Read Komrem HOSEA 5 Bible Online

HOSEA 5 - Komrem bible

HOSEA 5

¹“Thempuhei, hiva ṭong hi rangei ruh! Israelhei, malung kahlut a rangei ruh! Reng innshunghei, nangni rangei ruh! Nangni kadik a ṭong nantatan sik rahōi kachang, khava jâra nanchunga ṭong tanna kha ka-om sik jo! Nangni Mizpah a châng, Tabor tlânga lenchâng inzâr,

²khava Acacia khōpuia khur inthûk kha kachang chei; khana nangni nankhenga karâkna kapek sik chei kae.

³Israel hi heimo aka-ang jo ke’n kamanhret, keia inphut inthup tor mak ning. Ama taksenthei changmak jo, amihei kha kei inmuk sik rahōi changmak jo hei.”

⁴Mipuihei ṭhatmak tlona khan an-Pathen hneng hong inle sik a inphut akhar hei. Lim kamukna hin anmani asur manhnak jo hei, RŌNGPU kha manhretna neimak hei.

⁵Israel mipuihei ṭong rangei makna khan anbing chunga adōi heia hong ka-ông jo. Ansetna khan anmani amanpai heia amaphûr hei, Judah hei kha’m anmani leh kapursap hei.

⁶Anmani’n ansehei leh ankemōnghei RŌNGPU hneng inthoina tōk sik a ankei hei, tâk khava khan akaṭha tlopek dekmak hei. Anmani’n ama hmutor mak hei ajârchu ama’n adahlon jo heia kae.

⁷Anmani RŌNGPU hneng taksenthei changmak hei; ansahei kha ama ta changmak jo hei. Khava jâra anmani leh anram inranga suk manram sik hei kae.

⁸Gibeah a re tlona pengkun tum ruh! Rama a khōtlâng ôn ruh! Bethavena re tlona hranhla ông ruh! Benjamin sahei, re shunga hlut jo ruh!

⁹Karâkna sik kani kahong jo, Israel kha a’nsuk a’nhmang sik jo kae. Israel sahei, hivahi akasōk nger sik kae!

¹⁰RŌNGPU’n ati, “Judah hlamkakei he’n Israelhei chunga re antloa ama hnenga inphut ram ankasut jâra kei kahnuk kana. Khava jâra tuilen kapōa anchunga karâkna kaman lōng sik.

¹¹Israel in suk manrimna kha athōk a inreng jo; aram inchêntak kha’m inhmang jo. Ajârchu inthōpui theina kaneimak hei hneng kase hnōm ṭhak a kae.

¹²Israel chunga suk mansetna khana Judah chunga inhmangna kamasō sik kae.

¹³“Israel in khangtuk hrep a atak damlo kha ahmu pha khana Judah’n a’ntônna bi ahmu pha, Israel in Assyria rengkalen hneng inthōpuina kader sik a vakasea kae, tâk ama’n annat leh an-intônna bi kha mandam tor mak a kae.

¹⁴Judah leh Israelhei chunga shabakkai kapōa kabuhlu sik hei. Kei khet in anhar anhak a kakeihler heia kadahlon sik hei. Ke’n kakeisôn hei pha tûte’num huk tor mak hei ning.

¹⁵“Kami he’n ansetna jâra katluk a khōdeng theina aneia kei annihei jongmak kârseng ke’n kadahlon sik hei. Ankhōdeng theina shunga kei annihong jong khâk sik eng.”