Read Komrem JOEL 2 Bible Online

JOEL 2 - Komrem bible

JOEL 2

¹Zion Tlânga pengkun tum ruh; khō ôn ruh, Zion Tlânga, khava Pathen hmebung inthenga khan. Judah mihei, ṭit a in nôk ruh! RŌNGPU kani kha inranga kahong jo.

²Khavakha khōdeng theina leh inrengna kani, inthim leh sumphai jingna kani kachang sik. Khaikhu remi katamtak kahong heia inthim kapōa tlâng anmakhusi hei. Khava kapō kha leisōk phung hêrmak, khana sōk nôk hêrmak ning.

³Hmei kakâng kapōa phi ansâksō hei. Anhmatinga ram kha Eden rahōn ka-ang, tâk-kha ankahnung tinga ram kha nêrdiramhâng ka-ang. Anmania inphut heite inphesōt tor mak.

⁴Anmani kha shakor anpō, re tlona shakor kapōa katlân hei.

⁵Tlâng chung heia an-inchômna kha, shakor gârihei rasa kha ka-ang; phi hmei kakâng rasa kapōa kapōk hei. Anmani re kasō sik a a’nrin remi katamtak kapōa kangir hei.

⁶Anmani anhong pha, mi rakip ṭit-inpirna annei; anhmaisō kadângper hei.

⁷Remi kahrânghei kapōa re antuk; remi kapōa banga kake hei. Anhmating intlunhrek a kase hei, Anhlam hro maikei thlengmak hei

⁸khana inkha-khat in anhlam et anjui. Rekur rape heia kahlut hei tûte’n khartor mak hei.

⁹Khōpui shunga inranga kahlut hei; banghei kha anrakan hei; inn chung heia kake hei inru kapōa thlikot a kahlut hei.

¹⁰Hmating anjōn pha ralei innok; thangvân innok a kae. Kani leh thla hong inthim, ârsi vârlep mak jo hei.

¹¹RŌNGPU’n aremihei rasa inhrek a ṭong pekna anei hei. Aṭong kajui remi rup-hei kha katam hei, kahrat hei. RŌNGPU kani kha heituk a ṭit ka-om jo mo! Tu mo akahringtor sik?

¹²Tâk RŌNGPU’n ahri, “Buhngōi, ṭap leh ṭajai sui pum a, malung inthengtak a nanmalung thleng ruh.

¹³Nanmalung akakōi khan nanchâmna kha malâr rasoh; nanpōn keihler rōk in latluk mak.” RŌNGPU nan-Pathen hneng hong inle ruh. Ama chu lungset leh maritna kasip kae; dehratna anei khana aṭongtep anit; pha rakip a rangei mandamna sik a intluk khana karâkna pek mak a kae.

¹⁴RŌNGPU nan-Pathen in amalung ahei thleng sik a kha hmuchi katamtak vânga mahâmṭhatna apekthei chei. Khana nangni’n ju leh hmuchi nantōk tor sik jo.

¹⁵Zion Tlânga pengkun tum ruh; buhngōina sik leh mipui intûpna sik a ṭongpek-hei ruh!

¹⁶Mipui mantûp hei ruh; inthenga intûpna sik a mantluk hei ruh; Katerhei heiṭhōi hei ruh; naipanghei mantûp hei ruh, khana naite hei katlunga. Lu kahongbi hei kha’m an-innden dahlona akahong sik hei kae.

¹⁷Bek-inn kot hlutna leh maichâm kâra RŌNGPU inzen thempuhei kha akaṭap heia antader sik kae: “RŌNGPU, namihei lungset hei roh, jât-hlop he’n ‘Nan-Pathen kha khon mo ka-om?’ antia keini chunga hmumasina leh hnōisena mantlomak hei roh.”

¹⁸Khana RŌNGPU’n aram kha angeitō nôk a; amihei chunga lungsetna anei hei.

¹⁹Ama’n amasôn hei: “Tûn ke’n nangni kapek sik jo chei — sâng, ju leh olive thai, nanmalung katlai sik jo. Jât-hlop he’n hmumasi mak jo chei ning.

²⁰Ke’n sak tinga akahong khâikhu remihei kalosōt sik hei ṭhahrep chu nêrdiram ting kahnong sōt sik jo hei. Anhma tinga hlamkakeihei kha Tuipui Kathi dunga kahlon sik hei, kahnung tinga hlamkakeihei kha Mediterranean a kahlon sik hei. Ankathi kalōng kha anmarim kathu sik. Nangni chunga antlona chei jâra kaman hmangpet sik hei.

²¹“RŌNGPU’n nangni sik atlopek chei jâra khan hleipuk-hei, ṭitmak ruh tâk-kha inpâk ruh, tlai ruh.

²²Ranhringhei, ṭitmak ruh, Ramhânga phi kadông kakek jo; Thingkunghei inra jo hei; vomhrui leh theipōng katamtak inra jo hei.

²³“Zion mihei, inpâk ruh, RŌNGPU nan-Pathen in nangni sik a atlopek chei jâra khan inpâk ruh. Ṭhe-thla khōsûr katluk a apek jo chei; nangni sik a phebi khō amansûr pek jo chei, khana hmalai kapōa zerkhō amansûr pek jo chei.

²⁴Savōkna saphōr kha sâng kasip sik; thei-epna khur kha ju leh olive thai inlet a kalōng sik.

²⁵Kum hmasa heia khaikhu he’n nansâng antasâk a a’nhmanghei kha kapek male sik chei. Nangni dōina hiva remihei ajōng katir kha kei eng kae.

²⁶Tûnchu sâk sik pui katluk a nannei sik, khana katlai sik jo chei. RŌNGPU nan-Pathen, nangnihei sik a ṭōn-inlak katlo, ama kha nanmanpâk sik jo. Kamihei kha ahei tik a’m hmumasia om mak jo hei ning.

²⁷Khava pha, Israel, kei nankâra ka-om eng tina leh, khana RŌNGPU kei hi nan-Pathen eng kae, alak heite om mak, tina hi nanhong manhret sik jo. Kamihei ahei tik a hmumasia om mak jo hei ning.

²⁸“Khava sō leh mi rakip chunga karathla kaheibun mathlâk sik: nansanu, nasapa he’n kaṭong anphông sik; nankater he’n rahmang annei sik, khana nankhangdông he’n hmangtalâr anhmu sik.

²⁹Khava pha sōk-hei, nuhmei leh pasehei chunga’m karathla kaheibun mathlâk sik.

³⁰“Khava kani ninga sik thangvân leh raleichunga gîkna kapek sik; khana khan thisen sōkna, hmei kângna, hmeikhu sipna ka-om sik.

³¹Ṭit ka-om RŌNGPU kani kha ahong mak hma kani inthimpak sik, khana thla kha thisen kapōa kasen sik.

³² Kha’num RŌNGPU hnenga inthōpuina kader rakip huk sik hei kae. RŌNGPU’n aleihri kapōa, ‘Jerusalema ṭhahrep chu inphesōt sik hei; ke’n kakadeisōt seng khachu kahring sik hei.’”