Read Komrem AMOS 5 Bible Online

AMOS 5 - Komrem bible

AMOS 5

¹Rangei ruh, Israelhei, nangni sik a ṭajai suina hla kasak hi:

²Nuhngâk intheng Israel kha kapûr jo! Thōnôk hêrmak jo ning! Raleia katlua dahlona ka-om jo, ama mathōna sik tûte’n inthōpui mak hei.

³Chunghnung RŌNGPU’n ahri, “Israel a khōpui inkhat in remi 1,000 atirsōt hei, tâk 100 rōk he’nle hei; khōpui hlop inkhat in mi 100 atir hei, tâk 10 rōk he’nle heia kae.”

⁴RŌNGPU’n Israelhei hneng ati, “Kei hneng hong ruh, kahring sik chei.

⁵Beersheba kamukna sik a semak ruh. Kei kajong sik Bethel a vase mak ruh, Bethel kha heite hnemmak ning. Gilgal a vase mak ruh, amihei kha rehring ṭhōina inhmang jo hei.”

⁶RŌNGPU hneng vase ruh, kahring sik chei. Nanvase mak inchu, Israelhei chunga hmei kapōa jōng kachu sik. Hmei khan Bethel mipuihei akânghlon sik hei, khana tûte’num thattor mak hei ning.

⁷Akadik maherna kanei leh mihei dikna chunga akahōn hei nangni, inhmang jo cheia kae!

⁸RŌNGPU’n ârsihei asyem hei, ârsi rup leh ârsi kumri asyem hei. Ama’n a’nthim kha sûn kanivâr amanchang sûn kha jân amanchang. Ama’n tui-ôngpui tui kha abek a raleia abun mathlâk a kae. Ama rahming chu RŌNGPU kae.

⁹Ama’n akalen akahrânghei anrekur asuk manset hei.

¹⁰Mipui nangni’n akadik mak kadōi leh ṭongtan hmun a akadik rōk kahri kha nanhōt a kae.

¹¹Sarahei nanmanrim hei, ansâng hei nankasut hei. Khava jâra a’nnejap hlung inna om mak tin chei, khana vomhrui thei kaṭha nantaling rahōn heia inphut vomhrui ju inmak tin chei.

¹²Heituk a ṭit ka-om setnahei nantanei mo khana heituk a dân sukṭhena nantatlo mo ti kamanhret. Mikathahei nansuk manrim hei, sêrmarûk nanlo, khana ṭongtan hmun a sarahei dikna chen sik kha nankhar hei.

¹³Khava jâra, khang khava ṭhatmak pha khan sip tia om sik hi akasing ṭōn kachang jo!

¹⁴Nanhring theina sik a, akadik mak tlona changloa, akadik kha tlona sik nanlungtup manchang ruh. Khava sōa Chunghnung RŌNGPU kha nangni’n nantahlamrin kapōa, ama’n kadiktak a a-ompui sik chei.

¹⁵Akaṭhamak kha mater ruh, akadik kha madu ruh, khana ṭong tanna hmun a akadik manleng ruh. Kha achang inchu tûn katlunga kahringa dahlon jât-hei chunga RŌNGPU’n lungset a alarônthei heia kae.

¹⁶Akahratpen Chunghnung RŌNGPU’n ati, “Khōpui hlamlen heia in-ôina leh ṭap rasa kasip sik. Kathi ṭajai kasui sik antanêk hei leh inṭhōia ṭajai kasuisap sik a hlei kathlōhei kapha anbek sik hei.

¹⁷Vomhrui thei rahōn rakip a in-ôina ka-om sik. Hivahi kasōk sik, ajârchu ke’n nangni karâkna kape sik a kahong eng.”

¹⁸RŌNGPU kani kahngâk hla nangni sik a heituk a ṭit ka-om kachang sik! Khava kani khan nangni sik heimo akaṭha atlopek sik chei? Ajârchu khavakha inthimna kani kachang sik akavâr kani changmak ning.

¹⁹Khavakha mi inkhat in shabakkai a inphut atlânsōt leh kavom a’ntōpui kapō kachang sik! Achangmak leh mi inkhat inna ahong inle pha akut kha mari tamachuk hrep sik a banga avasit kapō kha kae!

²⁰RŌNGPU kani khan inthim ahei rôn sik, akavâr heirôn mak ning; khavakha vâr omloa lungjing jâmze kaina kanikhō kachang sik.

²¹RŌNGPU’n ahri, “Nangni beklanga revei kha kamater; en-hnâm tor mak eng!

²²Nangni’n ro-inthoina leh hmuchi tōkna nanheichoi pha ke’n rahlâng mak ning. Nangni’n kei hneng heikei sik a ran nantamanthai hei ke’n rahlâng mak ning.

²³Nanhlasak inhrek kha hai ruh; nanserângdâr kha rangei hnōm mak eng.

²⁴Khava kanek a, ṭongdik kha kavadung kalōng kapōa lōng rasoh, khana dikna khan chârloa akalōng tuidung kapōa lōng rasoh.

²⁵“Israelhei, nêrdiram a kum 40 kaheiṭhōilai chei ke’n inthoina leh tōkna ngekmak chei eng.

²⁶Tâk-kha tûnchu, nanreng pathen, Sakkuth limsyem, khana nan-ârsi Pathen Kaiwan limsyem kha

²⁷ke’n nangni Damascus rekhat a rehringa kaṭhōisōt chei pha khan nantakadom sik jo hei kae,” tia arahming Akahratpen RŌNGPU’n ati.