Read Komrem DANIEL 8 Bible Online

DANIEL 8 - Komrem bible

DANIEL 8

¹Belshazzar in reng achang kum 3 tlukna, ke’n vōi 2 tlukna hmangtalâr inkhat kahmu.

²Hmangtalâr shunga khan manhret phâkloa kei Elam ram shunga bangrape a’nkhârkhum Susa khōpuia leika-om eng. Kei Ulai tuidung panga leikangir eng,

³khava tuidung panga ke’n araki kaseitak 2 indo kemōngche inkhat kaleihmu, araki inkhat in kaseidet khana katherdet a kae.

⁴Kemōng khan tlaitlâk ting, sak leh thlang ting araki vâng asuk kha kalei-en. Sha inkhatbek inum tingtor mak hei khana aratha neina inphut leitlânsōt tor mak heia kae. Ama’n amaduhrep a atlo khana lei-inlensak a kae.

⁵Hivahi heitina mo tia kamandon laitak, keche inkhat in tlaitlâk tinga inphut hong kasōk a inrang reia ake’n ralei tônloa hong katlân. Ama’n ahmit 2 kâra inchêntak a manhret theibât raki inkhat aleinei.

⁶Ama kha ke’n tuipanga akangir kaleihmu jo kemōng hnengting aratha rakip asonga katlân inhlut.

⁷Ama’n kemōng avasuk hlon kha kahmu. Ama ahnuk kana hêra kemōng kha asuk a araki 2 amathlek pek jo. Kemōng khan ama tingtorna ratha neimak jo. Raleia amanpura achōnpha jo, ama kahuktor tûte inkhatbek leiom mak hei.

⁸Keche kha hong inlensak chet-chet jo, tâk ama’n ratha katluk a ahongnei pha, araki katlek jo. Khava kahlanga inchêntak a manhret theibât raki 4 in ramkei ahlop et anhnget a hong kasōk hei.

⁹Hiva raki 4 kâra raki kasin inkhat hong kasōk nôk. Hiva ratha neina kha thlang ting, nisōting khan chu Intepna Ram langting katlunga kae.

¹⁰Ama’n marvân remihei, ârsihei, inrepuina sik pui katluk a ratha aleinei, ama’n ṭhahrep hei chu raleia ajōng hlon mathla heia ake vânga achōnpha hei.

¹¹Marvân remihei rengsa katlunga ama’n a’nrepuia, ahnenga ani tina inthoina tōkna kha akhâm hei, khana Bek-inn amanbōk.

¹²Mihe’n khava hmun a ani tina inthoina kahlanga setna antloa kae, khana kadiktak a bekna kha raleia anhlonsōt jo. Raki khan atlona rakip a chung leikasōk a kae.

¹³Khava sōa ngeva inkhat in inkhat hneng ṭong ader kha kalei thei, “Hmangtalâra a’nhmu omchenhei hi pha khongja katlung alaka-om sik hei mo? Pha khongja katlung mo ṭit ka-om tak setna hin ani tina inthoina kahlang kha alathleng sik? Pha khongja katlung mo marvân remi leh Bek-inn kha chōnpha anlaka-om sik hei?”

¹⁴Alak ngeva khan amasôn kha kalei thei, “Khavakha khōhlei leh jîngkâr 2,300 laka-om sik, hiva shunga hin inthoina om mak ning. Hivasōa Bek-inn kha matung ther sik kae.”

¹⁵Ke’n rahmang kha hei-achang ti manhretna sik kamandonlai, manhret phâkloa mi inkhat kahma leikangir.

¹⁶Ke’n Ulai tuidung rekhat a inphut a aka-ông rasa inkhat kathei, “Gabriel, ama’n ahmu kha heitina mo hripek roh.”

¹⁷Gabriel kha kahong kahnenga kangir, khana kei kaṭihêr enga raleia kapûr jo eng. Ama’n kahnenga ati, “Akathithei mihring, hiva tina hi manhret roh. Hmangtalâr hi ralei inchaina ṭong kae.”

¹⁸Ama’n khanga ṭong ahrilai, kei heite manhret manloa raleia kapûr eng. Tâk ama’n amatu eng, kakea amanngir enga

¹⁹khana ati, “Ke’n Pathen hnuk natna tahei rôn sōt kha kamanhmu che kae. Hmangtalâr hin a’nchaina sik pha ahrina kae.

²⁰“Nang in araki 2 indo kemōngche nahmu kha Media leh Persia rengram kahlanga kae.

²¹Keche khan Greek rengram kahlânga kae, khana ahmit 2 hei kâra inchêntak a manhret theibât raki khan reng hmakakei kae.

²²Hma-inkei raki kha atleksōa raki 4 ahong kasōk hei kha’n rengram kha rengram manlia inṭhen sik hei, khahei khachu ahma kakei kapōa ngarmak hei ning.

²³“Khava rengramhei inchaina ahong hnai jo pha anmani hongṭha hêrmak hei ning khana karâk sik hei kae, khana khan ṭong inngeimak, rahe kase, mikahōn reng inkhat ka-om sik.

²⁴Ama hong kahrat sik, tâk abinga ratha neina vânga changmak ning. Ama’n ṭit ka-om tak inhmangna ahong masō sik khana atlo rakip a chung kasōk sik. Ama’n ratha kahrat mihei leh Pathen mihei chunga inhmangna ahongtlo sik.

²⁵Ajârchu ama kha amalung ṭhamak, ama mihōnna hlam a khan hmesōna anei sik. Ama abinga inlensak sik khana gîkna pek loa mi katamtak amanhmang sik hei. Ama’n reng kalenpen katlunga a-inrepui sik, tâk mihring ratha neina hmang loa ama kha suk manhmang kachang sik a kae.

²⁶Hiva khōhlei leh jîngkâra inthoina chungchânga nahnenga hrimanchên jo hmangtalâr hi hui ahong katlung sik kae. Tâk-kha tûnchu thup inna da hi roh, ajârchu hiva hui tlung sik hi pha kasôttak kahlut sik a kae.”

²⁷Kei kamalung katlasam hêra kani katamtak leikana eng. Khana kathōi enga rengpa’n anganse eng ṭōn vakatlo sik a kase jo eng, tâk hmangtalâr khan kamalung asuk manbōia heite manhret loa ka-om eng.