Read Komrem DANIEL 11 Bible Online

DANIEL 11 - Komrem bible

DANIEL 11

¹“Ama kha kei inthōpui leh kakahrunga a’nṭang kae.

²Khana ke’n tûn nahnenga kahri sik hi akadik kae.” Ngeva khan ahri, “Reng 3 he’n Persia vai anhongrôn sik, aralak-hei kanek a akahaopen, 4 tlukna inkhat in ankahnunga hong ka-om sik. Ama ratha neina leh sêr leh sum kaneitak ahongchang pha, Greek rengram chunga aheidōi sik.

³“Khava pha ratha kaneitak reng inkhat hong ka-om sik. Ama’n ram kalentak chunga vai ahong rôn sik, khana amadu chenna atlo sik.

⁴Ama’n ratha kaneitak ahongchang pha, aram hongkakōi sik, alang manlia inṭhen sik. Ama sōn aka-emak reng he’n ama kahlanga vai anhongrôn sik, tâk ama rathanei kapōa chu nei tor mak hei ning.

⁵“Egypt rengpa kha ratha ahongnei sik: Arehlam kakeihei kâra inkhat in ratha ahongnei chet sik khana akalendet ram chunga vai arôn sik.

⁶Kum ṭhahrep kahnunga Egypt rengpa’n Syria rengpa leh hong inthlop sik hei, khana ama’n asanu Syria rengpa hneng apek sik. Tâk-kha an-inmattōna kha sôtmak ning. Amanu, apuise, asahei khana ama leh akasesap asōk-hei rakip anthatpet sik hei.

⁷Hnunga inrangtak a amanu innkō kasōk mi inkhat in reng hongkachang sik. Ama’n Syria rengpa remihei chunga re ahongtlo sik, anrekur shunga kahlut sik, khana ator sik hei.

⁸Ama’n an-pathenhei limsyem khana khava pathenhei hneng antapek sōt sana leh dangka neinâk-hei kha Egypt a ahei choi male sik hei. Kum kasôttak intōk inchamna a-om kahnunga

⁹Syria rengpa’n Egypt a re avatlo sik, tâk rumhrat a akahnung he’nle sik.

¹⁰“Syria rengpa sahe’n re tlo sik a intluk sik hei, remi katamtak anmantûp sik hei. Ankâra inkhat in tuishâng kalen inkhat kapōa inranga kase sik, inrepuihei rekur inkhat asukkhōi sik.

¹¹Egypt rengpa’n ahnuknat jâra Syria rengpa chunga re avasō sik, aremi katamtak rehringa ansur sik hei.

¹²Khana ama’n remi katamtak athat heia retorna anei jâra inlensak sik, tâk ama’n pha kasôttak re tor mak ning.

¹³“Syria rengpa inle nôk sik, hma kanek a remi katamchet akhôm mantûp sik hei. Aphahrep ahongtluk pha, ama’n remi katamtak revon kaṭhadek a a’nvon hei kha leh hong inle nôk sik hei.

¹⁴Khava pha mi katamtak in Egypt Rengpa chunga re anhongtlo sik. Khana Daniel, najât shunga mi inphin ṭhahrep he’n antahmu hmangtalâr jâra khan re antlo sik, tâk antor sik hei.

¹⁵Khava jâra Syria rengpa’n inkurkhum khōpui inkhat akekhuma ahlō sik. Egypt remi he’n rede manjōm mak hei ning; remi kaṭhapen hei katlunga’m ratha neimak hei ning.

¹⁶Syria re katlopa khan anmani kha akating sik omloa alungdo hrep a ahmang sik hei. Ama’n Intepna Ram a khan kangir sik, khavakha akhenga ama ratha neina thōia ada sik.

¹⁷“Syria rengpa’n aremi rakip akhôma resōna amantluk sik. Khava pha, ama’n a’ndōipuipa rengram suk manhmangna sik a ama leh inmattōna asyem sik khana ama hnenga asanu ompui sik a apek sik; tâk aṭōn mantluk kha hmesō mak ning.

¹⁸Khava kahnunga ama’n tuipui panga ka-om jât-hei chunga re atlo sik, ankâra jât katamtak ator sik hei. Kha’num ram hlop hlamkakei inkhat in ama aheitor sik, a’nlensakna kha amanbâng pek sik jo; kadiktak a Syria rengpa inlensakna kha achung kalena amanlet pek sik.

¹⁹Rengpa kha aram a rekur a inle sik, tâk-kha ama kha re antor sik, khavakha ama inchaina kachang sik.

²⁰“Ama kha reng ahlop inkhat in abân aheijom sik. Khana ama’n arengram nei leh hao apungna sik ṭōnkarôn mi inkhat atir sik a kha amipuihei hnenga ramsêrṭhei aman pek heia amipuihei kha khōdeng amanthei sik hei pha bongkhat shunga rengpa kha anthasōt sik, khavakha mipuihei manhretna leh re tlona hmun a emak ning.”

²¹Ngeva khan ahri manchênsa: “Abânna Syria reng hichu mikaṭhamak, reng changna sik ahlam um sōklo kae, tâk manhret phâkloa ama kahong sik khana mihōnna vânga reng hongkachang sik.

²²Ama kadōi rakip, Pathen Thempu Kalen katlung um, suk manhmang sik hei kae.

²³Inhnōmna asyema ama’n jât-hlop hei ahōn sik hei, jât kasin inkhat reng achang ravâng, ama ratha ahongnei chet-chet sik.

