Read Komrem AMOS 4 Bible Online

AMOS 4 - Komrem bible

AMOS 4

¹Samaria nupuihei, Bashana kaṭhadek a antavei sehrat pui kapōa akathai hei, akatlasam êngset a akatlohei, sara kasuk inrim hei, anpuise he’n ju anta heichoi pek sik a akahngâk-hei, hiva ṭong hi rangei ruh!”

²Chunghnung RŌNGPU kha a’ntheng achang jâra, ama’n intep jo, “Nangni anmani he’n khoi vânga ankeina sik chei kani kha kahong sik jo; nangni inkhat et khoi in nga asur kapō kha kachang sik chei.

³Nangni kha bang kave kahnaipena khan ankei cheia vângting anhlonsōt sik chei.”

⁴Chunghnung RŌNGPU’n ati, “Israel mihei, tlo-nger rih nanti’nchu, Bethel hmun inthenga se una setna vatlo ruh. Gilgal a se una nantor chenna setna vatlo ruh! Se ruh, ran heikei unna jîngkâr kataia inthoina heichoi ruh, ni 3 akaia nansemsôm heichoi ruh.

⁵Se ruh, Pathen hnenga inpâkna nanbuhlom kha tōkna nei ruh, khana inthoina ralak nanheichoi hei jâra inlensak ruh! Hiva kapō hi nangni tatlo hnōm kha kae.

⁶“Nankhōpui rakip a vonṭâm heikachoi kha kei eng kae, achang inum nangni kahnenga hong inlemak chei.

⁷“Nansâng he’n khōtui anrangei laitak khō kakhama kae. Khōpui inkhat a khō kamansûr, tâk ahlop inkhat a chu mansûr mak eng. Hleipuk inkhat a khō kasûr, tâk hleipuk inkhat chu kachâra kae.

⁸Dangchâra kachâm sik hei, khōpui katamtak a mihe’n tui kajonga khōpui inkhat a vakase sik hei, tâk khava khan tui in sik katluk a om mak. Khava katlunga’m kahnenga hong inlemak chei.

⁹“Nansâng manchârna sik thli kalum kahei tir. Nanrahōn leh vomhrui hleia theichangkung leh olive kung khâikhu he’n ansâksō jo. Kha’num kahnenga hong inledek mak chei.

¹⁰“Egypt a kalei tir kapōa nankâra hrise kamasō jo. Nansa retherhei re shunga kathat hei khana nanshakor kalosōtpek chei. Nanhnâr hei kha nanrephōra mi kathi marim kase kha kamanhnam chei. Kha’num kahnenga hong inledek mak chei.

¹¹“Ke’n Sodom leh Gomorrah kasuk manhmang kapōa nangni ṭhahrep khat kasuk manhmang jo chei. Nangni akahring chei kha hmei takâng khōnghre kapōhrep ka-ang jo chei. Kha’num kahnenga hong inledek mak chei,” RŌNGPU’n ati.

¹²“Kha achang jâra, Israelhei, ke’n karâkna kapek sik chei kae. Ke’n hivahi katlo sik jo achang jâra, kaṭong tanna khan nanngirna sik a intluk ruh!”

¹³Pathen chu tlânghei kasyem kha kae khana thli kahrânghei hi’m asyem. Amandonna kha mihringhei hneng amanthei; ama’n sûn kha jân amanchanga kae. Ralei inshâng chunga ama kha kalônna kae. Chunghnung RŌNGPU Pathen hi, ama rahming kae.