Read Komrem DANIEL 2 Bible Online

DANIEL 2 - Komrem bible

DANIEL 2

¹Nebuchadnezzar in reng achang-na kum 2 tlukna khan, rahmang inkhat aleinei. Hivahin amanrim hêra ama leije tor mak,

²khava jâra ama’n rahmang kha akahri inchên sik a kutje ka-en hei, dôi kathemhei, inralak katlohei kha aleibek hei. Anmani anhong leh rengpa hmaikunga anngir pha,

³ama’n anhnenga ati, “Ke’n rahmang inkhat kanei jâra kamalung inrim. Heitina mo ti ke’n kamanhret hnōm.”

⁴Anmani’n rengpa kha Aramaic ṭonga anleimasôn, “Reng Kalûr ahei tik a hringṭhak roh! Narahmang kha ahri pek roh, keini’n hrimanchên pek che rung.”

⁵Rengpa’n anhnenga ati, “Nangni’n rahmang hi nanhri pek nger sik eng tia kamandon khava jâra heitina mo ahri pek jo ruh. Nanmanthei tor mak eng inchu nanke nankut kador thlek sik chei khana nan-innhei kha’m kasuk manhmang sik hei kae.

⁶Tâk-kha rahmang kha nanhritora nanmaletor pek eng inchu, kutchoi leh kajana kalentak kapek sik chei. Khava jâra, rahmang kha heimo khana heitina mo ahri pek ruh.”

⁷Anmani’n rengpa hneng anmasôn nôk, “Reng Kalûr nang in rahmang kha nahri pek ung inchu, keini’n heitina mo ti khachu kanhri pek sik che.”

⁸Khava pha, rengpa’n ka-ônga ati, “Kamandon kapōa kachang jo! Nangni pha manhmangna sik nantlo jo, ajârchu kei mandonna,

⁹rahmang kha nanhri tor mak inchu nankhenga in-anghrep a karâkna kapek sik chei kha nanhmua kae. Kei hneng maleisei kahri sik a nankâra inhnōmtō jo chei ajârchu pha ase shunga hin omchen hong-inthleng sik tia inhōr chei. Rahmang kha heimo ahri pek jo ruh, khava sōa khava tina kha’m nanhri tor sik tia kamanhret sik jo.”

¹⁰Mansena kanei lele hei khan anmasôn, “Reng Kalûr in namanhret hnōm kha ani intheitor sik raleichunga hin tûte inkhat om mak. Reng kalenpen leh ratha kaneipen inkhatbek in aṭong kasânhei, dôi kathemhei, leh inralak katlohei hneng hinghiva hi ngek phungmak hei.

¹¹Rn Kalûr nang derna hichu intak hêr, pathenhei, mihring kâra aka-om mak hei tei loa tûte’n hri tor mak hei ning.”

¹²Khana, rengpa kha ahnuk kana hêr joa Babylon shunga reng mansena kanei lele hei ankhenga thatsōna sik a ṭong amasō jo.

¹³Khava jâra Daniel leh inṭhōia aloihei ankhenga thatna sik a ṭong kha insō jo.

¹⁴Khava sōa Daniel in mikathat sik a ṭong antapekpa, rengpa kahrunghei hlamkakeipa hneng vakase. Aṭong kakimtak a ahria,

¹⁵ama’n Arioch hneng heisik a mo rengpa’n hinghrep hnuk kasea ṭong amasō tia ader. Arioch in Daniel hneng akasōk omchen kha aleihri pek.

¹⁶Daniel in inrangtak a kasea rahmang kha malena sik phat apeksana sik avader.

¹⁷Khava sōa Daniel inna kasea aloi Hananiah, Mishael leh Azariah hneng akasōk omchen kha aleihri pek hei.

¹⁸Anmani kha Babylona ka-om reng mansena kanei lele hei leh inṭhōia anthatsō makna sik hei marvân Pathen lungsetna chenna sik, derna anneina sik a amanthei hei.

¹⁹Khava jân a khan hmangtalâr inkhat a Daniel hneng a’nthup omchen kha inphôngsōt jo, ama’n chung Pathen achoi ka-âna ahri:

²⁰“Pathen chu kasing kahrat! Ama kha manpâk a omṭhak rasoh.

²¹Ama’n phat leh khōsûr khōsat ṭong anei tor; renghei um asyem hei khana syem nôk mak hei; sing leh themna kapek hi ama kae.

²²Ama’n ṭong inri leh in-ip aphôngsōt; inthima a’nthup kha amanhret, ama khet kha vâr in akatōmbit a kae.

²³Kapu sōnhei Pathen kachoi ka-ân che khana kakaja che, nang in singna leh ratha napek eng; nang in kaderna namasôn eng Rengpa hneng kantahri sik namanthei ung.”

²⁴Khana Daniel kha rengpa innpui shunga mansena kanei lele hei kathat sik a ṭong apek Arioch hnenga vakase. Ama’n ahnenga ati, “Anmani that mak hei roh. Rengpa hneng kei aṭhōi roh, ke’n arahmang kha heitina mo kamanthei sik.”

²⁵Inrangtak a Arioch in Daniel kha reng Nebuchadnezzar hneng aleiṭhōia rengpa hneng ahri, “Reng Kalûr, narahmang inlesōt tor sik Jehudi rehring sur hei kâra inkhat kahmu jo.”

²⁶Rengpa’n Daniel (Belteshazzar tia’m inhret) hneng ati, “Ke’n heirahmang mo kaleinei, khana heitina mo ti kha nahri pek tor sik eng mo?”

