n nu leh pa ansâk sik hei. Ke’n kakarâk sik chei khana alakahringa aka-om hei kha kachai kathek sik hei.

¹¹“Achang jâra, kei akahring Pathen kachangna, hivahi Chunghnung RŌNGPU ṭong kae, nang in ka-Bek-inna ṭhatmak rakip leh mater ka-om ṭōn natlo jâra, ke’n lungsetna kasea kasuk mathlâk sik che.

¹²Nami ṭhen thuma inkhat nat leh vonṭâma khōpui shunga kathi sik hei; ṭhen khat in khōpui vânga chemjâm vâng tuktan sik hei kae; khana achaina ṭhen khat kha thli kâra kachai kathek sik chei khana chemjâm vânga manlōisōt sik hei kae.

¹³“Kei kamalung atluk mak lai seng kahnuk natna leh karahe setna ratha rakip kha nang in namanhret sik. Heirakip hi asōksō pha, taksenthei nachangmak jâra RŌNGPU ke’n kahnuknat nahnenga kahri kae ti hi nang in nahong manhret sik jo.

¹⁴Nakimvea jât-hei inphut nahneng vena akalôn rakip he’n anmanuisō chea nahnenga heihnai mak hei ning.

¹⁵“Ke’n nachunga kahnuk anat a karacham aset lai khana karâkna kapek chelai, nakimvea aka-om jât rakip in ṭit leh inpirna annei sik. Anmani’n materpuma an-en sik che khana anmanuisō sik che.

¹⁶Ke’n nathlai sâk sik manhmu mak che ning khana bu kamanhngōi sik che. Nang in vonṭâm inrengna kha the kangeijap inkhat, nang kasuk inhmang sik a, ahong inkâpsōt kapōa namanhret sik.

¹⁷Ke’n vonṭâm leh ramshahei kha nasahei kathat sik a kajōngtir sik hei, khana nat leh sat, innâk-inse, khana re hei nang kathat sik a kajōngtir sik hei. RŌNGPU ke’n kahri jo kae.”