Read Komrem DANIEL 10 Bible Online

DANIEL 10 - Komrem bible

DANIEL 10

¹(Cyrus in Persia reng achang kum 3 tlukna Belteshazzar tia’m a’nhret, Daniel hneng ṭong inkhat hong inlâr. Khava ṭong khachu kadiktak a manhret sik le’ntak hêr. Khavakha ahnenga hmangtalâra ahri manchên pek a kae).

²Khava pha ke’n kanive 3 kha ṭajai kasuia kae.

³Kanive 3 a’nchaimak kârseng thlai katui achangmak leh hme leisâk mak eng, ju lei-in mak eng, kasam um leikhui mak eng.

⁴Khava kum a thla hmakakeia kani 24 ning, tuitlân inhnak Tigris tuidung panga kangir eng.

⁵Ke’n chungting ka-ena pōn innem kasi khana sana intheng vâng khōnkir invon mi inkhat kaleihmu.

⁶Ataksa kha rangkachek kapōa leikavâr. Ahmaisō kha khō inphe kapōa kade, ahmit-hei kha hmei kasuk kapōa kasen. Abân leh ankepha kha kanôt jo sum-êng ka-ang, khana akaresō kha mipuihei rasa ka-ang.

⁷Khava hmangtalâr kahmu kha kabing rōk eng kae. Kei leh aka-omsap hei khan heite hmumak hei, tâk anmani kaṭi heia, katlân heia le’nthup hei.

⁸Kabing rōk a khana khan inlaktak hmangtalâr kha kalei-en. Ratha inkhatbek leinei mak eng, khana kahmaisō inthleng joa tûte’n amanhret mak jo hei.

⁹Akaresō kathei pha, heite manhret lo hêra raleia katlu eng, kahmai kamakhup a ka-om eng.

¹⁰Khava pha, kut inkhat in amatu eng, kakut leh kamarkhup vânga amanngir eng; kei khava katlunga le’nnok eng.

¹¹Ngeva khan kahnenga ati, “Daniel, Pathen in alungset che. Ngir ina ke’n heimo kahri sik kha malung kahlut a rangei roh. Nahnenga kei ajōngtir eng kae.” Ama’n hi ahrisōa, kei kangirsōt eng, khava katlung kei le’nnok eng.

¹²Khava sōa ama’n ati, “Daniel, ṭitmak roh. Manhret theina naneina sik a, insinsak a omna sik a, namandon ninga inphut Pathen in naderna kha athei pek jo che. Naderna insôn sik a akahong eng kae.

¹³Persia rengram kahngâk ngeva rengsa khan kani 21 aleikhâm eng. Khava sōa ngevahei lukaching Michael kha kei inthōpui sik a kajōng, ajârchu Persia ram shunga kabing rōk a andahlon jo enga kae.

¹⁴Namihei chunga hnunga heimo ahong kasōk sik kha manthei che rong tia akahong eng kae. Hivahi hnunga ahong kasōk sik hmangtalâr kha kae.”

¹⁵Ama’n hi ahri pha, ke’n ṭonghri loa, raleia kalei-en.

¹⁶Khava pha, mihring hme kapō ngeva khan akut ahei kabâna kahner aleisit. Ke’n ahnenga kahri, “Oja, hiva rahmang hin ratha amannei hêrmak, kataksa innok hi bâng tor mak joa kae.”

¹⁷Kei hi sōk inkhat in akapupa hmaikunga akangir kha ka-ang jo eng. Heikhonga mo ke’n nahnenga ṭong kahritor sik? Kei ratha neimak jo eng khana kaphuk sânthei mak jo eng.”

¹⁸Ama’n amatu nôk enga, kei ratha kahong nei det jo.

¹⁹Ama’n ati, “Pathen in alungset che, khava jâra heite’n manrim mak che rasoh khana ṭitna pek mak che rasoh.” Ama’n hi ahrisō pha, kei ratha kaneichet joa kahri, “Oja, heimo nahri sik kha amanthei roh. Nang in namanṭhat det jo eng.”

²⁰Ama’n ati, “Heijâra mo nahnenga akajōng eng namanhret mo? Akadik Lekharabua a’nzet kha nahnenga phôngsōtna sik a kae. Tûn kei inle nôk sik eng, Persia ram kahngâk ngeva kha kava’nrepui sik. Khava sō leh, Greek ram kahngâk ngeva hong inlâr sik. Israel kahngâk ngeva, Michael, tei loa tûte ka’nthōpui sik om mak a kae.”