²⁷Daniel in amasôn, “Reng Kalûr, khava intheitor ṭōn inralak katlohei, dôi kathemhei, tla kasânhei, a-emak leh ârsi lekha kathemhei om mak hei.

²⁸Tâk a’n-ip kaphôngsōt tor marvân Pathen inkhat ka-om. Ama’n Reng Kalûr nahnenga hnunga ahong kasōk sik kha ahri pek che kae. Tûn narahmang kha hripek che rong, khava najelaia rahmang kha.

²⁹“Reng Kalûr nang in najelai, hnung omchen chungchânga nahmu kae; Pathen, a’n-ip kaphôngsōt ama’n heimo akasōk sik kha amanhmu che kae.

³⁰Tûnchu, hiva a’n-ip hi kahnenga inlâr jo, kei in mi ralak-hei kanek a kasingdet jâra changmak, tâk narahmang leh namandonna kha Reng Kalûr nang in namanhret theina sik a kae.

³¹“Reng Kalûr, narahmanga lim kalentak nahmai kunga akadi rik-rak a akangir khana hmit-enna ṭit ka-omhêr inkhat naleihmu.

³²Alu kha sana kaṭhapen vânga insyem; A-ôp leh akutbân kha dangka vâng insyem, akhon leh ale sum-êng vânga insyem.

³³Ake kha thir vânga khana ankepha kha thir leh matlak vâng insyem.

³⁴Nang in khava lim kha na-enlai, hlung kalen inkhat tûte’n sit loa, tlâng karea inphut jōng inlirsōt a kae, khava hlung khan thir leh matlak vânga insyem lim kepha chunga jōngkatla, ankepha kha ahar-ahak a kakōi jo.

³⁵Khava phatak a thir, matlak, sum-êng, dangka khana sanahei kha kakōi heia khōlum pha saphōra akajōngsōt vuibō ka-ang jo heia kae. Khahei kha thli’n asêmsō jo hei, inkhatbek inhmu phâkmak jo hei. Tâk-kha hlung khachu tlângbung inkhat hong kachanga ralei pumpui ahongmakhu jo.

³⁶“Narahmang kha hivahi kae. Tûn Reng Kalûr hivahi heitina mo kahri pek sik che.

³⁷Reng Kalûr, nang hi reng rakip kâra akalenpen che kae. Marvân Pathen in reng kalenpen inkhat a asyem che khana ratha, tlotorna leh kajana apek che.

³⁸Ama’n ralei pumpuia aka-om vaikarônna asyem che khana sha leh va rakip chunga vai karôn sik a asyem che. Nang sana lu che kha kae.

³⁹Nang bânna rengram inkhat hong ka-om sik, nang rengram kapōa lenmak ning. khava bânna 3 tlukna, sum-êng rengram hong ka-om sik a kha ralei pumpui vai ahong rôn sik.

⁴⁰Hivasōa thir kapōa akangar, 4 tlukna rengram inkhat hong ka-om sik, khava khan heirakip asuk khōia anvōkkhōi sik. Thir in heirakip anvōkkhōi kapōa, hivahin hmakakei rengramhei kha avōkkhōia amannōi sik hei.

⁴¹Ake leh akemasek hei kha thir leh matlak vânga ansyem kha nang in nahmu. Khava tina khachu rengram kha inkhōiṭhen sik. Thir kapōa ratha anei sik, ajârchu thir leh matlak a’nheia a’nsyem kae.

⁴²Thir leh matlak inchun a a’nsyem kemasek hei tina khachu rengram ṭhen khat ratha anei sik, ṭhen khat ratha neimak ning.

⁴³Nang in thir leh matlak a’nchun kha’m nahmua kae. Hiva manhretna khachu rengram vaikarônhei kha jōr inlo sik heia kha an-innshung pumkhat changna sik antlo sik, tâk-kha thir leh matlak a’nchun theimak kapōa khavakha tlotor mak hei ning.

⁴⁴Khava renghei pha shunga marvân Pathen in ahei tik a a’nhmangmak sik rengram inkhat aphunsōt sik. Khavakha tûte’n hlō tor mak hei ning, khava khan rengramhei kha ankhenga asuk manhmang sik hei, khana ahei tik a ka-om ṭhak sik jo.

⁴⁵Nang in hlung inkhat tûte’n sit loa tlângbung inkhat a inphut ajōng inlirsōt khana khava khan thir, sum-êng, matlak dangka leh sana vâng a’nsyem lim kha ajōng suk kha nahmu. Akalen Pathen in Reng Kalûr nahnenga hnunga ahong kasōk sik omchen amanthei che kae. Ke’n narahmang nei leh khava malena kha kadiktak a kamanthei jo che.”

⁴⁶Khava pha reng Nebuchadnezzar kha raleia inkuna Daniel hneng inthoina leh neinâk tōkna sik a ṭong apek jo hei.

⁴⁷Rengpa’n ahri, “Nang Pathen kha pathenhei kâra akalenpen kae, renghei kâra RŌNGPU kae khana a’n-ip kahrisōt kha kae. Nang in a’n-ip hi nahrisōt tor jâra ke’n kamanhret jo.”

⁴⁸Khana inphut Rengpa’n Daniel kha sehmang-pachong hmun kalentak apek jo, kutchoi kalûr katamtak aleipek, Babylon ramṭhen ka-ensuia ada jo, khana reng innshunga mansena kapeklele hei anlu kachinga ada jo.

⁴⁹Khana Daniel ngekna dungjuia rengpa’n Shadrach, Mishakh, leh Abednego hei kha Babylon ram ṭōnkarôn sik a akadei jo hei; Daniel chu rengpa innpuia ka-om jo.