Read Komrem HOSEA 11 Bible Online

HOSEA 11 - Komrem bible

HOSEA 11

¹RŌNGPU’n ahri, Israel in naipang achanglai, ke’n kalungset kasapa ângphunga Egypt a inphut kabeksōt.

²Tâk-kha ke’n ama kabek chenna, kahnenga inphut katlânsōt chet a kae. Kami he’n Baal hneng inṭhōi hei, anmani’n limsyem hneng marim katui anro.

³Achang inum Israel ke choi inchu kha kei eng kae. Ke’n kamihei kha kabâna kakadom hei, tâk-kha ke’n anmani katintahei ti hi manhret mak hei.

⁴Ke’n lungset leh marit a kahnenga kakei manhlut hei, Ke’n kakadom heia kakabeng leh kasuktō hei; Kei inkun enga kavei mankhop hei.

⁵“Anmani kahnenga he’nle sik hnōm mak hei, khava jâra Egypt a a’nle nger sik hei kae, Assyria he’n anchunga vai antarôn sik kae.

⁶Ankhōpuihei re kahlutsō sik, khōpui kot-hei ansukkhōi sik. Khava re khan kamihei asukmanram sik hei, ajârchu anbinga kaṭhapen tia antamandon kha antloa kae.

⁷Anmani’n keia inphut sesōt sik a antloṭhak a kae. Anrîngke rôn jâra kaṭap a ka-ông sik hei, tâk tûte’n kadomsōt pek mak hei ning.

⁸“Israel, ke’n heikhong mo kamasōtor sik che? Heikhong mo ke’n kadahlon tor sik che? Ke’n Adma kasuk manhmang kapōa, nang kasuk manhmang tor sik che mo, achangmak leh Zeboiim kapōa nachunga katlo tor sik mo? Kamalung in kha amantlo mak ning! Kalungsetna che kha kangar hêra kae.

⁹Kahnuknat a karâkmak che ning; Israel suk manram nôk mak jo ning. Ajârchu kei Pathen eng kae, mihring changmak eng. A’ntheng Inkhat, kei in, nang ka-ompui che. Hnuknat pum a nahnenga kei jōngmak ning.

¹⁰“Kami kadōihei hneng ke’n shabakkai kapōa ka’nhrung pha, kami he’n kakahnung anjui sik eng. Anmani tlaitlâk tinga inphut kahnenga inranga kahong sik hei.

¹¹Anmani Egypt a inphut va kapōa khana Assyria inphut vaṭhu kapōa inrangtak a kahong sik hei. Ke’n anmani an-inna kaheiṭhōi male sik hei. RŌNGPU, ke’n kahri jo kae.”

¹²RŌNGPU’n ahri, “Israel mihe’n tûn katlung maleisei leh hōnna vâng ankatōm eng, Judah mihe’n a’ntheng leh taksen ka-om Pathen andōi eng.