Read Komrem HOSEA 2 Bible Online

HOSEA 2 - Komrem bible

HOSEA 2

¹Khava jâra na-Israel changpui hei kha, “Pathen mihei” leh “RŌNGPU talungset hei,” ti jo hei roh.

²Kasahei, ama kanuhmei achangmak jo’num, khana kei apuise kachangmak jo’num, nannu kha hripek ruh. Ajôngna leh anoti changna kha abângna sik jôr ruh.

³Ama’n abângmak inchu ajōng intet ninga kapōa akarōkpet a kada sik kae. Ama kha ram kachâr heite keklo inkhat kapōa kaman om sik, tui kahrea kathi sik.

⁴Asahei chunga lungsetna malârmak ning; anmani inzak inhret mak notinu sahei kae. Amanu khet in ahri, “Kalungset hei hneng kase sik eng, anmani’n thlai leh tui, shahmepōn leh hruipōn innem, olive thai khana vomhrui ju anpek eng.”

⁶Khava jâra ke’n ahlam rahlingbur vâng kakhar pek sik khana ahlam sena kha bangrape kakhar sik.

⁷Ama’n a’ndupui hei kahnung ajui sik, tâk ama’n surtor mak hei ning. Ama’n anmani a-enlele sik hei kha’num hmuphâk mak hei ning. Khava pha ama’n ahri sik, “Kei kapuise hma inkeipa hneng inle sik eng, tuna ka-om kanek a ama leh kanleiom lai kaṭhachet a kae.”

⁸Baal kamukna atahmang sâng, vomhrui ju, olive thai, khana sana dangka ahnenga akapek kha kei eng kae tia amanhret phâkmak.

⁹Khava jâra salōk pha kei kutchoi sâng, vomhrui ju khana shahmepōn leh hruipōn innem a’nsi sik a kaleipek hei kha kakasut male sik jo hei.

¹⁰A’ndupui hei hmaikunga apōnvei, apōnsi kahlikpek pet a kada sik, khana tûte’num karatha neina inphut ama kha huksōt tor mak hei ning.

¹¹Ke’n amanu rehōi sâktlâng rakip, kum a leh thlatina khana Châmhngat kani nitna rōihei, beklanga intûpna rakip kamanbâng sik jo.

¹²Alungset hei razenna sik a antapek eng ati, vomhrui theikung, theichang kunghei seng kasuk manhmang pek sik. Avomhrui thei rahōn leh athei rahōnhei hleichi kamanchang pek sik; ramsha he’n anmanset pek sik hei.

¹³Ama’n kei amahngi enga Baal hneng marim katui aro khana sanaret a’nvona a’ndupui hei ahnong heia pha amanhmang jâra khan karâkna kapek sik kae. RŌNGPU’n ahri jo.

¹⁴Khava jâra ke’n ama nêrdiram a kaṭhōi nôk sik kae; khana khan lungsetna ṭong vânga kamanhnōm nôk sik.

¹⁵Ke’n avomhrui rahōn kha kapek male sik khana Bōina Phaicham kha inhōrna kot inkhat a kasyem sik. Egypt a inphut ahei sōk laia, anuhngâk laia kapōa ama’n amasôn sik jo eng.

¹⁶Khava pha kapuise tia vōi khat abek nôk sik eng. Ama Baal tia abekmak jo ning.

¹⁷Ke’n ama Baal rahming manpanhêr nôk mak jo ning.

¹⁸Khava pha kamihei suksetna annei makna sik a, ke’n ramsha leh va rakip kha ṭong intepna inkhat kaneipui sik hei. Khan nôk chu re hmangchâk rakip, chemjâm, the leh sai ram a inphut kalosōt sik, khana kamihei kha malung kamōnga kahōia ka-om sik jo hei.

¹⁹Israel, kanuhmei kamanchang sik che; kei akadik leh taksenthei kachang sik eng; akahnet lungset leh maritna kha kamanhmu sik che khana ahei tik a kata kamanchang sik jo che.

²⁰Kaṭong tepna kajui sik, kata kamanchang sik che, nang in RŌNGPU tia nahnōm sik eng.

²¹Khava pha kami Israelhei derna kha kamasôn sik. Raleichunga khōtui kamansûr sik, khana ralei in sâng, vomhrui thei, khana olive thei amanra sik.

²³Ram a khan kamihei kaphunsōt sik hei khana kamannei kamanhao sik hei. Ke’n “Lungset lo,” inti hei hneng khana, “Kami changlo,” inti hei hneng lungsetna kamalâr sik. Ke’n, “Nangni kami chei kae,” kati sik, khana anmani’n anmasôn sik eng, “Nang kan-Pathen che kae,” anti sik eng.