Read Komrem AMOS 1 Bible Online

AMOS 1 - Komrem bible

AMOS 1

¹Tekoa khōpuia kemōng kakhem Amos ṭonghei kha hihei hi kae. Lingnu innok sik kum 2 avât lai Uzziah’n Judah hei reng achanglai khana Jehoas sapa Jeroboam in Israel reng achanglai Pathen in Israel chungchânga hihei rakip hi Amos hneng aleiphôngsōt pek.

²Amos in ahri, “RŌNGPU’n Zion Tlânga inphut hong inhrung; Jerusalema inphut a-ông rasa hong intlir, phi kekna ramhâng kachâr jo Carmel Tlânga hardông he’m ka-êngsō jo hei.”

³RŌNGPU’n ahri, “Damascus he’n setna ave-avea antlo jo, hiva jâra kakarâk nger sik hei kae. Anmani’n Gilead mihei kha hnuk kasetak a anrazen hei.

⁴Khava jâra reng Hazael innpuia ke’n hmei kamathlak sik khana Benhadad rengpa rekur kha karo mankâng sik.

⁵Damascus khōpui kot kharna kha kavōk mathlek sik khana Aven Phaichama ka-om Betheden a vaikarônpa kalosōt sik. Syria mihe’m Kir ram a rehringa ankei sik hei.”

⁶RŌNGPU’n ahri, “Gaza mihe’n ave-avea setna antlo jo, hiva jâra anchunga karâkna kapek nger sik hei. Anmani’n jât inkhat ankhenga rehringa ankei heia Edomhei hneng sōk a anjōr hei.

⁷Khava jâra ke’n Gaza khōpui banga hmei kahei tira karo sik. Khana anrekur kakângsō sik.

⁸Ashdod leh Ashkelon khōpuia ka-om vaikarônhei kha kalosōt sik hei. Ekron khōpui kha karâkna kanei sik, khana Philistihei alakahring hei seng kha kathi sik hei.”

⁹RŌNGPU’n ahri, “Tyre mihe’n ave-avea setna antlo jo, khava jâra karâkna kapek nger sik hei kae. Anmani’n jât inkhat ankhenga Edom ram a rehring sura ankei heia khana ṭhōn changna ṭongkam antanei kha anvōkkhōia kae.

¹⁰Khava jâra Tyre khōpui rape banga hmei kahei tira anrekurhei kamankâng pek sik hei.”

¹¹RŌNGPU’n ahri, “Edom mihe’n ave-avea setna antlo jo, khava jâra karâkna kapek nger sik hei. Anmani’n ansōpui Israelhei anhnong hei, lungsetna neimak hei. Anhnuknat kha abângna om mak, khavakha mandaihêr mak hei.

¹²Khava jâra Teman khōpui chunga hmei kamathlâk sik khana Bozrah rekur aro khum sik.”

¹³RŌNGPU’n ahri, “Ammon he’n ave-avea setna antlo jo, khava jâra karâkna kapek nger sik hei kae. Ram losana sik a anre tlona shunga Gilead khōa nai karôn nuhmei ṭhahrep anvon an-âtkhōi pek hei.

¹⁴Khava jâra Rabbah khōpui bangrape chunga hmei kahei mathlak sik, arekur kakângsō sik. Khava sōa re tuk ning rasa inhnaktak kasōk sik, retlo kha thlipui kapōa inhnak sik.

¹⁵Anrengpa leh avaikarônhei rehringa ansur heia miram a antir sik hei.”