Read Komrem DANIEL 6 Bible Online

DANIEL 6 - Komrem bible

DANIEL 6

¹Darius in arengram pumpuia vai karôn sik mi 120 aleikadei hei.

²Hihei chunga, rengpa’n alungtup katinta sik leh vaikarônhei ka-ensui sik a Daniel leh milak 2 aleikadeisa hei.

³Daniel in alak mi ka-ensuihei leh vaikarônhei kanek a kakhe chet a aṭōn tlotorna kha ahong malâr jo. Ama kha achungchôn det achang jâra rengpa’n aram pumpui karôn sik a ama amantluk jo.

⁴Khana alak mi ka-ensui leh vaikarônhei khan Daniel in ram shunga a’nhling a’nkaina chunga aṭhena anlei jongvet a kae, kha’num hmutor mak hei, ajârchu Daniel kha taksen theitak kae khana akadik mak leh malung intheng mak inkhatbek leitlo mak.

⁵Anmani khat leh khat le’nbe hei, “Eini’n apathen bekna chungchânga tei loa Daniel ṭhena inkhatbek hmutor mak jo min.”

⁶Khava jâra anmani’n rengpa hneng kase heia anvahri, “Reng Darius, Reng Kalûr, nang ahei tik a hringṭhak hi roh!

⁷Naram shung aka-en lele keini kankhenga — mi ka-ensui, vaikarôn, vaikarôn ṭhōidet hei, khana alak ṭōnkarôn rakip in rengpa nang in ṭongpek inkhat namasō sik a inhnōmtō ung. Kani 30 shunga Reng Kalûr nang tei loa tûte inkhat in pathen leh mihring inkhat hnenga derna neithei mak ning tia ṭong inkhat masō roh. Tu inkhat in hiva ṭong kajuimak mi kha shabakkai kasip rōng shunga hlon manhlut sik kae.

⁸Medeshei leh Persiahei dân, a’nthleng thei makna sik hiva ṭong hi Reng Kalûr nang in mazet inna sôi tlo roh.”

⁹Khava jâra reng Darius in ṭong kha sôi atlo jo.

¹⁰Daniel in ṭongpek kha rengpa’n sôi atlo jo ti athei pha, ama a-inna kase jo. A-inn chungden a Jerusalem kahnget a thlikot ka-om hei. Khana khan, aleitlo phung kapōa, thlikot-hei inhlangna ting khan inkuna Pathen hneng ni khat a vōi 3 sasâm aleider.

¹¹Daniel inrepuihei khan ama Pathen der kha anhmu pha,

¹²anmani ankhenga Daniel maherna sik a rengpa hneng kase hei. Anmani’n anti, “Reng Kalûr, nang in ni 30 shunga nang tei loa pathen a-emak leh mihring tu inkhat inmuk mi kha shabakkai kasip rōng shunga hlon manhlut sik tia sôi naleitlo.” Rengpa’n amasôn hei, “Kadik, ṭong masō inhnak, Mede leh Persiahei dân, a’nthleng theimak kha kae.”

¹³Khava sōa anmani’n rengpa hneng anhri, “Judah a inphut rehring sur hei kâra Daniel in Reng Kalûr nang kajana aneimak khana nang ṭong masō kha juimak. Ama’n ni khat a vōi 3 sasâm derna aneia kae.”

¹⁴Rengpa’n hi athei pha, amalung inrim jo khana ama’n ator chenna Daniel huksōtna sik hlam aleijong. Kani tlâk katlunga khanga ajonga kae.

¹⁵Khava sōa Daniel inrepuihei kha’n reng hneng he’nle heia anti, “Medehei leh Persiahei dân dungjuia reng in amasō ṭong kha inthleng phungmak ti hi Reng Kalûr nang in namanhret.”

¹⁶Khava jâra rengpa’n Daniel surna sik a ṭong amasōa shabakkai kasip rōng shunga anhlon manhlut jo. Ama’n Daniel hneng ati, “Nang in kajatak a narazen Pathen in huksōt che rasoh.”

¹⁷Khur kot khan hlung inkhat vâng ankhâr jo, khana tûte’n Daniel kha anhûksōt tor makna sik a, hlung chunga khan rengpa mêrchîkna leh aram mikalenhei mêrchîkna annamkhum jo.

¹⁸Khava kahnunga rengpa’n a-innpuia inlea malung inrimtak a, bu sâk loa, heite ningṭhatna neiloa, jân jeloa leika-om jo.

¹⁹Jîngkâr hmatak a rengpa kathōia, khurting inranga leikase.

²⁰Ama’n khava hmun atlung pha, malung inrimtak a a-ôn, “Akahring ṭhak Pathen sōk Daniel! Khang hrep a kajatak a narazen na-Pathen in shabakkai heia inphut ahuksōt tornâk che mo?”

²¹Daniel in amasôn, “Reng Kalûr ahei tik a hringṭhak roh!

²²Shabakkai he’n kei anitôn makna sik Pathen in anbei kakhâr sik angeva ajōngtir. Ama’n hivahi atlo kae, ajârchu Reng Kalûr, kei ṭhena neimak eng khana nang hnenga dikmak tlomak eng ti hi amanhret a kae.”

²³Rengpa kha inpâk hêr joa shabakkai rōng shunga inphut Daniel kha keisōtna sik ṭong apek jo hei. Khava jâra anmani’n Daniel ankeisōt a, Pathen ataksen jâra ama heite a’ntônmak kha anhmu jo.

²⁴Khava sōa rengpa’n Daniel mo kape mi rakip hei kha surna sik a ṭong apek jo hei, khana anmani kha annuhmei, ansahei leh inṭhōia shabakkai kasip rōng shunga anhlon manhlut jo hei. Anmani khan khurhnōi antlung mak hma shabakkaihei khan ho’nthok heia anru anse mathlek pek sō hei.

²⁵Khava pha Reng Darius in raleichunga ka-om phung leh jât, ṭong rakip hnenga lekha aleimanrôn hei: “Marimna chibei!

²⁶Karam shunga mi rakip in Daniel Pathen nantaṭit sik khana nantakaja sik kae tia ke’n ṭong kapek chei kae. “Ama kha akahring Pathen kae, khana ama’n aheitik a vai arôn sik. Ama rengram aheitik a inhmang mak ning, khana aratha neina aheitik a bângmak ning.

²⁷Ama’n ahuksōt khana asansōt; Ama’n marvân leh raleichunga ṭōn inralak leh det-hla ka-om atlo. Ama’n shabakkai he’n antatha sik Daniel kha ahuksōt.”

²⁸Cyrus leh Darius he’n Persianhei reng anchang lai Daniel kha kahōia leika-oma kae.