Read Komrem HOSEA 12 Bible Online

HOSEA 12 - Komrem bible

HOSEA 12

¹“Jîngkâra inphut jân katlunga Israelhei tatlo kha hnemna kase leh insuksetna rōk kae. Ankâra inhōnna, invōk insetna kapung chet-chet a kae. Assyria leh inhnōmtōna ansyem khana Egypt leh invei antloa kae.”

²Judah chunga RŌNGPU’n masetna manchen sik anei; Israel hi amihei omchen jâra akarâksa sik kae. Anmani ṭōntlo dungjuia apek male sik hei kae.

³Anpusōn Jacob in anu von shunga a-omlai a’nkoppui a-u Esau kha a’nrepui; Jacob khan ahonglen phale’m Pathen a’nrepui nôk,

⁴ama’n marvân ngeva inkhat a’nrepuia aleitor. Ama kaṭap a vâng aleider. Khana Bethel a Pathen kahonga nipusōn Jacob a’nhmupuia ahnenga alei inbekpui.

⁵Hivahi Chunghnung RŌNGPU kha kae, RŌNGPU hi ama kamukna sik a arahming kha kae.

⁶Khava jâra tûnchu, Jacob sōn leh pârhei, nan-Pathen kha taksen ruh, ahnenga hong inle ruh. Ama jui ruh, kadik a om ruh, nan-Pathen ṭōn tlo sik kha dehrattak a hngâk ruh.

⁷RŌNGPU’n ati, “Canaan mihei malung intheng mak kapōa Israelhei anmalung intheng mak; anneinâk inchôk hei kha atena kadikmak vâng anhōn hei.

⁸Anmani’n ‘Keini kahao ung’ anti. ‘Keini’n vângṭhatna kanchen. Malung intheng loa kanhaona chunga hin tûte’n maset apetor mak hei,’ anti.

⁹Tâk-kha Egypt a inphut nanhong kaṭhōisōt RŌNGPU nan-Pathen, Ke’n, nêrdiram a nanhnenga kahonglai nanlei om kapōa, Pōn-inna avea kaman om nôk sik chei.

¹⁰“Sânkathemhei hneng ṭong kahria hmangtalâr katamtak kapek jo hei, sânkathem heia inphut gîkna kapek jo hei.

¹¹Kha’num Gilead a limhei ankamuk, khava inmuk hei kha akathi sik hei kae. Gilgal a sehratchehei inthoina annei, khava maichâmhei kha ramhânga hleiheia hlung manbukna kachang sik hei.”

¹²Nipusōn Jacob kha nuhmei neina sik a Mesopotamia akatlân sik a kasōk, mi inkhat ṭōn avatloa akemōng akhempek heia kae.

¹³Egypt a ansōk changa inphut huksōtna sik khana anka-ensui sik a sânkathem inkhat RŌNGPU’n aleitir.

¹⁴Israel mihe’n RŌNGPU kha ahnuk anmannat hêra kae, anṭhena jâra thi sik a rahōi kasōk hei. Ama chunga hmaimôkna anmansō jâra an-RŌNGPU’n karâkna apek sik hei.