Read Komrem EZEKIEL 8 Bible Online

EZEKIEL 8 - Komrem bible

EZEKIEL 8

¹Keini rehring sura kanva omna kum 6 tlukna thla 6 tlukna ni 5 tluk ning, Judah inphut rehring antasurhei hlamkakeihei kha ka-inna in-ongsap ung. Manhret manloa Chunghnung RŌNGPU ratha kha kachunga jōng katlung.

²Chungting ka-en pha hmei kasuk mihring lim kapō inkhat kahmu. Akhōna inphut thōitingseng kha hmei kasuk ka-ang, akhōna inphut chungting seng kha kanôt mantheng sum-êng kadi rik-rak ka-ang.

³Akut kapō inkhat ahei razit a kasama amatu eng. Hiva hmangtalâra hin Pathen rathla’n bōirōk a akeitou eng khana Jerusalema aṭhōi eng. Ama’n Bek-inn sak tinga kekot ashunga hlutna khan aṭhōi eng, khana khan Pathen hnuk inthakna limsyem inkhat leika-om.

⁴Khana khan ke’n Chebar Tuidung panga kaleihmu kapōa, Israelhei Pathen omna malârna vâr kadi rik-rak kaleihmu.

⁵Pathen in kahnenga ati, “Akathithei mihring, sak ting enroh.” Ke’n ka-en, khana khan kekot hlutna hnenga maichâm hnenga Pathen hnuk natna limsyem kha kaleihmu.

⁶Pathen in kahnenga ati, “Akathithei mihring, omchen kasōk kha nahmu mo? Hinahin Israel sahe’n mater ka-om ṭōn antatlosōt hi enroh, kahmun inthenga inphut hmun kahla chet-chet a anhnongsōt jo eng. Hiva kanek a mater ka-om chet ṭōn nalahmu hi sik.”

⁷Ama’n vângtinga tetlânga hlutna kekot a aṭhōi eng khana banga akhur kave inkhat amanhmu eng.

⁸Ama’n ati, “Akathithei mihring, bang kha hinahin vōkkhōi roh.” Kavōk manvea kot inkhat kahmu.

⁹Ama’n kahnenga ati, “Ashunga hlut roh, khana khan anmani’n akaṭhamak, mater ka-om ṭōn antatlo kha va-en roh.”

¹⁰Khava jâra kei kahlut enga kava-en. Abang kha mari leh ranhring intheng mak hei lim khana Israel he’n antakamuk neinâk ralak-hei limhei anmazet.

¹¹Khana khan Shaphan sapa Jaazaniah inveina Israel hlamkakei 70 leika-om hei. Inkhat et in marim katui ro mankhutna hmei thlengkam anchoi, khana marim katui khana inphut hmeikhu chungting kaketou.

¹²Pathen in ader eng, “Akathithei mihring, Israel hlamkakei he’n marûk katia antatlosōt hi nahmu mo? Anmani ankhenga lim kasiptak innden shunga kamukna anneia kae. Anmani manṭhatna khachu: ‘RŌNGPU’n eini ṭōntlo hi ahmu mak! Ama’n ram hi adahlon jo kae,’ anti.”

¹³Khava sōa RŌNGPU’n kahnenga ati, “Nang in hiva kanek a mater ka-om ṭōn antatlona nalahmu sik kae.”

¹⁴Khava jâra Bek-inn sak tinga kekot a aṭhōi enga nuhmei inkhat in Tammuz pathen thi jâra aṭapna kha amanhmu eng.

¹⁵Ama’n ader eng, “Akathithei mihring, khavakha nahmu mo? Mater ka-om chet ṭōn nalahmu hi sik.”

¹⁶Khan chu Bek-inn shungtinga tetlânga aṭhōi jo eng. Khava hmun intheng hlutna hnenga khan, maichâm leh mi hlutna akâra, mihring 25 kapō leika-om hei. Hmun inthengting khan kahnung ansong thlōn khana nisōting inkun heia kani ahong kasōk kha ankamuk.

¹⁷RŌNGPU’n kahnenga ati, “Akathithei mihring, khavakha nahmu mo? Hiva Judah mihei hi nang in hina nahmu jo mater ka-om omchenhei hi antloa ram shunga intuk inthatna antamanpung rōk hin tlai tor mak hei. Changmak, anmani hiva Bek-inn shunga kapha lakahong nger sik heia kha khanga anvatlo hi sik a kae, khana kahnuk antamannat chet hi sik kae. Enroh, kei dōina heituk a akaethei chenna inzak antapek jo eng mo!

¹⁸Anmani’n kahnuk natna rathahrat rakip anhmu sik. Ke’n anmani ṭhensōt mak hei ning khana lungsetna inkhatbek malârmak ning. Anmani’n antor chenna kare inrek a derna kahnenga annei sik, tâk ke’n rangei mak hei ning.”