Read Komrem EZEKIEL 6 Bible Online

EZEKIEL 6 - Komrem bible

EZEKIEL 6

¹RŌNGPU’n kahnenga ahri.

²“Aka-thithei mihring,” Israel tlâng ting son enroh khana kaṭong hi hripek hei roh.

³Israel tlânghei kha RŌNGPU ṭong anrangeina sik manthei hei roh, Chunghnung RŌNGPU ke’n tlâng, hmebung, kavakōk phaicham, khana phaichamhei hnenga ṭong kahri hi anrangeina sik a: Mipui he’n limsyem antakamukna hmunhei kasuk inhmang sik a chemjâm inkhat kajōngtir sik.

⁴Maichâmhei kha suk manset sik hei kae khana marim katui maichâmhei kha vōkkhōi sik hei kae. Khana aka-om mi rakip anlim hei hmaikunga thatsō sik hei kae.

⁵Israelhei kathi kalōng kha kakathek manchai sik hei; anruhei kha maichâm kimvea kakathek sik hei.

⁶Anmani maichâm leh limsyem rakip vōk mannōisōna sik, anmani marim katui maichâmhei suk mansetsōna sik, khana anta leisyem heirakip manhmangsōna sik a Israelhei khōpui rakip suk manhmang sik hei kae.

⁷Hmuntina mihei that sik hei, khana alakahring hei kha’n kei hi RŌNGPU eng tia anta honghnōm sik kae.

⁸“Khava mithatna inphut ṭhahrep chu kamantlânsōt sik hei khana jât-hlop hei kâra kamanchai kathek sik hei,

⁹khana khan anmani rehring sura ka-om sik hei. Khana anmani’n kei anhong mandonsōt sik eng, khana ke’n karâkna leh hmaimôkna kapek hei kha anhong manhret sik, ajârchu anmani taksenna kaneimak malung khan andahlon enga kei kanek a limsyem jôk anmadu chet a kae. Anmani’n ṭhatmak leh insuk innemna ṭōn anleitlo jâra anbinga inter sik hei.

¹⁰Kei RŌNGPU eng khana kei gîkna pek hei hi môksek a maṭhitna kha changmak ti hi anhong manhret sik.”

¹¹Chunghnung RŌNGPU’n ati, “Nakut kathling roh! Nake katet roh! Israel in that mak leh mater ka-om ṭōn rakip antlo jâra malung inrengtak a ông roh. Anmani re tuk a, vonṭâma, khana hrisea kathi sik hei.

¹²Hmun kahlatak a aka-om hei kha nat a katlu sik hei khana kathi sik hei; akahnaia aka-om hei kha re tuk a kathi sik hei; alakahringa ka-om hei kha vonṭâma kathi sik hei. Anmani ankhenga kei hnuk natna ratha inhnak kha anhong manhret sik.

¹³Kathihei kha limhei leh maichâmhei akimvea khana hmebung inshânga, tlâng chunga, thingkung in-êm hnōia, sasōkung kalen hnōia, anmani’n limsyem hnenga ro-inthoina anleitōkna hmun rakip a inchai kathek sik hei. Khava sōa mi rakip in kei hi RŌNGPU eng kae tia anmanhret sik jo eng.

¹⁴Kadik, kakut karajitsōt sik khana anramhei kasuk manhmang sik hei. Sak tinga nêrdiram a inphut Ribla khōpui katlunga ramhânga kada sik, Israelhei omna hmun rakip inkhatbek ṭhensōt mak ning. Khava sōa mi rakip in kei hi RŌNGPU eng kae tia anmanhret sik jo eng.”