Read Komrem AMOS 8 Bible Online

AMOS 8 - Komrem bible

AMOS 8

¹Chunghnung RŌNGPUa inphut hmangtalâr ahlop inkhat kaleihmu nôk. Khava khan hraithuk inkhat a theikara kasip kahmu.

²RŌNGPU’n ader enga, “Amos, heimo nahmu?” ati eng. “Hraithuk a theikara” tia kamasôn. RŌNGPU’n kahnenga ati, “Kami Israelhei sik a achaina kha kahong jo. Anmani karâkna pek sik a inphut kamalung thlengmak jo ning.

³Khava kani ning reng-innpuia hlasakna kha ṭajai suina’n athleng sik. Hmun rakip a kathi kalōng kasip sik jo. Kathi kalōnghei kha marûk a anhlonsōt sik jo hei.”

⁴Hivahi rangei ruh, mi kachâm akachōn rachi hei, ram shunga sarahei inhmangna katlohei.

⁵Nanbinga nanhri, “Kani intheng hei thlengsō sik kha nihngâk hla jo, nisânghei nijōr theina sik a. Neinâk jōr niphut theina sik, Châmhngat kani heitik leh mo akathleng sik? Khava sōa chu aman nimanke sik jo, atena kadikmak nihmang sik, neinâk inchôk hei kha kher kaṭet nihmanga nihōntor sik jo hei.

⁶Akaṭhamak gehu kha mankatamtak a nijōr sik jo. Abat kapetor mak, misara nihmu sik, kekōk tōkhat manbek um akapektor mak hei kha sōk sik a nirachôk sik hei.

⁷RŌNGPU Israelhei Pathen in intep jo, “Anmani ṭōnse tlona mahngi hêrmak ning.

⁸Khava jâra, ralei innok sik, mi rakip anmalung inreng sik. Ram pumpui innok sik; Nile tuidung kapōa kaketou sik, kaṭumsuk sik.

⁹Sûnṭima kani kamathlak sik khana sûn pha ralei kamanthimna sik pha kha kahong sik. Chunghnung RŌNGPU ke’n kahri jo.

¹⁰Nanrehōi hei kha kathi hrena kamanchang sik, nan-inpâkna hlahei kha inrengna leh ṭapna kamanchang sik. Nanlu kamankek sik, borapōn kamansi sik chei, khana ansanei inkhat rōk thina ṭajai kasui nu leh pahei kapōa kamanchang sik chei. Achaina kani kha inrengna kachang sik.

¹¹“Ram shunga sâk leh in khôk pha kha kahong jo. Mihe’n anvon kaṭâm sik, tâk bu sik a changmak, antui kahre sik, tâk tui jâra changmak. RŌNGPU ṭong inngei sik a anvon kaṭâm khana antui akahre sik kae. Chunghnung RŌNGPU, ke’n kahri jo.

¹²Mihe’n Tuipui Kathia inphut Mediterranean katlung khana sak tinga inphut nisōting katlunga kalôn lele sik hei. Anmani’n hmuntina RŌNGPUa inphut ṭong kha anjong sik, tâk hmumak hei ning.

¹³Khava ning khan taksa kaṭha rether leh nuhmei he’m antui hre jâra katlu sik hei.

¹⁴Samaria limsyem rahminga ṭong intepna kanei khana hinga kahrihei, ‘Dan pathen rahminga achangmak leh Beersheba pathen rahminga,’ mipuihei kha kapûr sik hei khana avea indingtor mak hei ning.”