Read Komrem DANIEL 7 Bible Online

DANIEL 7 - Komrem bible

DANIEL 7

¹Belshazzar in Babylon reng achang kum hma inkeia, ke’n jân a rahmang kaneia hmangtalâr kaleinei. Ke’n rahmang kha kaleimazet, khava ning jân a kaleihmu kha

²hinahin ka-om: Hmun rakip a inphut thli hong kahrânga tui-ôngpui hmai aheivōk.

³Tuipui shunga inphut sha kalentak 4 hong kasōk hei, inkhat leh inkhat in-ang mak hei.

⁴Ahma inkei kha shabakkai apō, tâk hmurai kapōa mathla le’ndo. Ke’n ka-enlai amathlahei kha intan jo hei. Sha kha keitoua ka-oma anlei manngir. Khava sōa mihring mandonna ahnenga anleipek.

⁵2na sha kha akahnung tinga akepâra akangir kavom apō. Ahâ vâng sha manâkru 3 asekhang, khana rasa inkhat in ahnenga ahri, “Se ina nator chenna ranhringhei hme vasa roh!”

⁶Ke’n ka-enlai, 3na sha alak inkhat hong kasōk a kae. Khavakha rûtnu apō, tâk akhona va mathla kapō mathla 4 indo, khana alu 4 anei. Ama kha vairônna ratha anei kapōa ka-om.

⁷Ke’n khanga ka-enlai, 4na sha hong kasōk a kae. Ama kha ratha kaneitak, ṭitna leh inpirna ka-om tak kae. Ama’n thirha kalentak vâng ashathat hei kha asekhōi hei khana achōn rachi hei. Sha ralak leh in-ang loa, araki 10 indo.

⁸Ke’n araki kha kakhulip a ka-en pha, raki hei kâra khan raki kasin inkhat hong kasōk a kae. Hivahin hma inkeia aleika-om raki 3 amathlek jo hei. Hiva raki hin mihring hmit anei khana in-ortak a ṭongkahri bei inkhat anei.

⁹Ke’n ka-enlai, reng in-ongna hei ahmun et a anda hei. Khava reng in-ongna inkhat a khan ahei tik a akahring ṭhak inkhat kha in-onga kae. Apōnsihei kavur kapōa kachek hei khana asam in sahme intheng ka-anga kae. Alen in-ongna kha hmei kasûk gâri chunga, hmeimale kapōa kasûk a kae,

¹⁰Khana inphut hmeimale ahei kâpsōt a kae. Khava hmun a khan ama inzen sik mi lishing lishing ka-om hei, khana tei torlo katamtak ahmating kangir hei. Ṭong tanna sik in-ong anphut jo, khana lekharabu hei kha anmahlang jo.

¹¹Ke’n ka-enlai, raki kasin khan in-ortak a ṭong ahri kha katheia kae. Khanga ka-ena, sha manlina kha anthat jo, khana ataksa kha hmeishunga anhlon manhlut a amanhmang jo.

¹²Sha ralak-hei kha anratha neina anlosōt pek jo hei, tâk pha chomkhat akahring sik a anleida hei.

¹³Hiva jân a hmangtalâra hin ke’n mihring kapō inkhat kaleihmu. Ama kha sumtuk in akake khuma kahnenga ajōng hnai eng, khana ama khan ahei tik a akahring ṭhak hneng kasea inpek inhlut a kae.

¹⁴Ama kha phung leh jât ṭong rakip in anrazenna sik ama kha ratha neina, kajana khana reng ratha kha anpek jo. Ama ratha neina kha ahei tik a ka-om sik, khana arengram ahei tik a bângmak ning.

¹⁵Hmangtalâr kaleihmu khan amanrim eng, kei amanbōi hêr eng.

¹⁶Ke’n khava hmun a akangir hei kâra inkhat hneng kase enga hiva rakip hi ahri manchênna sik kavader. Khava jâra hivahi heitina mo ti kha ahri pek eng.

¹⁷Ama’n ati, “Hiva sha kalen 4 hei hi raleichunga kaman om sik rengram 4 hei kae.

¹⁸Khana Chunghnung Pathen sahe’n reng ratha neina kha anchen sik khana ahei tik a anta kachang sik.”

¹⁹Khava pha sha alak 3 hei leh a’n-ang mak 4na sha, ashathat sik hei kha asum-êng ke matin leh athir ha vânga asekhōi hei khana anchunga achōn rachi hei, khava ṭit ka-om tak sha chungchânga kamanhretdet hnōma kae.

²⁰Ke’n alua indo raki 10 khana hnunga ahei kasōk raki inkhat, khava khan raki hei kâra 3 asuk mathlek chungchânga kamanhret hnōm. Hivahin ahmit indo hei khana inlensaktak a ṭonghrina abei inkhat indo. Ama kha alak-hei kanek a ṭit ka-om hêra kae.

²¹Ke’n ka-enlai, khava raki khan Pathen sahei chunga re atloa ator jo hei.

²²Khava pha ahei tik a akahring ṭhak inkhat kha kajōnga Chunghnung Pathen sahei sik a ṭong aleitan. “Pathen sahe’n reng ratha neina anchenna sik pha kha hong katlung jo.

²³Kahnenga hri manchênna Pathen in amanthei eng kha hi kae: “4na sha kha raleichunga ahong ka-om sik 4 tlukna rengram kae, khavakha alak rengramhei leh in-ang mak ning. Ama hin ralei pumpui asuk manhmang sik khana achōn rachi sik kae.

²⁴Khana raki 10 kha rengram vai ahong karôn sik reng 10 hei kae. Khava sōa reng alak inkhat hong kasōk sik; ama kha hma-inkeihei kanek a inlak sik, khana reng 3 hei kha ator sik hei.

²⁵Ama’n Chunghnung Pathen kadōia ṭong ahri sik khana Pathen mihei asuk manrim sik hei. Ama’n anmani beklang dân leh rehōihei thlengna sik atlo sik. Khana Pathen mihei kha kum 3 leh thla 6 aratha neina thōia ada sik hei.

²⁶Khava sōa marvâna ṭong tanna matungna ka-om sik, aratha neina kha inlosōt sik, pui katluk a manhmang sik kae.

²⁷Raleichung rengram rakip hei ratha hratna leh lenna rakip Chunghnung Pathen mihei hneng a’npek sik kae. Anmani reng ratha neina kha bângtik neimak ning, khana raleichunga vaikarôn rakip in anrazen heia anṭong anjui sik.”

²⁸Hivahi omchen kasōk abângna kha kae. Kei kaṭihêr enga kadângper jo eng, khana khavahei seng kha kamalunga kada heia kae.