²⁴Ama’n akanei akahao ram inkhat chunga manthei loa, re atlo sik khana apa-apu hei taleitlo phungmak ṭōn atlo sik hei. Rea aheichomsōt neinâk-hei kha, akahnung kajuihei hneng asempek sik hei. Ama’n rekurhei sukkhōina sik atlo sik tâk ama pha inranga hong katlang sik jo.

²⁵“Ama’n Egypt rengpa chunga re tlona sik a inlensaktak a remi katamtak akhôm sik, Egypt rengpa khan remi ratha kanei katamtak vânga ahei indōipui sik. Tâk-kha Egypt rengpa kha hōnmathlâk kachang sik, khana hmesō mak ning.

²⁶Ama inhnai puipen mansena kaneipa khan ama amanhmang sik. Aremi katamtak kathi sik hei, aremi rup-hei kathisō sik hei.

²⁷Khava pha reng 2 hei kha thlaisâk sik a dokhâng inkhat a in-ongsap sik hei, tâk anmalung rôn chu ṭhamak ning, khat leh khat maleiseia inbek sik hei. Anmani tamadu kha chenmak hei ning, ajârchu khava sik a pha latluk mak a kae.

²⁸Syria rengpa’n rea aheichomsōt neinâk rakip ahei choia a-inna he’nle sik, Pathen mihei bekdân suk manhmang sik a ngirna anei sik. Ama’n amaduhrep atlo sik khana khava sōa aramting inle sik.

²⁹“Hnunga ama’n Egypt a re atlo nôk sik, tâk hiva chunga chu omje ahlop kachang sik jo.

³⁰Roman he’n tui rakōnga kahong sik hei, ama an-inrepui sik, ama ṭitna anei sik jo. “Ama hnuknat a inle sik, Pathen mihei bekna kha suk manhmang sik a atlo sik. Khava bekna kadahlon hei mansena kha ama’n ajui sik.

³¹Aremi ṭhahrep in Bek-inn ansukset sik. Anmani’n ani tina inthoinahei anmanbâng sik, khana ṭit ka-om tak omchen anmasō sik.

³²Rengpa’n ami hōnna vânga, anbekna kadahlonsa hei inthōpuina kha achen sik, tâk Pathen kahnung kajuihei khan chu re ande sik.

³³Mipuihei hlamkakei kasinghei khan chu ansingna kha mi katamtak hnenga ansempek sik hei. Tâk-kha pha bongkhat re shunga ṭhahrep chu anthat sik hei a-emak leh hmeia anro hlon sik hei, ṭhahrep chu anchom heia ankhum sik hei.

³⁴Inthatna asōklai khan, mi katamtak in binga hnemna anjonga khanga anbôm ravâng, Pathen mihe’n inthōpuina ajingtehrep anhmu sik.

³⁵Mikasing ṭhahrep chu anthat sik hei, tâk khana inphut mipuihei inthengsōt sik hei. Hivahi Pathen in atupsa pha inchaina ahong mak hma senga akasōk injom sik kha kae.

³⁶“Syria rengpa’n alungdo hrep a kachôn sik. Ama’n pathen rakip kanek a, Chunghnung Pathen kanek a’m kalen eng tia inlensak sik. Pathen in akarâkna sik pha ahong mak kârseng ama’n khanga atlo tor sik. Pathen in amantluk kha atlo nger sik kae.

³⁷Reng hin apa-apu hei tarazen pathen khana nuhmeihei talungset pathen kha’m heite donmak ning. Inthenga, ama’n pathen rakip heite sakmak hei ning, ajârchu anmani kanek a kalen chet eng tia amandon sik.

³⁸Khahei kanek a, ama’n rekur kahngâk pathen kha akaja sik. Ama’n apa-apu he’n anta leikamuk hêrmak pathen inkhat hnenga sana, dangka, mukta khana mankatamtak kutchoihei apek sik hei.

³⁹Arekur kahrung sik a, ama’n ramlak pathen inmuk hei ada sik hei. Ama vaikarôn kae tia akahnōm hei kha ama’n kajana anei sik hei, anmani kha ṭōnhmun kalen amantu sik hei, inpâkmana ram apek sik hei.

⁴⁰“Syria rengpa kha ahong inchai sik jo pha, Egypt rengpa’n ama chunga re aheitlo sik, khana Syria rengpa’n aratha neina rakip asonga shakor gâri, shakor leh tuirakōng katamtak ahmang sik. Ama’n tuikalen kapōa, rengram katamtak a re asō sik.

⁴¹Ama’n Intepna Ram katlunga’m re atlo sik khana mi lishing lishing athat sik hei, tâk Edom, Moab khana Ammon ram chu inphesōt sik hei.

⁴²Ama’n khava ram rakip a re atlo pha, Egypt katlunga’m ṭhenmak ning.

⁴³Ama’n Egypt a a’nthup karōihei, sana, dangka khana mankatamtak karōihei achoisōt sik hei. Ama’n Libya leh Ethiopia ahlo sik hei.

⁴⁴Khava pha, nisō leh sak tinga akahong ṭong in ama amaṭhit sik jo; hnuk kasetak a re atlo sik jo, mi katamtak athat sik hei.

⁴⁵Ama’n tuipui leh Bek-inn omna tlâng ankâra reng pōn-inn kalen tatak heia’m amatung sik hei. Tâk-kha ama kabôm sik tûte omloa ama kathi sik jo.”