Read Komrem EZEKIEL 9 Bible Online

EZEKIEL 9 - Komrem bible

EZEKIEL 9

¹Khava sōa Pathen ka-ông rasa kathei, “Hin hong roh, khōpui karâkna akapek sik mihei. Nanre hmangchâk-hei invon ruh.”

²Khatak khan pase 6 Bek-inn sak tinga vâng intong kekot a inphut, hmangchâk invon et a heikasōk hei. Anmani kâra rōipōn innem invonna heikhat mazet manhlut sik a akatlo inkhat ka-om. Anmani ankhenga sum-êng maichâm hnenga kahong heia kangir hei.

³Khan chu Israelhei Pathen omna vâr kadi rik-rak kha aleiomna, mathla kanei ranhringhei hnenga inphut chungting kaketoua kae, khana Bek-inn hlutna kekot ting kalônna kae. RŌNGPU’n rōipōn vânga invonpa hneng abek a,

⁴“Jerusalem khōpui shunga vase roh khana khōpui shunga mater ka-om rakip tlo jâra inrengna leh khōdeng theina akachang hei machea mêrchîkna inkhat et vadapek hei roh.”

⁵Khana Pathen in mihlop inkhat hnenga ṭong ahri kha kathei, “Khōpui shunga ama hi jui roh, khana mi vathat hei roh. Tûte inkhat ṭhenmak hei roh; lungset a rônmak hei roh.

⁶Katerhei, retherhei, nuhngâk-hei, nuhei. khana naipanghei vathat hei roh. Tâk-kha anmachea mêrchîkna inzet rakip tûte tônmak hei roh. Kei Bek-inn hinna inphut phut jo roh.” Khava jâra anmani kha Bek-inna akangir hlamkakei heia inphut anphut jo.

⁷Pathen in anhnenga ati, “Bek-inn kha manbōk jo ruh. Kathi kalōng vânga tetlâng kha mansip ruh. Ṭōn phut jo ruh!” Khava jâra khōpuia mihei kha anthat manphut jo hei.

⁸Mi anthatna shunga khan kabing rōk a leika-om eng. Kahmai raleia kamakhup a ka-ông eng, “Chunghnung RŌNGPU, Jerusalem chunga nahnuk akana hêr mo, Israel a’nhleia alakahring rakip that sik nati mo?”

⁹Pathen in amasôn eng, “Israel leh Judah mihei ṭit ka-om tak setna ṭhena kha antlo jo. Ram pumpui shunga mi anthat jo khana Jerusalem hi tloṭhena vâng rōk a anmansip jo. RŌNGPU ke’n anram kadahlon pek heia, anmani hmumak jo hei eng tia anmani’n anti.

¹⁰Tâk-kha ke’n anchunga lungset rônmak hei ning; anmani’n mi hnenga antatlo hrep kha ke’n anchunga katlo sik.”

¹¹Khan chu rōipōn invon pasepa kha hong inle jo khana RŌNGPU hneng thang akōi, “Naṭongpek kha katlosōt jo.”