Read Komrem HOSEA 7 Bible Online

HOSEA 7 - Komrem bible

HOSEA 7

¹“Kami Israelhei avea andamna leh ankhangna sik kamadu pha, anmani malung ṭhatmak leh anṭōntlo ṭhatmak rōk kha ke’n kahmu sōt a kae. Inkhat leh inkhat inhōntō hei; inn anvōkkhōia neinâk anchom; hlamlen heia mihei anchom heia kae.

²Hiva akaṭhamak seng hi ke’n kamandonsōt sik ti hi anrathlōk a hlut hêrmak a kae; kachanga ansetna’n akekhumbit jo hei khana khahei kha ke’n enloa om tor mak eng.”

³RŌNGPU’n ati, “Mipui he’n reng leh aṭōnpui karônhei chunga ṭhatmak mantlukna vâng anhōn hei.

⁴Ankhenga ṭhatmak a intluk hei khana ṭong juilo hei kae. Anmani inhōtna kha buhlom kasyem he’n jâmdi kha buhlom syem sik a ahongpōr mak hma seng ratap shunga hmei kha antakachok mak kapōa ka-om.

⁵Rengpa revei tlo ning rengpa leh aṭōn karônhei kha ju leh thlai anmanrui heia anmanvet hei.

⁶Kadik, anmantlukna vâng khan ratap kapōa anro mansûk a kae. Jân kathang anhnuknat kha an-ôma, jîngkâra chu hmeimalea kasûk a kae.

⁷“Anhnuknat inhnak khan anvai karônhei anthat hei. Anrenghei abân bâna anthat hei, tâk tûte’num kahnenga inthōpuina sik adermak hei.”

⁸RŌNGPU’n ati, “Israelhei hi buhlom katheia aṭimhrep akahmin kapō kha kae. Ankimvea ka-om jât-hei chunga in-ngai heia kae

⁹khana hiva miramhei chunga inngaina antanei hin anratha neina anchomsōt hei ti hi manhret mak hei. Ankani kha intei jo, kha’num anmani manhret mak heia kae.

¹⁰Israelhei ṭong rangei makna khan anmani chunga a-ôngsan heia kae. Hei-hei aleisōk jo tâk inum, RŌNGPU an-Pathen kei hneng he’nle mak hei

¹¹Israel hi akamo vaṭhu akajōng lele kapō kae; ahma kakei pena Egypt hneng, khava sōa Assyria hneng inthōpuina kajonga katlân lelea kae!

¹²Tâk-kha anmani’n khanga anse pha ke’n lenchâng kazâra, vahei kapōa kasur sik hei. Anmani’n ṭhatmak antlo jâra khan karâkna kapek sik hei.

¹³“Anmani inhmang jo hei! Anmani’n andahlon jo eng khana kei dōina inphin hei. Anmani suk manhmang sik hei kae. Ke’n anmani kahuk hnōm hei, tâk ankamukna eng kha dikmak

¹⁴Malung inthengtak a kahnenga adermak hei, tâk khōvelhei kapōa, raleia katlu heia ka-ông heia kae. Khana ju leh sâng sik a ander phale’m khōvelhei kapōa antak ankarittana kae. Anmani heikhonga a’nphin hei mo!

¹⁵Kei hi anmani kavei leh ratha innei kachangjen ravâng kei chunga dōina sik anmantluk a kae.

¹⁶Keia inphut inhe heia ratha kaneimak pathen hneng kase ri hei. Anmani hi inngamna omlo, intlunjenlo sai kapō hei kae. Ajârchu anhlam kakeihei kha rahe kasetak a kaṭong hei, re leh sha shunga kathi sik hei, Egypt he’n anhnōise sik hei.”