Read Komrem HOSEA 13 Bible Online

HOSEA 13 - Komrem bible

HOSEA 13

¹Hmalai khan, Ephraim phung in ṭong ahri’nchu, Israel jât-hlop he’n anṭit a kae; anmani’n inshângtak a anleilo. Tâk ami he’n Baal ankamuk a setna antlo jo, khava jâra akathi sik hei kae.

²Anmani’n kamuk sik a thir vânga lim ansyema kae, dangka limhei, mihring mandonna hei leh mihring kut vânga ansyem heia kae. Khan chu anmani’n anti, “Khahei hnenga inthoina tōk ruh!” Heikhonga mo mi inkhat in amajôptor sik hei, khava sehratche limsyem mama kha!

³Khava jâra hiva mihei hi jîngkâr sumphai kapōa, inranga a’nhmangbât, jîngkâra radaitui kapōa inhmang sik hei. Saphōra inphut thli tatlen sarasi kapō, ratap hmeikhu kasōk kapō kha kachang sik hei.

⁴RŌNGPU’n ati, “Egypt a inphut nahong kaṭhōisōt RŌNGPU na-Pathen kha kei eng kae. Kei tei loa Pathen lak neimak che. Nang kahuk chu kei rōk eng kae.

⁵Nêrdiram, ram kachâra ka-ensui che.

⁶Tâk-kha nang in ram kahōi naheihlut pha chu pui katluk set jo chea katlai jo che, khana inlensak jo chea namahngi jo eng.

⁷Khava jâra ke’n shabakkai kapōa kabuhlu sik che. Rûtnu kapōa nahlam hrona inte sik enga kha kahlō sik che.

⁸Ate amanhmang jo kavompui kapōa kabuhlu sik che, na-ôp kakeihler sik. Shabakkai kapōa ahmuntak a kamade sik che, ramshahei kapōa ahar-ahak a kakeihler sik che.

⁹“Israel mihei, ke’n kaman ramsō sik chei! Khava pha tu’n mo a’nthōpui tor sik chei?

¹⁰Nangni’n reng leh hlamkakei neina sik a nander, tâk anmani’n jât kha heikhong mo antahuktor sik?

¹¹Kahnuknat pum a renghei kapek chei, kahnuknat pum a kalosōt nôk hei.

¹²“Israel setna leh ṭhenahei lekha a mazet jo kae, lekha kha kaṭha anda heia kae.

¹³Israel hi hringtheina pha inpek a kae, tâk matetsōt sik jo naidông in, nairabu shunga inphut hongsōk sik akahnōm mak kapōa, khava kalo sik a kamohêr joa kae.

¹⁴Thina raleia inphut hiva mihei hi hukmak hei ning, khana thina ratha hratna inphut hukmak hei ning. Eh thina, nang hrise thina kha heimathlung jo roh. Nang suksetna, thina raleichung kha heimathlung jo roh! Hiva mihei chunga lungset rôn hêrmak hei ning.

¹⁵Pengkung kapōa Israel in akhângsōt inum, nêrdiram a inphut nisō thli kalum kahei tir sik, antuipût leh antuikhur amanchârsō sik hei. Mankatam rakip alosōtsō sik hei.

¹⁶Samaria’n kei adōi eng jâra karâk sik kae. Amihei re shunga kathi sik hei; naidônghei hlung chunga ankatât rabek sik hei, nai karôn nuhmeihei anvon antuk mahlâng sik hei.”