Read Komrem JOEL 3 Bible Online

JOEL 3 - Komrem bible

JOEL 3

¹RŌNGPU’n ati, “Khava pha khan ke’n Jerusalem leh Judah hei khangsōtna kha kapek male sik hei.

²Jât rakip kamantûp sik hei Ṭong tanna Phaichama kaheiṭhōi sik hei. Kamihei chunga anleitlona rakip jâra khana khan anṭong katan sik. Anmani’n Israelhei kha mihlop-hei ram a anchai kathek hei, khana, Israel karam kha insemṭhen heia kae.

³Rehringa surmihei kha tu’n mo achen sik tia vâng-enna anei. Noti hei leh ju man pekna sik a Pasenai leh nuhmei naihei sōk sik a anjōr hei.

⁴ “Tyre, Sidon leh Philisti ramkeia mi seng nangni’n kei hneng heimo tlo sik a nanti? Heikhat sik a kahnenga pek male sik tia nanmandon mo? Nangni’n nanmandon inchu, inrangtak a ke’n kapek male bât sik chei!

⁵Kasan a dangka, kakarōi bukna nanbek-inna nanrônpet jo.

⁶Judah leh Jerusalem mihei anrama inphut kahlatak a nanṭhōisōt heia, Greek-hei hneng nanjōr hei.

⁷Nangni’n natajōrna heia inphut tûn kei in kaheiṭhōi male sik hei. Nangni’n anmani hneng nanta leitlo kapōa nangni hneng ke’n katlo sik kae.

⁸Nansanu nansapa hei kha Judah hei hneng kamanjōr sik chei kae; anmani’n ram kahlatak Sabeanhei hneng anjōr sik hei. RŌNGPU ke’n kahri jo kae.

⁹“Hiva ṭong hi jât-hei hneng phôngsōt ruh: ti chu ‘Re tlona sik intluk ruh; nanre kahrânghei bek hei ruh; nanremi seng mantûp una injôk jo ruh!

¹⁰Nanhlei khōina ṭhirhei chemjâma kheng hei ruh. rahōn manhlengna chemcha hei kaseia syem hei ruh. Ratha kadôp-hei kapha re antuk nger sik.

¹¹Inrang ruh, khana hong ruh akimvea ka-om jâtseng phaichama hong intûp ruh.’” O RŌNGPU, tir jo hei roh, re kasō sik a naremihei kha.

¹²“Jât-hei kha a’nrin heia, Ṭong tanna Phaichama sik akahong nger sik hei kae. Khana khan RŌNGPU ke’n akimvea ka-om jât-hei chunga ṭong tanna sik in-ong sik eng.

¹³Anmani khangtuk khan ṭhamak hei; savōk pha sâng ât kapōa âttan hei ruh; vomhrui epna kapōa vomhrui epna kasip a ju kha ahong inletmak kârseng ep-mannōi hei ruh.”

¹⁴Lishing raja Ṭong tanna Phaichama ka-om hei Khava khan RŌNGPU kani kha inranga kahong sik.

¹⁵Kani leh thla inthim sik, khana ârsi vârmak jo hei ning.

¹⁶Zion Tlânga inphut RŌNGPU heika-ông; Jerusalema inphut arasa inhnaktak a hei intlir; ralei leh thangvân innok. Tâk amihei chu ahrung sik hei.

¹⁷“Khana, Israel, nang in kei hi RŌNGPU na-Pathen eng kae tia namanhret sik eng. Jerusalem hi khōpui intheng kachang sik; miram he’n ahei tik a’m hlō tor nôk mak hei ning.

¹⁸“Khava pha tlânghei kha vomhrui hlei in amakhusō sik; hmebung rakip a ran kasip sik hei; Judah hei kavadung rakip tui kasip sik. RŌNGPU Bek-inna inphut kavadung katlân sik, khava khan Acacia phaichama tui apek sik.

¹⁹“Egypt kha nêrdiram hongkachang sik Edom hongkaram sik, ajârchu Judah ram chunga re anleitloa ami ṭhenakase hei anthatpek heia kae.

²⁰Khava mithat jâra phuhlōna kanei sik; Akaṭhe madimmak hei ning. Tâk Judah leh Jerusalema kumleikōa mi ka-om ṭhak sik jo hei, khana Zion Tlânga, RŌNGPU kei ka-om sik eng.”