Read Komrem AMOS 3 Bible Online

AMOS 3 - Komrem bible

AMOS 3

¹Israelhei, Egypt a inphut ama’n aheiṭhōisōt jât-hei, RŌNGPU’n nanchungchânga ṭong ahri hi rangei ruh:

²“Raleichunga phung rakip kâra kamanhret leh ka-ensui jât kha nangni rōk chei kae. Khava khan nangni setnahei kha ṭit ka-om tak amanchang, khava jâra karâkna kapek sik chei kae.”

³Inhmutōna neiloa mi 2 he’n khōhme se antaphut thei mo?

⁴Heite inkhat hmuloa shabakkai a’nhrung mo? Heite inkhat surloa shabakkai chere khan a’nhrâm mo?

⁵Athlai nidapek mak inchu vate kha chânga a’n-ôk sik mo? Amakhapna nisyem mak inchu châng kha akakap sik mo?

⁶Mipui in ṭitna neiloa re pengkun kha khōpui shunga a’nhring mo? RŌNGPU’n ahei tir mak inchu khōpui kha khōdeng theina akasōk sik mo?

⁷Chunghnung RŌNGPU’n asōk sânkathemhei hneng malârna neilo heite inkhat tlohêr mak a kae.

⁸Shabakkai a’nhrâm leh tu mo akaṭi mak sik? Chunghnung RŌNGPU’n ahri leh ama ṭong tu’n mo aphông mak sik?

⁹Egypt leh Ashdod reng-innpuia ka-om hei hneng hivahi manthei hei roh: “Samaria kimvea hmebung heia intûp ruh, khana ṭōn injenmak leh ṭōnse antatlo so enruh.”

¹⁰RŌNGPU’n ati, “Hiva mihei hi ṭōnse tlona leh innâk-insea neinâk anta heichomsōt vâng rōk a an-innpuihei kasip sōa kae. Heikhonga malung mantheng sik ti kapha’m manhret mak hei.

¹¹Khava jâra anka-en kada he’n anram ankakekhum sik, ani’nhrungna rape ansukkhōi sik, khana an-innpuihei anchom sik hei.”

¹²RŌNGPU’n ahri, “Kemōng kakhem inkhat in shabakkai sâkbang, kemōng ake 2 rōk achangmak leh akōr inkhat rōk ahmu sōt kapōa, tuna jekhum ret kaṭhatak chunga akajea ka-om, Samaria mihei kâra ajingte kahring sik hei.”

¹³Chunghnung RŌNGPU Akahratpen khan ati, “Tûn rangei ruh, Jacob sōn leh pârhei manse hei ruh.

¹⁴Israel mihei ansetna jâra karâkna kapek ning khan, Bethel a maichâmhei kha kasuk manhmang sik. Maichâm rakir rakip vōk mathlek sik khana raleia katla sik jo.

¹⁵Phebi leh khōlum thla a inhngatna innhei kasuk mathlek sik. Saipui ha vânga antamanret inn katlu hei sik; inn kalen rakip sukset sik hei kae.”