Read Komrem EZEKIEL 7 Bible Online

EZEKIEL 7 - Komrem bible

EZEKIEL 7

¹RŌNGPU’n kahnenga ahri.

²“Akathithei mihring, hivahi Chunghnung RŌNGPU ke’n Israel ram hnenga kahri kae: hivahi ram pumpui sik a achaina kha kae!

³“Israel, achaina kha kajōng jo. Nang in kahnuk natna kha namanhret sik, ajârchu naṭōntlo jâra ke’n nachunga ṭong katan. Na-omchen mater ka-om rakip jâra khan kha leh in-angtling kapek male sik che.

⁴Ke’n ṭhensōt mak che ning khana lungsetna inkhatbek malârpek mak che ning. Mater ka-om naṭōn tlohei jâra karâkna kapek sik che, nang in kei hi RŌNGPU eng kae tia namanhret sik jo eng.”

⁵Hivahi Chunghnung RŌNGPU tahri kae, “Nachunga inhmangna inkhat bâna inkhat ajōng katlung sik.

⁶Hivahi heirakip chunga kae. Hivahi achaina kha kae. Nang inchai jo che.

⁷Ram shunga ka-om nangni sik a achaina kha kajōng jo. Tlâng chunga kamukna hmun heia rōi omloa, inhmakna rōk a-omna sik pha kha kahnai jo.

⁸“Inrangtak a, tûn nangni’n kahnuk natna ratha kha nanmanhret sik jo. Nanṭōn tlosōt jâra karâkna kapek chei kae, omchen mater ka-om rakip jâra khan kapek male sik chei.

⁹Ke’n ṭhensōt mak chei ning khana lungsetna inkhatbek malârpek mak chei ning. Mater ka-om omchen nanleitlo jâra khan karâkna kapek sik chei kae, kei hi RŌNGPU eng khana karâkna nankape kha eng kae ti hi namanhret sik jo.”

¹⁰Israel sik a inhmangna kani kha kajōng jo. Intuk inthat jōng kapung jo. Inlensakna kha alêr katlung jo.

¹¹Intuk inthat in malung kaṭhamak amasō. Anmani nei leh hao, anlûrna leh anlenna heikhat bek um inhleimak ning.

¹²Apha kha kajōng jo. Neinâk rachôkna leh jōrna pha omtheimak ning, ajârchu mi rakip chunga Pathen karâkna kha in-angtlinga jōng kachu sik.

¹³Inveina katlo inkhatbek in anei inhmang kha chen malena sik a hringsôt mak ning, ajârchu Pathen hnuk natna mi rakip chunga kachua kae. Mikaṭhamak-hei kha hring tor mak hei ning.

¹⁴Pengkun a’nhring leh mi rakip inrin et hei. Tâk-kha re katuk sik tûte inkhat sesōt mak hei, ajârchu Pathen hnuknat kha mi rakip chunga katlung sik.

¹⁵Hlamdung heia re intuk sik hei khana innheia nat leh vonṭâm ka-om sik. Aram a inphut akasōksōt mi khan re tuk a kathi sik, khōpui shunga aka-om mi khan nat leh vonṭâma kathi sik.

¹⁶Ṭhen khat chu phaichama vaṭhu ajōng inpir kapōa tlâng ting katlânsōt sik hei. Ankhengpet a ansetnahei jâra inkōi sik hei.

¹⁷Mi rakip kut hei kha ratha hratna neimak hei ning, anmarkhup innok sik.

¹⁸Borapōn invon sik hei khana ahei tik a antaksa innok sik hei. Anlu anvo sik, khana ankhengpet a hmaimôkna anchen sik.

¹⁹Ansanahei leh andangka hei kha hlamdunga akachok neinâk heikhat kapōa anhlonsōt sik hei, ajârchu RŌNGPU’n ahnuknat kha ajōngsun pha ansana dangkahei khan huksōt tor mak jo hei. Khahei vâng khan anmani tamadu kha chentor mak hei khana anvon um mankhop tor mak a kae. Sana leh dangka khan anmani setna ting aṭhōi manhlut hei.

²⁰Pha khat a anmani ansana dangka hmeṭhat jâra inlensak hei, tâk khahei kha anmani’n mater ka-om lim syemna anhmang hei. Khava jâra RŌNGPU’n ankarōi khan manhângna jôk amanchang pek hei.

²¹RŌNGPU’n ati, “Ramlak mihei kamanchom sik hei khana dân kajuimak hei khan ankarōi rakip kamanlo sik hei khana anmanbōk sik jo.

²²Kei karōi manbukna Bek-inn ansuk manbōk pha, inru he’n ansukkhōia anhlut a anmanchok pha ke’n heite khâm mak hei ning.

²³“Heirakip inhmakna kachang jo, ram shunga mikathat-hei kasip jo hei khana khōpuihei kha intuk inthat in kasip sō jo.

²⁴Hinahin jât kaṭhamak pen hei kha kaheiṭhōi sik hei khana nan-innhei kha anchen sik hei. Ke’n jât-hei kha nankamukna hmun heia kaheiṭhōi manhlut hei pha, nanmi ratha kaneipen hei kha an-in ngamna inhmangsō sik jo.

²⁵Inhlamrin makna kahong sik. Nangni’n mōngna nanjong sik tâk hmuhêr mak tin chei.

²⁶Insuk inhmangna inkhat bânna inkhat kahong sik, khana ṭong kahōimak ahrui-hruia inthei sik. Nangni’n sânkathemhei kha amak hma heimo antahmu kha anphôngsōtna sik a nanngek sik hei. Sânkathem he’n mipui hnenga manthei sik a heite neimak hei ning, khana kater he’n ṭong manse sik a heite neimak hei ning.

²⁷Reng in ṭajai asui sik, rengsa’n inhōrna neimak jo ning, khana mipui he’n ṭit jâra innok sik hei. Ke’n nanṭōn leitlo heirakip jâra karâkna kapek sik chei, khana nangni’n mihei ṭong nantatan kapōa ke’n nanṭong katan sik. Hivahin kei hi Pathen eng ti hi nanhnenga amalâr sik kae.”