Read Komrem DANIEL 9 Bible Online

DANIEL 9 - Komrem bible

DANIEL 9

¹Mede phung Xerxes sapa Darius khan Babylon kha arôn jo.

²Ama vai rôna kum hmakakeia, sânkathem Jeremiah hneng aleihri, ke’n lekha intheng kateia, Jerusalem in kum 70 a’nhmang sik kha kamandona ka-om eng.

³Khana ke’n bu kahngōia, borapōn kasia khana ravut kâra in-ong enga Rōngpu Pathen hneng malung kahluttak a kaleider.

⁴Ke’n ka-Rōngpu Pathen hnenga kader khana kamihei setna kalei hrisōt a kae. Ke’n kati, “Rōngpu Pathen, nang kalen che khana keini’n kankaja che. Nang naṭongtep chunga taksenthei kachang che, khana nang inlungset mihei chunga bângtik neilo lungsetna namalâr khana naṭongpek kha natlosōt a kae.

⁵“Keini’n setna kantlo jo, keini ṭhamak jo ung, keini akadik mak kantlo jo. Nang in tlo ruh nati kha tlomak jo ung, khana akadik namanhmu ung kha kandahlon jo.

⁶Kanrenghei, kanvai karônhei, kanpu sōnhei leh kanjât pumpui hnenga narahminga ṭongkahri nasōk sânkathemhei ṭong rangei mak jo ung.

⁷Rōngpu, nang chu ahei tik a akadik natlo, tâk keini’n ahei tik a kanbinga inzakna kanhei rôn sōt a kae. Nang in akahnai leh akahla ram shunga nachai kathek jo Israel rakip, Jerusalem leh Judea ram shunga aka-om keini rakip chunga hivahi akadik jo kae, ajârchu anmani nahnenga taksenthei changmak heia kae.

⁸Kanrenghei, kanvai karônhei, kanpu sōn he’n inzak ka-om tak a leikachôn hei, khana Rōngpu nang kadōia setna anleitlo jo.

⁹Keini’n nang kadōia kanleitlo ravâng nang chu maritna leh ngeidamna kapekthei che kae.

¹⁰Nang in nasōk sânkathem heia inphut dân dungjuia om ruh nati ung kha, O RŌNGPU kan-Pathen naṭong leirangei mak jo ung.

¹¹Israel rakip in nadân anlei sukkhōi jo, khana naṭong hri juihnōm mak jo hei. Nang kadōia kaset jo ung, khana nasōk Moses dânrabu a a’nzet hâksêrna hei kha kanchunga katlung joa kae.

¹²Nang in kanhnenga leh kanvai karônhei hnenga tlo sik a nahri kha natloa kae. Nang in raleichunga aka-om khōpuihei kanek a Jerusalem kha kakhôk chet a nakarâk a kae.

¹³Moses Dân a ale’nzet karâkna rakip hei kha napek jo ung. Tâk tûn katlunga’m O RŌNGPU kan-Pathen, kansetna heia inphut inhesōtna a-emak leh nadikna juia namalung mantlaina sik latlomak ung.

¹⁴O RŌNGPU, nang in keini karâkna sik a intluk che, khana nakarâk ung, ajârchu nang in akadik ahei tik a natloa kae, khana keini’n rangei mak che ung.

¹⁵“O RŌNGPU, kan-Pathen naratha neina kha Egypt a inphut namihei naheiṭhōisōtna heia khan namalâr jo, naratha neina kha tûn katlung mandonsōtna laka-oma kae. Keini setna kantlo jo, keini dikmak kantlo jo.

¹⁶Nang in keini hmalai khan naleihrung jo ung, khava jâra Jerusalem chunga nahnuk mannat mak jo roh. Hivahi nakhōpui, a’ntheng nahmebung kae. Keini setna leh kanpu sōnhei ṭhatmak jâra sir leh panga ram he’n Jerusalem leh namihei chunga anhmu masi heia kae.

¹⁷Eh Pathen, kaderna leh kangekna arangei pek roh, suk manhmanga aleika-om jo nabek-inn kha syemsōt nôk roh; mi rakip in nang Pathen che kae tia anmanhretna sik, syemsōt nôk roh.

¹⁸Eh Pathen, kantahri arangei pek roh; keini ajōng enroh, keini inrengna kan-omna leh narahming karôn khōpui inrimna hi jōng enroh. Keini’n akadik kantlo jâra changloa, nang in lungset kathem nachang jâra derna hi kannei che.

¹⁹Rōngpu, kanderna che arangei pek roh, Rōngpu, arangei mandam roh. Rōngpu, kanderna rangei roh, khana atlopek roh! Mi rakip in Pathen che kae ti anmanhretna sik, in-êng mak jo roh! Hiva khōpui leh hiva mihei hi natahei kae.”

²⁰Ke’n kasetna hei leh kami Israelhei setna kaphôngsōt a derna kaneiṭhak, khana ama Bek-inn intheng kha asyemtherna sik RŌNGPU hneng kabêr ṭhak a ka-om eng.

²¹Khanga kaderlai, hma inkeia hmangtalâra kaleihmu Gabriel kha ka-omna hmun a heikajōnga kae. Khavakha khōhlei inthoina tōkna pha kae.

²²Ama’n ahri manchên, “Daniel, ṭongsân kha namanhretna sik hinahin akahong eng kae.

²³Nang in Pathen hneng nangek manphut pha, ama’n amasôn che. Ama’n alungset che, khava jâra amasôna kha akahri pek sik a kei akahong eng kae. Tûn ke’n kahri pek che pha malung kahluttak a rangei roh.

²⁴“Namihei leh nakhōpui intheng kha setna leh akaṭhamak inphut masōsōtna sik Pathen in kum 70 et kha vōi 7 kasôt aṭhensōt a ada jo. Ṭongsân leh hmangtalâr kha hui atlungna sik, khana a’ntheng Bek-inn avea manther sōtna sik a, setna rangei mandam sik khana kumleikōa dikna kha matungsōt sik kae.

²⁵Hivahi chîk roh khana manhret roh: Jerusalem athera sak nôkna sik ṭongpek asôkna khana inphut Pathen takadeisōt hlamkakei ajōng mak hma seng kum 7 et kha vōi 7 kathleng sik. Jerusalem kha hlamlenhei leh rekur kangar tak hei insyemther sik hei, khana kum 62 et kha vōi 7 kangir sik, tâk-kha khavakha inrimna pha sik jo kae.

²⁶Khava pha a’nchai leh Pathen takadeisōt hlamkakei kha dikmaktak a anmahera anthat sik. Khōpui leh Bek-inn kha ratha kaneitak vaikarôn remi he’n ansuk manhmang sik. A’nchaina kha Pathen in amantluksa re leh suk manhmangna ahei rôn kha tuikalen kapōa kahong sik.

²⁷Khava vaikarôn khan mi katamtak hei leh kum 7 inhnōmna kahnettak annei sik, khana hiva pha hi aṭimkhat a’nchai pha, ama’n inthoina leh tōkna man om mak jo ning. Ṭitpui inkhat Bek-inn inshângpen chunga anda sik khana khava kada mi kha Pathen in ama sik a amantluk pek achaina pha kha aratō mak kârseng khanga ka-om sik.”